Lelo Leza Udi na Majina Anga?

VUMIJA MU

Bilondolola Bible

Leza udi na dijina dya bunka dimo kete. Dilembwanga mu Kihebelu bu יהוה kadi dyalamunwanga nyeke mu Kiluba bu “Yehova.” a Leza wānenene kupityila kudi Isaya mupolofeto wandi amba: “Ami ne Yehova. Dyo dyami dijina.” (Isaya 42:8) Dino dijina ditanwa mu bilembwa bya kala bya Bible kintu kya misunsa 7 000—ditanwa’mo misunsa mivule kupita kishima kyo-kyonso kityilwa’po Leza nansha ke dijina dya muntu mukwabo ye-yense. b

Lelo Yehova udi na majina makwabo?

Nansha Bible byatela Leza pa dijina dimo dya bunka, ino umutelelanga ne pa bitenta bivule ne nshintulwilo yabyo. Tala bitenta bimo ne nshintulwilo yabyo bilombola ngikadila ya Yehova nansha bumuntu bwandi.

Kitenta	Kisonekwa	Nshintulwilo
Allah	(Kutupu kisonekwa)	Kishima “Allah” i kitambe ku Kyalabu, ke dijinapo, ino i kitenta kishintulula’mba “Leza.” Malamuni a Bible a mu Kyalabu ne a mu ndimi mikwabo i malamune kishima “Leza” bu “Allah.”
Mwinē Bukomo Bonso	Ngalwilo 17:1	Udi na bukomo kebupeteka. Kishima kya Kihebelu El Shaddai, “Leza Mwinē Bukomo Bonso,” kitanwa mu Bible misunsa isamba-ibidi.
Alefa ne Omeka	Kusokwelwa 1:8; 21:6; 22:13	Bishima “mubajinji ne wa mfulo,” nansha “ngalwilo ne mfulo” bishintulula’mba kumeso kwa Yehova, kekwādipo Leza Mwinē Bukomo Bonso, kadi kupwa aye kekukekalapo mukwabo. (Isaya 43:10) Alefa ne Omeka i masomo a mu alufabe ya Kingidiki, dibajinji ne dya mfulo.
Mukulu wa Mafuku	Danyele 7:9, 13, 22	Kadipo na ngalwilo; wādi’ko nyeke tamba kala kumeso kwa muntu nansha kintu kyo-kyonso kwikala’ko.—Ñimbo ya Mitōto 90:2.
Mupangi	Isaya 40:28	Wāpangile bintu byonso.
Tata	Mateo 6:9	Mwine upāna būmi.
Leza	Ngalwilo 1:1	Ufwaninwe kutōtwa; Muntu wa bukomo. Kishima kya Kihebelu Elohim kidi mu buvule, kilombola bukatampe, bulēme, ne kutabuka bulēme kwa Yehova.
Leza wa baleza	Kupituluka mu Bijila 10:17	Leza udi peulu, mwishile na “baleza ba bitupu” bobatōta kudi bantu bamo.—Isaya 2:8.
Mufundiji Mukatakata	Isaya 30:20, 21	Uletanga bufundiji ne buludiki bwa kamweno.—Isaya 48:17, 18.
Mulongi Mukatakata	Ñimbo ya Mitōto 149:2	Wāpangile bintu byonso.—Kusokwelwa 4:11.
Leza wa Nsangaji	1 Temote 1:11	Udi nyeke na nsangaji ne kuloelelwa.—Ñimbo ya Mitōto 104:31.
Mwine wivwananga milombelo	Ñimbo ya Mitōto 65:2	Wivwananga aye mwine milombelo ya muntu ense umulomba na lwitabijo.
Ami Ngidi Enka Aye Udi	Divilu 3:14, Mukanda Ukola	Wikalanga byonso byasaka kwikala mwanda wa kufikidija mpango yandi. Uno musemwa i mwalamunwe ne amba “Nkekalanga kyonso kyonsaka” nansha’mba “Nkekalanga Kyokya Kyontonga Kwikala.” (The Emphasised Bible, na Rotherham; Bwalamuni bwa Ntanda Mipya) Uno mwityilo ukwashanga pa kushintulula dijina dya bunka, Yehova, ditelelwe mu vese ulonda’ko.—Divilu 3:15.
Mukao	Divilu 34:14, Mukanda Ukola	Kasakengapo kwiabila butōtyi. Kadi kino kishima i kyalamunwe amba “kasakangapo muntu kwitāka nandi” ne amba “uyukene amba usakanga kulamatwa bunka.”—Bible Kinenwa kya Leza; Bwalamuni bwa Ntanda Mipya.
Mulopwe wa nyeke ne nyeke	Kusokwelwa 15:3	Bulopwe bwandi kebudipo na ngalwilo nansha na mfulo.
Mfumwetu	Ñimbo ya Mitōto 135:5	Mwine’kyo nansha mfumu; mu Kihebelu Adhohn ne Adhonim.
Mfumwetu wa bibumbo, Mfumwetu wa Sabaote	Isaya 1:9, Mukanda Ukola; Bene Loma 9:29, Mukanda Ukola	Mwendeji wa bibumbo bikatampe bya bamwikeulu. Kitenta “Mfumwetu wa Sabaote” kibwanya ne kwalamunwa bu “Yehova wa bibumbo” ne bu “Mfumwetu wa bibumbo [bya mūlu].”—Bene Loma 9:29, Bwalamuni bwa Ntanda Mipya; NET Bible, kunshi kwa dyani.
Mwine wa Peulu Mwine	Ñimbo ya Mitōto 47:2	Udi na kitenta kya peulu bininge.
Mwine Ujila Nakampata	Nkindi 9:10	Ujila bininge (wampikwa disubi kadi utōka) kutabuka muntu e-ense.
Umbumbi	Isaya 64:8	Udi na lupusa pa bantu ne pa mizo, enka na mwikadilanga umbumbi na lupusa pa dilongo.—Bene Loma 9:20, 21.
Mukūdi	Isaya 41:14	I mukūle nansha kunyongolola bantu ku bubi ne lufu kupityila ku kitapwa kya kinkūlwa kya Yesu Kidishitu.—Yoano 3:16.
Dibwe	Ñimbo ya Mitōto 18:2, 46	Kinyemeno kya mutyima-ntenke kadi nsulo ya lupandilo.
Umpandiji	Isaya 45:21	Unyongololanga bantu ku kyaka nansha ku bonakani.
Mukumbi	Ñimbo ya Mitōto 23:1	Utele batōtyi bandi mutyima.
Mfumu Mwinē Lupusa Lonso	Ngalwilo 15:2	Udi na lupusa lukatampe; mu Kihebelu Adhonai.
Mwine Mukatakata Mwine	Danyele 7:18, 27	Mfumu wa peulu bininge

