Le Lupandilo I Bika?
Bilondolola Bible
Bishima “kupandija” ne “lupandilo” kyaba kimo byāingidijibwe na balembi ba Bible pa kuleta mulangwe wa kunyongololwa kwa muntu ku kyaka nansha ku bonakani. (Divilu 14:13, 14; Bilongwa 27:20) Divule dine, bino bishima bifunkilanga pa kukūlwa ku bubi. (Mateo 1:21) Nansha lufu byolutambile ku bubi, ino bantu bakūlwe ku bubi badi na lukulupilo lwa kwikala’ko nyeke.—Yoano 3:16, 17. a
Le i dishinda’ka dya lupandilo?
Pa kumona lupandilo, ufwaninwe kwikala na lwitabijo mudi Yesu ne kulombola’lo na kukōkela mbila yandi.—Bilongwa 4:10, 12; Loma 10:9, 10; Bahebelu 5:9.
Bible unena’mba, bilomba kwingila, nansha kulonga bintu na kikōkeji mwanda wa kulombola’mba lwitabijo lobe i lūmi. (Yakoba 2:24, 26) Inoko, ke kunenapo amba ye pobwanya kutambwila lupandilo. Alo i “kyabuntu kya Leza” kimanine pa “kanye ka ku buntu bitupu,” nansha bu “lusa.”—Efisesa 2:8, 9.
Le lupandilo lubwanya kukujimina?
En-en. Pamo’nka na muntu wasa kufwa pa mema ukokeja kuponena’po nansha kukidila’po monka, muntu upandijibwe ku bubi nandi mo monka shi akomenwe kulombola lwitabijo ubwanya kujimija lupandilo. Pa buno bubinga, Bible ulombola bene Kidishitu batambwile lupandilo balwe “bulwi bukatampe pa mwanda wa lwitabijo.” (Yude 3) Kadi udyumuna boba bakūdilwe amba: “Mwielelei’ko nyeke mufikijije lupandilo lwenu na moyo ne luzakalo ponka.”—Fidipai 2:12.
Le Mupandiji I Ani—I Leza’ni I Yesu?
Bible utela Leza bu nsulo mine ya lupandilo, na kumutela divule bu “Umpandiji.” (1 Samwele 10:19; Isaya 43:11; Tetusa 2:10; Yude 25) Kadi Leza wāingidije bantu palapala mwanda wa kunyongolola muzo wa kala wa Isalela, nabo i batelwe mu Bible bu “bapandiji.” (Nehemia 9:27; Batyibi 3:9, 15; 2 Balopwe 13:5) b Mu muswelo umo onka, tamba’tu Leza uleta lupandilo kupityila ku kinkūlwa kya kitapwa kya Yesu Kidishitu, Bible utelanga Yesu bu “Umpadiji.”—Bilongwa 5:31; Tetusa 1:4. c
Le bantu bonso bakapandanga?
Aa, bantu bamo kebakapandengapo. (2 Tesalonika 1:9) Pobāipangwile Yesu amba, “Le bakapanda i batyetye?” wālondolwele amba: “Mwielelei’ko bininge pa kutwelela pa kakibelo katyetye, mwanda nemulombola’mba, bavule bakakimba kutwela ino kebakabwanyapo.”—Luka 13:23, 24.
Milangwe ya bubela bwa’mba bantu bonso bakapandanga
Bubela: Kodinda wa kamo 15:22 ufundija’mba bantu bonso bakapandanga na kunena’mba “mudi Kidishitu namo mo monka, bonso bakapebwa būmi.”
Bubine: Myanda idi mu uno vese isambilanga pa lusangukilo. (1 Kodinda 15:12, 13, 20, 21, 35) Nanshi musemwa unena’mba “mudi Kidishitu namo mo monka, bonso bakapebwa būmi” ushintulula’tu amba bonso bakasangulwa bakapebwa dino dyese kupityila padi Yesu Kidishitu.—Yoano 11:25.
