Yesu wāfwile mwanda wa bantu balekelwe bubi bwabo ne kupebwa būmi bwampikwa mfulo. (Bene Loma 6:23; Bene Efisesa 1:7) Kadi lufu lwa Yesu lwālombwele amba muntu ubwanya kwikala nyeke na kikōkeji kudi Leza, nansha shi watanwa na matompo makomo namani.​—Bahebelu 4:15.

 Tala lufu lwa muntu umo molwāfikidije kino.

1.   Yesu wāfwile mwanda wa “kulekelwa kwa bubi bwetu.”​—Bene Kolose 1:14.

    Adama muntu mubajinji, wāpangilwe mubwaninine, wampikwa bubi. Inoko wālekele kukōkela Leza. Kubulwa kikōkeji kwa Adama, nansha bubi, bwātwelele bininge mu bandi bana bonso. Bible ushintulula’mba ‘kubulwa kikōkeji kwa muntu umo kwālengeje bavule ke babipya-mambo.’​—Bene Loma 5:19.

    Yesu nandi wādi mubwaninine, ino kālongelepo bubi nansha dimo. O mwanda wādi na bubinga bwa kwikala bu “kitapwa kya kupūta bubi bwetu.” (1 Yoano 2:2, kunshi kwa dyani) Monka mobāsambulwidile bantu bubi kudi Adama pa mwanda wa kubulwa kikokeji kwandi, lufu lwa Yesu nalo lwātalwile bubi bwa bantu bonso balombola lwitabijo mwadi.

    Mu uno muswelo, Adama udi pamo bwa aye wāpoteje muzo wa muntu ku bubi. Yesu pa kwitabija kufwa pa kyetu kyaba, wāpotele muzo wa muntu. O mwanda “shi muntu walonga bubi, tudi na mukwashi udi kudi Tata, Yesu Kidishitu, muntu moloke.”​—1 Yoano 2:1.

2.   Yesu wānenene’mba “amba ense ulombola lwitabijo mudi aye kakyonakanibwa, ino amone būmi bwa nyeke.”​—Yoano 3:16

    Nansha Adama byaāpangilwe mwanda wa kwikala’ko nyeke, bubi bwandi bwāmuletele mpalo ya lufu. Pa mwanda wa Adama, “[bubi bwātwelele] mu ino ntanda . . . kupityila ku bubi, mo mwasambakenine ne lufu ku bantu bonso mwanda bonso balongele bubi.”​—Bene Loma 5:12.

    Inoko, lufu lwa Yesu kelwātalwilepo enka bubi, ino i ne mfuto ya lufu ku bantu bonso balombola lwitabijo mwadi. Bible wipipija myanda uno muswelo: “Monka mwābikadile bubi bulopwe pamo na lufu, mo monka musa kubikela kanye ka ku buntu bitupu bulopwe kupityila ku boloke butwala ku būmi bwa nyeke kupityila kudi Yesu Kidishitu Mfumwetu.”​—Bene Loma 5:21.

    Shako būmi bwa bantu dyalelo bukidi bwipi. Inoko, Leza i mulaye amba ukapa bantu boloke būmi bwa nyeke ne kusangula bafwile amba nabo bamwene mu kitapwa kya lufu lwa Yesu.​—Ñimbo ya Mitōto 37:29; 1 Bene Kodinda 15:22.

3.   Yesu “[waikēle] na kikōkeji kufika ne ku lufu,” kintu kilombola’mba bantu babwanya kwikala na kikōkeji kudi Leza mu matompo nansha mu makambakano o-onso.​—Bene Fidipai 2:8.

    Nansha byaādi na ñeni ne umbidi mubwaninine, Adama wātombokēle Leza mwanda wākimbile na kwisakila kintu kekyādipo kyandi. (Ngalwilo 2:16, 17; 3:6) Satana, walwana mukatampe wa Leza, wānenene amba i kutupu muntu ubwanya kukōkela Leza pampikwa kwisakila, nakampata shi būmi bwandi budi mu kyaka. (Yoba 2:4) Inoko, Yesu muntu mubwaninine wākōkele Leza ne kumulamata nyeke, nansha ke paādi ufwa lufu lwa bumvu kadi lusansa. (Bahebelu 7:26) Kino kyāpwile mwanda: Amba muntu ubwanya kwikala nyeke na kikōkeji kudi Leza mu matompo nansha mu makambakano o-onso akokeja kumufikila.