Majina a bifuko mu Bisonekwa bya Kihebelu

Majina a bifuko bimo bitelelwe mu Bible i metyange na dijina dya Leza dya bunka, ino ke majinapo makwabo a Leza.

Dijina dya kifuko	Kisonekwa	Nshintulwilo
Yehova-Yile	Ngalwilo 22:13, 14	“Yehova Ukaletanga”
Yehova-Nisi	Divilu 17:15	“Yehova I Mutyi Wami wa Kiyukeno,” nansha’mba “lwembela lwami.” (Today’s New International Version) Yehova i Leza obabwanya kukulupila kudi bantu bandi amba ukebakinga ne kwibakwasha.—Divilu 17:13-16.
Yehova-Shalome	Batyibi 6:23, 24	“Yehova I Ndoe.”
Yehova-Shama	Ezekyele 48:35, kunshi kwa dyani, American Standard Version	“Yehova Udi’mo.”

Bubinga bwa kuyukila dijina dya Leza ne kwiditela

Leza umwene na mvubu dijina dyandi dya bunka, Yehova, mwanda i mwidilembeje mu Bible misunsa tununu ne tununu.—Malaki 1:11.
Yesu Mwanā Leza, wālombwele misunsa mivule amba dijina dya Leza didi na mvubu. Kimfwa, wālombēle kudi Yehova amba: “Dijina dyobe dipandulwe.”—Mateo 6:9; Yoano 17:6.
Boba bayuka dijina dya Leza ne kwiditela batabulanga matabula mabajinji a kupwana na Yehova. (Ñimbo ya Mitōto 9:10; Malaki 3:16) Kino kipwano kibakwashanga bamwene mu mulao wa Leza wa amba: “Aye byaunsenswe kisanso kikatampe, nkamukūlanga. Nkamukiñanga mwanda uyukile dijina dyami.”—Ñimbo ya Mitōto 91:14.
Bible unena’mba: “Shi kudi betwa bu baleza, shi mūlu shi panshi, monka mokwikadile ‘baleza’ bangibangi ne ‘bamfumu’ bangibangi.” (1 Bene Kodinda 8:5, 6) Kadi utela patōkelela dijina dya Leza umo kete wa bine, Yehova.—Ñimbo ya Mitōto 83:18.

a Befundi bamo ba Kihebelu basangelanga kwalamuna dijina dya Leza bu “Yawe.”

b Dijina dya Leza mu kīpi i “Yah,” kadi ditanwa mu Bible kintu kya misunsa 50, kubadila’mo ne podilungilwe ku kishima “Aleluya,” kine kishintulula’mba “Tendelai Yah.”—Kusokwelwa 19:1.