Bubi i kilongwa kyo-kyonso, mwiivwanino, nansha milangwe ijilula misoñanya ya Leza. Mubadilwa ne kutyumuna bijila bya Leza na kulonga bintu bibi, nansha byampikwa kõloka ku meso a Leza. (1 Yoano 3:4; 5:17) Bible wisambila ne pa bubi bwa kutupa, ko kunena’mba kukomenwa kulonga kyoloke.—Yakoba 4:17.

 Mu ndimi mibajinjibajinji yālembelwe’mo Bible, bishima byalamwinwe bu bubi bishintulula “kutupa mu kintu,” nansha mu kitondo. Kimfwa, kibumbo kya basala ba mu Isalela wa kala, bādi babwanya kwasa dibwe dya mu topito mu kintu “pampikwa kutupa.” Kishima pa kishima, bino binenwa byādi bibwanya kwalamunwa’mba “kebādipo balonga bubi.” (Batyibi 20:16) Mu uno muswelo, kulonga bubi i kutupa mu kintu, ko kunena’mba mu misoñanya mibwaninine ya Leza.

 Leza byadi Umpangi, aye udi na lupusa lwa kutūdila bantu misoñanya. (Kusokwelwa 4:11) Tukeshintulwilanga kwadi pa bilongwa byotulonga.—Bene Loma 14:12.

Le bibwanika kuleka kulonga bubi?

 Aa. Bible unena’mba, “bonso i bapye mambo kadi kebafikilangapo pa ntumbo ya Leza.” (Bene Loma 3:23; 1 Balopwe 8:46; Musapudi 7:20; 1 Yoano 1:8) I kika kinenenwa namino?

 Bantu babajinji, ba Adama ne Eva, kebādipo na bubi ku ngalwilo. Ke-pantu bāpangilwe babwaninine, mu kyelekejo kya Leza. (Ngalwilo 1:27) Inoko, bātombokēle Leza, bājimija kubwaninina kwabo. (Ngalwilo 3:5, 6, 17-19) Byobābutwile bana, bebāpyanikile bubi ne kubulwa kubwaninina. (Bene Loma 5:12) Monka mwānenene’kyo Mulopwe Davida amba: “Nabutwilwe na mambo.”—Ñimbo ya Mitōto 51:5.

Lelo kudi bubi bumo butabukile bubi bukwabo?

 En-en. Kimfwa, Bible unena’mba bantu ba mu Sodoma wa kala bādi “babi, babipya-mambo ba mu meso fututu,” bubi bwabo bwādi “bukatampe bya mwiko.” (Ngalwilo 13:13; 18:20) Tala bintu bisatu bilombola’mba bubi i bukatampe nansha bukatampe bininge.

1.   Bukatampe. Bible witudyumuna tuleke kulonga bubi bukatampe pamo bwa busekese, butōtyi bwa bilezaleza, bwivi, bunkolwankolwa, manyengenyenge, butapani, ne majende. (1 Bene Kodinda 6:9-11; Kusokwelwa 21:8) Bible ushiyañanya buno bubi na bubi bulongelwe pampikwa kulanga, pampikwa kusaka, kimfwa, binenwa nansha bilongwa bisanshija bakwetu. (Nkindi 12:18; Bene Efisesa 4:31, 32) Inoko, Bible witukankamika tuleke kupēlula bubi nansha bumo, mwanda bubwanya kutwala ku kujilula kukatampe kwa bijila bya Leza.—Mateo 5:27, 28.

2.   Kyalongelwa’bo. Bubi bumo buloñwanga na bantu kebayukilepo bine bisaka Leza. (Bilongwa 17:30; 1 Temote 1:13) Nansha Bible byakabingijapo buno bubi, ino wibushiyañanya na bubi bwa kutyumuna bijila bya Leza ku kusaka. (Umbadilo 15:30, 31) Bubi bwa ku kusaka butambanga ku ‘mutyima mubi’—Yelemia 16:12.

3.   Misunsa. Kadi Bible ushiyañanya kulonga bubi na kulongalonga bubi mu kitatyi kilampe. (1 Yoano 3:4-8) Boba ‘balongalonga bubi ku kusaka,’ nansha ke pa kupwa kwifunda kulonga byoloke, butyibi bubi bwa Leza bwibatengēle.—Bahebelu 10:26, 27.

 Boba balongele bubi bukatampe babwanya kulēmenenwa na bilubo byabo. Kimfwa, Mulopwe Davida wālembele amba: “Bilubo byami bibampite mutwe; pamo bwa kiselwa kilēma, bibampityila bungi pa kusela.” (Ñimbo ya Mitōto 38:4) Inoko Bible uleta lukulupilo amba: “Mubi aleke dishinda dyandi nonga-bibi nandi milangwe yandi; ajokele kudi Yehova, mwine ukamufwila lusa, kudi Leza wetu, mwanda ukalekela bya binebine.”—Isaya 55:7.