Ñimbo ya Mitōto 18:1-50
Kudi mukulu wa bañomba. Lwimbwe na Davida mwingidi wa Yehova wasapwidile Yehova binenwa bya luno lwimbo mu difuku dyamukūdile Yehova mu kuboko kwa balwana nandi bonso ne mu kuboko kwa Solo. Wanena’mba:+
18 Nkusenswe kisanso kikatampe, a Yehova, bukomo bwami.+
2 Yehova i kidibwe kyami ne kifuko kyami kikomejibwe kadi i Aye unkūlanga.+
Leza wami i dibwe dyami,+ mwine monyemena,Ngabo yami ne disengo* dyami dya lupandilo,* kinyemeno kyami kya mutyima-ntenke.*+
3 Naite Yehova, mwine ufwaninwe kutendelwa,Kadi nsa kupandijibwa ku balwana nami.+
4 Myonji ya lufu yanjokolokele;+Milungu ya bantu ba bitupu yaikele kuntuyula.+
5 Myonji ya Kibundu* yanjokolokele;Makinga a lufu antene.+
6 Mu tusua twami naityile Yehova,Nadi ngabija’nka kwabija kudi Leza wami.
Aye mu tempelo yandi waivwana diwi dyami,+Ne kwabija konadi mwabija kwafika ku matwi andi.+
7 Penepo ntanda yashilula kutenkana ne kutetema;+Byalwilo bya ngulu byazakalaKadi byatenkanatenkana mwanda bamulobeje.+
8 Mwishi wadi umutamba mu myulu,Ne mudilo uloteja watamba mu kyakanwa kyandi;+Makala a mudilo adyendyemuka atamba kwadi.
9 Wafiyukija madiulu paadi utūka,+Kadi mfindi bwī yadi munshi mwa maulu andi.+
10 Wakandile pa kelubi kaiya wipapa.+Watūkila pa mapapa a mushipiditu.*+
11 Kupwa wepūta mfindi,+Imujokolokele pamo bwa mwemba,Mema afītuluka ne makumbi afīta fututu.+
12 Ku kitōkeji kidi ku meso andiMvula wa mabwe ne makala a mudilo byatambile mu makumbi.
13 Kupwa Yehova washilula kukungula mūlu;+Mwine wa Peulu Mwine walengeja diwi dyandi divwanwe+Na mabwe a mvula ne makala a mudilo.
14 Wasobola miketo yandi ne kwibapalakanya;+Waela mapeni andi, ne kwibela mu kavutakanya.+
15 Byalo bya minonga* byamweka;+Byalwilo bya ntanda byatūlwa patōka pa kufuninwa nobe, a Yehova,Pa kuvuma kwa umpuya wa mu myulu yobe.+
