En-en. Ino misoñanya ya mu Bible ibwanya kwimukwasha shi mudi na makambakano a lupeto ne mapu:

1.   Pangikai lupeto lwa kwingidija. “Mpango ya muntu wa kininga bine ikendeka, ino boba bonso ba kampeja-bukidi bine bakafula ku bulanda.” (Nkindi 21:5) Kemwakepangilai kupota kintu mwanda’po’tu bekipotejanga. Pangikai lupeto lwa kwigidija kadi londai byobya byomupangikile.

2.   Lekai kwapula kyapuleapule. “Yewa wapula i umpika wa yewa wapuja” (Nkindi 22:7) Shi mudi kala na mapu ne kemubwanyapo kwaluja’o, longai bukomo bwa kwisamba na boba bomwapwile pa mwa kwibafutyila. Kemwakītyobolai. Ingidijai madingi a mu Bible esambila pa muntu utūla kyeya kya mapu, kupwa waapula, a amba: “Enda uketyepeje ne kwisāshila mukwenu bukidi bonka. Kokaleka meso obe alāle tulo, nansha bikopelo byobe kukunuka.” (Nkindi 6:1-5) Ekale shi dibajinji kebyendekelepo, banwe kemwakakokai.

3.   Tūlai lupeto pa kyalo kyaba. “Muntu wabilaabila upēlakananga mwanda wa bupeta pampikwa kuyuka’mba bulanda bukamupeta.” (Nkindi 28:22) Kwabila ne makomwa-meso bibwanya kutwala muntu ku bulanda ne kumulengeja elwe bintu bya ku mushipiditu.

4.   Sangelai byomudi nabyo. “Shi tudi na byakudya ne bya kuvwala, tukasangela bino bintu.” (1 Temote 6:8) Muntu kabwanyapo kwikala na nsangaji nansha kusangela byadi nabyo mwanda’po’tu udi na lupeto. Bantu bamo ba nsangaji kutabuka mu ntanda, kebadipo na lupeto luvule. Kyobadi nakyo i enka buswe bwibasenswe kyabo kisaka, balunda nabo ne kipwano kyabo na Leza.​—Nkindi 15:17; 1 Petelo 5:6, 7.