Tanga myanda yafikīle Karina, kadi wimone bwa abe oifikīle. Le wadi wa kulonga’po namani?

 Karina: “Nadi ñenda lubilo bininge na motoka ku masomo, ebiya mpulushi umo wauñimika ne kumfutyija mukanda wa amande. Nafitwa! Nakasapwila’mo Mama, nandi waunena’mba kalombole’mo Shobe​—Nami nkyadipo nsaka kumulombola’mo.”

  Wadi wa kulonga’po namani?

1.  A: Kuba talala na kulanga’mba Tata kasapo kuyuka.

2.  B: Kulombola Tata monso mobyaikadilanga.

 Ubwanya padi kulanga’mba i biyampe ntonge A. Padi inobe nandi usa kulanga’mba wakalombwele’mo shobe ne kumulomba lusa. Inoko kudi bubinga buyampe bwa kwitabijija bilubo byobe​—ekale i bya mukanda wa amande nansha myanda mikwabo.

1.  1. Mwanda kyo kintu kiyampe kulonga. Musoñanya umo wa mu Bible utala bene Kidishitu unena’mba: ‘tusakanga kwiendeja kwampikwa budimbidimbi mu byonso.’​—Bahebelu 13:18.

    “Noñanga bukomo bwami bonso mwanda wa kwikala wampikwa budimbidimbi ne kwitabija bilongwa byami​—kadi shi nalonga kilubo ngitabijanga’kyo bukidibukidi.”​—Alexis.

2.  2. Mwanda bantu bapēlelwanga kulekela boba betabija bilubo byabo. Bible unena’mba: “Yewa upūtanga kujilula kwandi kakamonepo dyese, ehe; ino yewa usaba ne kwijiba’ko ukafwilwa lusa.”​—Nkindi 28:13.

    “Bilombanga bukankamane pa kwitabija kilubo, inoko shi wikitabije bantu bakakukulupila ne kukumona bu muntu wampikwa budimbidimbi. Kwitabija kilubo, kulumbululanga myanda nansha shi yadi mibi.”​—Richard.

3.  3. Kadi bwa mvubu kutabuka, i mwanda kusangajanga Yehova Leza. Bible unena’mba: “mupupakane [zanzangi] i wa munyanji kudi Yehova; ino kifibwa kyandi kidi ne balulame”​—Nkindi 3:32.

    “Ponalongele kilubo kikatampe, namwene’mba i biyampe’tu nesapule ne kwikitabija. Yehova kabwanyapo kungesela shi mpela kwitabija bilubo byami.”​—Rachel.

 Ino le Karina walongele namani pa kilubo kyandi? Watompele kufya shandi mukanda wa amande yaafutyile pa lubilo lwaapityije na motoka. Ino kabwenyepo kwiufya nyeke. Karina unena’mba “Kintu kya mwaka umo kupita’po, tata pa kutala mu mikanda yetu ya motoka, wasokola mukanda’wa palembe dyami dijina. Byaundetele makambakano​—ne mama mwine waundobele mwanda nkyalongelepo byaanombwele!”

 Ñeni yotuboila’ko: Karina unena’mba: “Kufya bilubo kuvudijanga’tu’nka mambo. Ukafula’nka ku kufuta’o!”

 Muntu ense uloñanga bilubo. (Loma 3:23; 1 Yoano 1:8) Enka na motwamwena, kwitabija bilubo kwampikwa kwija i kilomboji kya kutama ne kwityepeja.

 I biyampe kadi ne kwifundila ku bilubo byobe. Kya bulanda, bankasampe bamo bafyanga byobalonga! Babwanya kwiivwana na mweivwanine nkasampe umo witwa bu Priscilla. Aye mwine unena’mba: “Natyumukilwe mutyima pa bilubo byami. Nemwene bule, mwanda bilubo byami byadi pamo bwa kiselwa kilēma kyonkibwanyapo kusela. Byampityile mutwe nkenanga’mba kebikapupo.”

 Le kyaba kimo, nobe wiivwananga namino? Shi i amo, vuluka’mba: Kulangulukila bininge pa bilubo byobe bipityile, kudi pamo bwa kutala mu dikalashi dilombola bishele kunyuma poendeja motoka. Shi utá mutyima bininge pa bilubo bya kala usa kwityepelwa, utunye’nka ne bukomo bwa kulwa na makambakano a kumeso.

 Mwene nanshi, i biyampe wikale na bujalale?

 “Vuluka bilubo byobe ne kwifundila’ko kutyina’mba wakebilonga monka. Inoko, kokilangulukila’po bipitepite kutyina byakakutyumuna mutyima.”​—Elliot.

 “Monanga kilubo ne kilubo kyononga bu masomo amfundija mbwanye kuboila’ko ñeni mwa kukalongela dikwabo mu muswelo mwishile shi natanwa na mwanda’wa mwenda mafuku. Uno i mumweno muyampe kwikala nao mwanda ukakukwasha utame.”​—Vera.