Bipangujo bitala lufu lwa Yesu

•   Mwanda waka Yesu wādi ufwaninwe kususuka ne kufwa pa kukūla bantu? Mwanda waka Leza kātalwile’kopo mpalo ya lufu?

   Bijila bya Leza binena’mba, “mpalo ipala bubi i lufu.” (Bene Loma 6:23) Pa kyaba kya kufya Adama kino kijila, Leza wāmusapwidile amba mpalo ya kubulwa kikōkeji i lufu. (Ngalwilo 3:3) Adama paālongele bubi, Leza, “aye kabwanyapo kubepa,” wāfikidije binenwa byandi. (Tetusa 1:2) Adama wāsambulwidile bandi bana bubi ne mpalo ya bubi—ke Lufu kadi.

   Nansha bantu ba kubulwa kubwaninina byobafwaninwe mpalo ya lufu, Leza wēebalombwele “bupeta bwa kanye kandi ka ku buntu bitupu.” (Bene Efisesa 1:7) Mpango yandi ya kukūla bantu na kutuma Yesu bu kitapwa kibwaninine, yādi bine myoloke kadi ilombola lusa lukatampe.

•   Le Yesu wāfwile kitatyi’ka?

   Yesu wāfwile na “nsá ya kitema” pa kupwa kutamba kwa dyuba, nansha kubwipi kwa nsá ya busatu kyolwa kya Pashika ya Bayuda. (Mako 15:33-37, kunshi kwa dyani) Mu kalandadiye ka mu ano etu mafuku, dino difuku dyadi dikwatañene na Dya Butano, difuku 1 Kweji 4, 33 Y.M.

•   Le Yesu wāfwidile kwepi?

   Yesu bāmwipaīle “kokwa kwitwa bu Kifuko kya Kabamba ka Mutwe, kitwa mu Kihebelu bu Ngolongota.” (Yoano 19:17, 18) Kino kifuko kyādi “panja pa kibelo kya kibundi” kya Yelusalema mu mafuku a Yesu. (Bahebelu 13:12) Kyādi padi pa mukuna, mwanda Bible unena’mba bantu bamo “badi batadila kulampe” pobādi bepaya Yesu. (Mako 15:40) Inoko kifuko kitwa dyalelo bu Ngolongota kekiyukenepo biyampe.

•   Le Yesu wāfwile namani?

   Nansha bantu bavule byobakulupile amba Yesu bāmwipaile na kumupopa ku musalaba, aye Bible unena’mba “waselele bubi bwetu mu ngitu yandi aye mwine ku mutyi.” (1 Petelo 2:24) Balembi ba Bible bāingidije bishima bibidi bya Kingidiki pa kulombola kintu kine kyobāipaile’ko Yesu—stauros ne xylon. Bafundi bavule ba Bible bafudile ku kunena’mba, bino bishima bifunkila pa mulamba nansha mutyi moloke wampikwa dipanda.

•   Le lufu lwa Yesu lufwaninwe kuvulukwa namani?

   Bufuku, pa Pashika ya pa mwaka ya Bayuda, Yesu wālombwele balondi bandi muswelo upēla, wēbanena’mba: “Longai nyeke namino ke pa kumvulukila.” (1 Bene Kodinda 11:24) Mansá pa kupita’po, bāipaya Yesu.

   Balembi ba Bible bādingakenye Yesu na kana ka mukōko kobādi bela bu kitapwa pa Pashika. (1 Bene Kodinda 5:7) Masobo a Pashika monka moādi avulwija bene Isalela kunyongololwa kwabo mu bupika, Kivulukilo kya lufu lwa Yesu Kidishitu nakyo kivulujanga bene Kidishitu amba i banyongololwe ku bubi ne ku lufu. Pashika yādi ilongwa mu mafuku 14 Kweji wa Nisane mungya kalandadiye ka myeji ya mu Bible, ādi masobo a pa mwaka; bene Kidishitu babajinji nabo bādi balonga Kivulukilo musunsa umo pa mwaka.

   Mwaka ne mwaka, mu difuku dya kweji dikwatañene na mafuku 14 Kweji wa Nisane, bantu midiyo ne midiyo kujokoloka ntanda yonso bavulukanga lufu lwa Yesu.