Lelo uyukile’ko nkasampe ususuka na misongo mikatampe? Le ubelanga nansha udi na bulema bukulengeja ukomenwe kwingila mingilo ingila bakwenu?

 Shi i amo, kutyumukwa mutyima kyaba kimo i kwendele’mo. Inoko mu Bible mudi milangwe ibidi ikankamika bininge.

•   Yehova Leza, Umpangi obe uyukile ngikadilo yodi’mo. Ne kadi “aye [ukutele] mutyima.”—1 Petelo 5:7.

•   Yehova Leza usakanga kubelula misongo yonso. Ubwanya kutanga ino myanda mu Bible mu Isaya 33:24 ne mu Kusokwelwa 21:1-4.

 Bankasampe bavule badi bekonda na misongo, bakankamikilwe na lwitabijo lwabo mudi Leza ne mu milao yandi. Tala’tu bidi bino bimfwa biná.

•  YEIMY

•  MATTEO

•  BRUNA

•  ANDRÉ

 Kitatyi’tu kyonadi na myaka 11, nadi kala nsakilwa kakinga ka kwenda nako. Nkibwanyapo kulonga tubintu tutyetye’tu, kimfwa kutekuna’nka ne tubintu tupēla.

 Ponadi na myaka itano, bankwete misongo ya misunya, misongo yendelela kumeso yanengeje nkomenwe kulonga bintu bimo. Mwenda mafuku natyumukwa mutyima mwanda nkyadipo mbwanya kulonga bintu bikokeja kulonga bantu ba yami myaka. Ino bambutwile bami ne banabetu mu kipwilo bankwashanga ku ngitu, mu ñeni, ne ku mushipiditu. Ñingilanga bu mwingidi wa kitatyi kyonso, kadi banabetu bene Kidishitu bavudile kwenda nami poñenda kukefunda Bible na bantu basangela.

 Yesu wānenene amba difuku ne difuku didi ne makambakano adyo. (Mateo 6:34) O mwanda noñanga bukomo bwa kulanga’nka bya dyalelo, ne kwitungila bitungo biyampe byombwanya kufikila’po. Ntengele difuku dyonkekala na “būmi bwinebwine” mu ntanda mipya ya Leza, mwampikwa ino misongo ya bulema.—1 Temote 6:19.

 Languluka’po: Yeimy umwene amba i biyampe “kwitungila bitungo byabwanya kufikila’po.” Le nobe ubwanya kulonga uno muswelo namani?—1 Bene Kodinda 9:26.

 Nashilwile kwivwana muongo kusansa na myaka isamba, kadi badokitele badi banena’mba i misanshi ya pa kutama. Ino mwaka umo pa kupita’po, bajingulula’mba nadi na kimenwa mu muongo.

 Baumpaswile, inoko muñanga wampaswile wabwanya kutalula’ko kipindi kityetye kya kimenwa. Kupwa, myeji’tu ibidi pa kupita’po, kimenwa kyaikala’nka mokyadi kikadile! Tamba pene’pa, badi’nka bampima, bañundapa, kadi nadi’nka tyumukwa mutyima.

 Kyaba kimo, kimenwa kindetelanga misanshi’nka na ami obatapatapa mpete ngitu yonso, inoko nakampata ino misanshi neivwananga mu kyadi ne mu muongo. Nansha nabya, noñanga bukomo bwa kuleka kulemenenwa na misongo yami. Mvulukanga’mba bakwetu nabo bōminine bintu bikatampe bininge, ino badi nyeke na mumweno muyampe. Kintu kinkwashanga bininge ngikale na mumweno muyampe, i kukulupila’mba difuku dimo Yehova ukafikidija mulao wandi wa kupwa masusu onso.—Kusokwelwa 21:4.

 Languluka’po: Le kulangulukila pa mulao wa Leza wa kupwa masusu kubwanya kukukwasha namani ūminine, na mokwakwashishe Matteo?—Isaya 65:17.

 Byonkimwekapo amba mbelanga, bantu bamo babwanya kulanga’mba ne kivila. Ino na bubine, mbwanya kukomenwa kulonga bintu byonso, kimfwa kwingila mingilo ya njibo, kwifunda, nansha ke kubūka pa butanda.

 Ponadi na myaka 16, baunkwete misongo ya kūmwa bidyoma (clérose en plaques), misongo ilemekejana yaonene bukomo bwami bwa kwingila ne kusapula monsakila. Nadi ntanga kitatyi ne kitatyi kisonekwa kya 1 Petelo 5:7, kinena’mba: “[Elai] kuzumbazumba kwenu konso kwadi [kudi Leza], mwanda aye wimutele mutyima.” Musemwa unena’mba Yehova utele mutyima muntu ne muntu wankankamikile bininge. Kadi ukyendelela kunkankamika ne dyalelo.

 Languluka’po: Le mulangwe wa kwela kuzumbazumba kobe kudi Yehova ukukwashanga namani, na mowakwashishe Bruna?—Ñimbo ya Mitōto 55:22.

 Bantu bamo bamonanga’nka na mwana wa myaka 10. Inoko nkibwanyapo kwibatopeka; mwanda mwekanga’nka bwa mwanuke.

 Ponadi na myaka ibidi, baunkwete dyaya kedivudilepo kumweka, dyashilwile mu muongo kupwa dyatundulukila mu bongolo. Badokitele babwenye kwidyundapa, ino buno bundapi bwalengeje ndeke kutama. Dyalelo ngidi’tu na metele 1 ne masantimetele 37. Bantu bavule balañanga’mba mbepanga ponebalombolanga’mba nkendi na myaka 18!

 Mu kipwilo kya bwine Kidishitu bantu bamwene na bulēme. Kebanzawilangapo pamo bwa mwanuke, mwadi mulongela bana botwadi twenda nabo ku masomo. Noñanga bukomo bwa kwikala na mumweno muyampe pa ngikadilo yondi’mo. Bine, ne mufikilwe na kintu kiyampe kibwanya kufikila bantu bonso, ke kuyuka Yehova kadi! Nansha shi natanwa na makambakano’ka, ndyukile amba Yehova ukanta mutyima. Kulangulukila pa ntanda mipya milumbuluke ilaile Yehova Leza kunkwashanga ngikale na mumweno muyampe.—Isaya 33:24.

 Languluka’po: Monka munenene’kyo André, mwanda waka kuyuka Yehova i “kintu kiyampe kibwanya kufikila bantu bonso”?—Yoano 17:3.