Bubela: Tetusa 2:11 ufundija’mba bantu bonso bakapandanga na kunena’mba Leza waleta “lupandilo ku bantu bonso.”—Dibuku Dijila.
Bubine: Kishima kya Kingidiki kyalamwinwe bu “bonso” mu uno vese kibwanya kufunkila pa “miswelo yonso nansha miswelo palapala.” d Nanshi mwivwanino muyampe wa Tetusa 2:11 i wa’mba Leza uletanga lupandilo ku bantu ba miswelo yonso, kubadila’mo ne bantu “batambile mu mizo yonso ne bisaka ne bantu ne ndimi.”—Kusokwelwa 7:9, 10.
Bubela: Petelo wa bubidi 3:9 ufundija’mba bantu bonso bakapandanga na kunena’mba Leza “kasakilepo muntu koneka, aa.”
Bubine: Leza usakanga bantu bapande, inoko kebaningilangapo betabije mpango yandi ya lupandilo. Dyandi “difuku dya butyibi” dikaleta “konakanibwa kwa bantu bampikwa bwine Leza.”—2 Petelo 3:7.
a Nansha lupandilo lwa ku bubi ne lufu bidi’ko dyalelo byo kelwafikile, Bible utela bantu bu ‘bapandijibwe.’—Efisesa 2:5; Loma 13:11.
b Mu ano mavese atelwa’a, malamuni amo a Bible engidijanga bishima pamo bwa “bingwa,” “munyongolodi,” “wampikwa mambo,” “mwendeji,” nansha’tu “muntu” pa kyaba kya bu “umpandiji.” Inoko, mu bilembwa bibajinjibajinji bya Kihebelu bya Bible, kino kishima kimo kyonka i kingidijibwe pa bano bapandiji ba bantu’nka na mokingidijibwe mu Bible ponso pokifunkila padi Yehova Leza bu Umpandiji.—Ñimbo ya Mitōto 7:10.
c Dijina Yesu i ditambe ku dijina dya Kihebelu Yehohshua, dine dishintulula’mba “Yehova I Umpandiji.”
d Tala dibuku dishintulula bishima dya mu Angele (Vine’s Complete Expository Dictionary of Old and New Testament Words). Kino kishima kimo kyonka kya Kingidiki kitanwa ne mu Mateo 5:11, mwine munena Yesu amba bantu bakanenena balondi bandi bintu bibi “bya miswelo yonso.” Dibuku Dijila.
Tala'po Bidi ne Bino:
BIPANGUJO BYA MU BIBLE BILONDOLWELWE
Le Kitapwa kya Yesu I “Kinkūlwa kya Bavule Bene” Muswelo’ka?
Le kinkūlwa i kitukūle ku bubi muswelo’ka?
BIPANGUJO BYA MU BIBLE BILONDOLWELWE
Le Bible Ufundija’mba, ‘Kukūlwa, I Kukūlwa Lonsololo’?
Yesu wāletele kyelekejo kilondolola kino kipangujo.
BIPANGUJO BYA MU BIBLE BILONDOLWELWE
Le pa Kupanda Bilomba Kwitabija Mudi Yesu Kubapu?
Bible utela bantu bamo bāitabije mudi Yesu ino kebakapandepo. Le bibwanika’tu namani?
ESSENTIAL BIBLE TEACHINGS
Mwanda Waka Yesu Wāfwile?
Bible ulombolanga mvubu mikatampe ya lufu lwa Yesu. Le lufu lwandi lwādi na kitungo?
LE ANO MAVESE A MU BIBLE ASHINTULULA BIKA?
Bene Loma 10:13 Washintululwa—“Muntu Yense Ukabija Vidye Mukulu Ukapanda”
Leza i mupe bantu bonso mukenga wa kukapanda ne kukamona būmi bwa nyeke, ekale i ba mu ntanda’ka, ba lukoba’ka, nansha shi i bapebwe bulēme’ka mu kibundi.
