Bashayuka badi na bubinga bwa kwitabijija’mba Yesu wādi’ko. Pa mwanda wa mabuku alupwilwe na balembi ba mānga ba tamba mu myaka katwa kabajinji kutūla ku myaka katwa ka bubidi, dibuku dimo (the Encyclopædia Britannica) dya mu 2002 dinena’mba: “Ayo nsekununi ingi ilombola’mba mu kitatyi kya kala, nansha ke balwana na bwine Kidishitu bene kebādipo batatana nansha patyetye amba Yesu i muntu wādi’ko binebine, lupata lubi lwine lwāshilwile musunsa mubajinji ku mfulo kwa myaka katwa ka 18, mu myaka katwa ka 19, ne ku ngalwilo kwa myaka katwa ka 20.”

 Mu 2006, dibuku Yesu ne Bwifundi bwa Bintu bya Kishiyekulu dyanenene amba: “I kutupu shayuka nansha umo mutumbe dyalelo upatana’mba Muyuda witwa bu Yesu mwanā Yosefa kāikele’kopo, bavule betabijanga lubilo lonka’mba pano tuyukile nsekununi mivule itala bilongwa byandi ne bufundiji bwandi.”

 Bible ulombola’mba Yesu i muntu udi’ko bine. Utelanga majina a bankambo wandi ne a bambutwile bandi ba pabwipi. (Mateo 1:1; 13:55) Kadi utela ne majina a balopwe batumbe bāikele’ko mu mafuku a Yesu. (Luka 3:1, 2) Bino bintu byakweshe bakimbi babandaule senene bubinebine bwa mānga ya mu Bible.