16 Waolola kuboko kwandi aye kūlu;Wankwata waungabula mu mema malamala.+
17 Waunkūla kudi walwana nami mukomo,+Kudi boba banshikilwe, badi bakomo kumpita.+
18 Bantambile’dyo mu difuku dya tusua twami,+Ino Yehova wankweshe.
19 Wantambije wantweja mu kifuko kilamwe senene;*Wankūdile mwanda waundoelelwe.+
20 Yehova umpalanga mungya boloke bwami;+Undubwilanga mungya kubulwa mambo* kwa makasa ami.+
21 Mwanda nalamine mashinda a Yehova,Kadi nkyalekelepo Leza wami ku nshikani.
22 Butyibi bwandi bonso budi ku meso ami;Nkikapēlulapo bitungo byandi.
23 Nkekalanga nyeke wampikwa kutopekwa ku meso andi,+Kadi nkelamanga ku kilubo.+
24 Yehova andubwile mungya boloke bwami,+Mungya kubulwa mambo kwa makasa ami ku meso andi.+
25 Kudi wa lulamato nobe wikalanga na lulamato;+Kudi wampikwa kutopekwa nobe uloñanga byampikwa kutopekwa;+
26 Kudi utōka nobe wimwekejanga bu utōka,+Ino kudi mukondame nobe wimwekejanga bu mukosoke.+
27 Mwanda upandijanga boba bapēlulwe,*+Ino utūkijanga boba bezunzula.*+
28 Mwanda i abe wakijanga kinanu kyami, a Yehova,Leza wami mwine umunikilanga mu mfindi.+
29 Na bukwashi bobe mbwanya kutamba kibumbo kya bañonaona bulwi;+Na bukomo bwa Leza mbwanya kukanda lubumbu.+
30 Dishinda dya Leza wa bine i dibwaninine;+Binenwa bya Yehova i bitōkejibwe tō.+
Aye i ngabo ku boba bonso banyemena mwadi.+
31 Mwanda, le i ani Leza shi ke’nkapo Yehova?+
Kadi le i ani dibwe mwene’nka Leza wetu?+
32 Leza wa bine ye umvwika bukomo,+Kadi ukalonga dishinda dyami dikale dibwaninine.+
33 Uloñanga maulu ami pamo bwa a kasha;Uñimikanga pa mitenta.+
34 Ufundijanga makasa ami divita;Maboko ami abwanya kukana buta bwa miketo bwa mukuba.
35 Ubaumpe ngabo yobe ya lupandilo,+Kuboko kobe kwa lundyo kunkwashanga,*Kadi kwityepeja kobe kubambaija.+
36 Ubabaija kashinda ka matabula ami;Maulu* ami keakashetemukapo.+
37 Nkalondalonda balwana nami kadi nkebapeta;Nkikajokapo enka ne byonebakubija.
38 Nkebavingakanya kutyina’mba bakalanguka;+Bakapona munshi mwa maulu ami.
39 Ukanumbila bukomo pa mwanda wa bulwi;Ukaponeja boba banshikilwe munshi mwami.+
40 Ukanyemeja balwana nami kondi;*Kadi nkafikija ku mfulo* boba banshikilwe.+
41 Babijanga, ino kekudipo wa kwibapandija;Badidilanga’nka ne Yehova, ino aye kwibalondolola mpika.
42 Nkebatwa bukulabukula pamo bwa luvumbi mu kivula;Nkebela panja pamo bwa bitoto mu bipito.
43 Ukankūla ku tuto tumboya bantu.+
Ukantūla bu mutwe wa mizo;+
Bantu bonkyayukilepo bakañingidila.+
44 Bakankōkela pa kwivwana’tu myanda bitupu;Beni bakāya kondi na moyo.+
45 Beni bakabulwa bukankamane;*Bakāya bazakala batamba mu bifuko byabo bikomejibwe.
46 Yehova i mūmi! Dibwe+ dyami ditendelwe!
Leza wa lupandilo lwami azunzulwe.+
47 Leza wa bine ulubulanga kinongo pa mwanda wami;+Unekenyanga bantu munshi mwami.
48 Aye unkūlanga ku balwana nami balobo;Untululanga pangala pa boba bantamba bulwi;+Umpandijanga ku muntu wa lūma.
49 O mwanda mwine nkakutumbijanga mu bukata bwa mizo, abe Yehova,+Kadi nkembilanga dijina dyobe mitendelo.*+
50 Aye ulongelanga mulopwe wandi bilongwa bikatampe bya lupandilo;*+Ulombolanga mushingwe māni wandi buswe bwa ndamatyidile,+Kudi Davida ne lutundu* lwandi nyeke ne nyeke.+
Kunshi kwa Dyani
^ Tala Nshintulwilo ya Bishima.
^ Nansha’mba “mupandiji wami mukomokomo.”
^ Nansha’mba “mutenta wa mutyima-ntenke.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Nansha’mba “luvula.”
^ Nansha “mikola ya mema.”
^ Nansha’mba “kifuko kikatampe.”
^ Kishima pa kishima i, “kutōka.”
^ Nansha’mba “kimonya-malwa.”
^ Kishima pa kishima i, “meso ezunzula.”
^ Nansha’mba “kunkwatakanyanga.”
^ Nansha’mba “Tumpo.”
^ Nansha’mba “Ukampa miongo ya balwana nami.”
^ Kishima pa kishima i, “nkatalaja.”
^ Nansha’mba “bakafumba.”
^ Nansha’mba “nkombanga minjiki.”
^ Nansha’mba “bushindañani bukatampe.”
^ Kishima pa kishima i, “lukunwa.”
