Leza ubwanya kumona kintu kyonso ne kulonga kintu konso kwasaka. (Nkindi 15:3; Bahebelu 4:13) Bible kafundijangapo amba Leza udi konso mu kintu kyonso. Inoko, ulombola’mba aye i muntu udi’ko ne amba udi ne kwaikalanga.

•   Mwikadile Leza: Leza udi na mwikadilo wa mushipiditu. (Yoano 4:24) Kabwanyapo kumonwa na bantu. (Yoano 1:18) Bimonwa bidi’mo Leza bilembelwe mu Bible bimumwekejanga nyeke bu muntu ushikete mu kifuko kampanda. Kalombolwangapo nansha dimo bu muntu udi konso.​—Isaya 6:1, 2; Kusokwelwa 4:2, 3, 8.

•   Kīkalo kya Leza: Leza udi mu kīkalo kya ku mushipiditu, kishīle na kya bipangwa bya ngitu. Ne kino kīkalo kya Leza i ‘kīkalo kya momwa mūlu.’ (1 Balopwe 8:30) Bible utela ne difuku dimo dyātwelele bipangwa bya ku mushipiditu “kukemana ku meso a Yehova,” a kintu kilombola’mba Leza udi na kifuko kyashikete’po kipotoloke.​—Yoba 1:6.

Shi kadipo mu kintu kyonso, le bine ubwanya kunta mutyima ne ami?

 En-en. Leza utanga bininge mutyima ku bantu. Nansha byadi mu kīkalo kya ku mushipiditu, Leza utalanga ne bantu pano pa ntanda basaka kumusangaja bya binebine, kadi wibakwashanga. (1 Balopwe 8:39; 2 Bilongwa bya Mafuku 16:9) Tala Yehova mwatelanga mutyima batōtyi bandi ba binebine:

•   Polombela: Yehova ubwanya kuteja milombelo yobe kitatyi kyolombela.​—2 Bilongwa bya Mafuku 18:31.

•   Potyumukilwe mutyima: “Yehova udi pabwipi na boba ba mityima mityumuke; upandijanga boba ba mushipiditu musonsakane.”​—Ñimbo ya Mitōto 34:18.

•   Posakilwa bwendeji: Yehova ukakupa “bujinguludi ne kukufundija” kupityila ku Kinenwa kyandi, Bible.—Ñimbo ya Mitōto 32:8.

Milangwe mifwe itala kwikala’po kwa Leza mu kintu kyonso

 Milangwe mifwe: Ñimbo ya Mitōto 139:8 ifundija amba Leza udi konso poinena’mba: “Shi nkande mūlu, udi’mo, kadi shi ngale butanda bwami mu Kibundu, tala! abe udi monka.”

 Bubine: Kino kisonekwa kekīsambilangapo pa kifuko kishikete’ko Leza, mhm. Ino kifundija mu muneneno wa lulumbi amba, kekudipo kifuko kikomenwa Leza kufika’ko mwanda wa kwitukwasha.