•  Le kwiselembeja i bika?

•  Mwanda waka bantu bamo beselembejanga?

•  Le i byaka’ka bidi’mo?

•  Binena bakwenu

 Bantu bamo balañanga’mba kwiselembeja i kulombola kupityila ku binenwa nansha ku bilongwa amba usenswe muntu wa ngitu ingi. Le i bibi kulombola’mba usenswe muntu? Mhm. Nsongwakaji umo witwa bu Ann unena’mba, “shi kodi mufikile pa kitatyi kya kwinangila, kadi ubasanswa muntu, le i muswelo’ka obwanya kuyuka shi nandi ye mwaebimwena?”

 Inoko mu kino kishinte, tusa kwisambila’mo pa kwiselembeja kwa muntu umwekeja bu usenswe muntu ino kumusanswa mpika.

 “Kuta muntu mutyima bininge mwanda wa kwinangila nandi i mwanda umo. Ino kumukulupija bya bubela abe pampikwa mutyima wa kwinangila nandi, nao i mwanda mukwabo.”​—Deanna.

 Bantu bamo beselembejanga’tu mwanda wa kwimwekeja. Nsongwakaji umo witwa bu Hailey unena’mba: “Shi ubajingulula’mba kudi bintu bilengejanga bantu bakute mutyima, ubwanya kukimba bakute mutyima bininge.”

 Inoko shi upa muntu ku kusaka mulangwe wa kumusanswa ino abe kumusanswa mpika, ulombolanga’mba kulēmekelepo mwiivwanino wandi. Kadi ulombolanga’mba wi mubulwe ñeni. Bible unena’mba: “Bulembakane i nsangaji kudi yewa wampikwa ñeni.”​—Nkindi 15:21.

 Hailey udi na bubinga bwa kunenena’mba, “kwiselembeja kubwanya kushilula biyampe, inoko kufulanga nyeke kubi.”

•   Kwiselembeja kukushingijanga kato.

   “Muntu wiselembeja, umonwanga bu muntu katamine kadi kakulupilwapo. Abe umumwene bu nzazangi ino aye ulonga’nka bukomo bwa kukimba kintu kampanda kodi.”​—Jeremy.

   Bible unena’mba: “Buswe . . . kebukimbangapo tumweno twa abo bwine.”​—1 Bene Kodinda 13:4, 5.

   Langa’po bidi: Le i binenwa’ka nansha bilonga bibwanya kukulengeja bakumone bu muntu wiselembeja?

•   Kwiselembeja kusanshijanga muntu owiselembeja nandi.

   “Shi nayuka muntu wiselembeja, nkisakengapo kumufwena. Monanga’mba kyaesambila nami i mwanda’tu ne mwana-mukaji. Bantu beselembeja kebantelepo mutyima bya binebine; basakanga’tu kwiivwana biyampe abo bene.”​—Jaqueline.

   Bible unena’mba: “Nanshi muntu ne muntu kakikimba kamweno ka aye mwine, ino akimbe nyeke kamweno ka mukwabo.”​—1 Bene Kodinda 10:24.

   Langa’po bidi: Le kodi mulange amba muntu kampanda ukusenswe, ino wajingulula’mba kakusenswepo? Shi i amo, le weivwene namani? Le i muswelo’ka okaleka kusanshija muntu mukwabo mu uno muswelo?

•   Kwiselembeja kubwanya kukulengeja ukomenwe kuyuka buswe bwa bine.

   “Muntu wiselembeja i mubi kwisonga nandi nansha kwinangila nandi. Le ubwanya namani kuyuka nansha kukulupila muntu uzaula na buzazangi?”​—Olivia.

   Mu Bible, Davida mulembi wa mitōto wānenene amba: “Nyemanga boba bafya mobekadile.”​—Ñimbo ya Mitōto 26:4.

   Langa’po bidi: Le i muntu wa muswelo’ka usangelanga kwiselembeja? Le ye muntu osaka kusanswa?