Bene Kodinda Umbajinji 7:1-40
7 Ino pa mwanda wa bintu byomwalembele, i kipite buya mwana-mulume aleke kutenga* mwana-mukaji;
2 inoko pa mwanda wa busekese* bwavula, nanshi mwana-mulume ense ekale na wandi mukaji+ ne mwana-mukaji ense nandi ekale na wandi mulume.+
3 Mulume ape mukajandi kyokya kimufwaninwe, mukaji nandi alongele monka kudi mulumyandi.+
4 Mukaji kadipo na lupusa pa umbidi wandi aye mwine, ino wandi mulume ye udi nalo; mo monka ne mulume nandi kadipo na lupusa pa umbidi wandi aye mwine, ino wandi mukaji ye udi nalo.
5 Kemwakīsuminwai banwe bene na bene poso mweivwanika banwe bonso mu kitatyi kitungwe, amba mwitūdile’ko kyaba kya kulombela kupwa mwetana pamo dikwabo, kutyina’mba Satana wakendelela kwimutompa pa mwanda wa kwenu kubulwa kwīfula.
6 Inoko, bino byonanena’bi mukokeja kwibilonda, ino ke kijilapo.
7 Ino nsaka bantu bonso longa badi mongikadile ami. Inoko muntu ne muntu udi na kyabuntu+ kyandi kya kwa Leza, umo nenki, mukwabo nandi nabya.
8 Pano nanena boba bampikwa kusonga nansha kusongwa ne bakaji ba kishala’mba, i kipite buya shi bashale mongikadile ami.+
9 Ino shi kebadipo na kwīfula, nabya basonge nansha kusongwa, mwanda i kipite buya kusonga kupita’ko kusōkwa mudilo na kilokoloko.+
10 Ku boba basonge ne basongwe nebalombola, ke amipo ino i Mfumwetu, amba mukaji kafwaninwepo kusansana na mulumyandi.+
11 Ino shi wasansana nandi, nabya ekale kusongwa mpika shi bitupu apwane monka na wandi mulume; kadi mulume kafwaninwepo kushiya mukajandi.+
12 Ino ku bakwabo nanena, eyo, i ami, ke Mfumwetupo+ amba: Shi mwanetu udi na mukaji wampikwa kwitabija ino mukaji uloelelwe kwikala nandi, kakamushiya;
13 kadi shi mwana-mukaji udi na mulume wampikwa kwitabija ino mulume uloelelwe kwikala nandi, kakashiya wandi mulume.
14 Mwanda mulume wampikwa kwitabija i mupandulwe pa mwanda wa mukaji, mukaji wampikwa kwitabija nandi i mupandulwe pa mwanda wa mwanetu; shi bitupu benu bana badi ba kwikala ba disubi, ino pano i bajila.
15 Ino shi yewa wampikwa kwitabija watonge kutaluka,* muleke ataluke; tutu nansha kaka kakutyilwepo mu yayo myanda, ino Leza aye wemwityile ku ndoe.+
16 Mwanda a mukaji, le uyuka namani shi ukapandija obe mulume?+ Nansha abe mulume nobe, le uyuka namani shi ukapandija obe mukaji?
17 Inoko, monka mwapedile Yehova* umo ne umo kyepelo, muntu ne muntu anangile monka mwamwityile Leza.+ Kadi naleta uno musoñanya mu bipwilo byonso.
18 Le kudi muntu wadi mutwele kala kwisao pawaityilwe?+ Nabya ekale na disao dyandi. Le kudi muntu waityilwe paadi wampikwa kutwela kwisao? Nabya kakitwela kwisao.+
19 Disao kedidipo na mvubu, ne kubulwa kutwela kwisao nako kekudipo na mvubu;+ ino kulama mbila ya Leza ko kudi na mvubu.+
20 Monka mwaityilwe muntu ne muntu, ashale’nka nabya.+
21 Lelo waityilwe powadi umpika? Kokalangalanga pa kino;+ ino shi ukokeja kwikala mwanapabo, nankyo kwatakanya wao mukenga.
22 Mwanda yewa ense waityilwe mudi Mfumwetu paadi umpika i mupebwe bwanapabo na Mfumwetu;+ mo monka ne yewa ense waityilwe paadi mwanapabo i umpika wa Kidishitu.
23 Mwapotelwe ku lupoto;+ lekai kwikala bapika ba bantu.
24 Banwe banabetu, monka mwaityilwe muntu ne muntu, ashale’nka nabya ku meso a Leza.
25 Ino pa mwanda wa bajike,* nkidipo na kijila nansha kimo kya kudi Mfumwetu, ino naleta mulangwe wami+ byondi muntu ufwidilwe lusa na Mfumwetu amba ngikale mukōkele.
26 O mwanda nalanga’mba i kipite buya muntu ekale’nka mwaikadile’mwa pa mwanda wa makambakano ano’a.
27 Lelo abe udi na mukaji? Leka kukimba kwinyongolola’mo.+ Lelo kudipo na mukaji? Leka kukimba mukaji.
28 Ino nansha shi ubasonge, kulongelepo bubi. Kadi shi mujike asonge nansha kusongwa, nabya nandi kalongelepo bubi. Inoko, boba basonga nansha kusongwa bakamonanga byamalwa mu ngitu yabo. Ino nsakanga kwimukinga.
29 Ne kadi, nanena namino, banwe banabetu, amba kitatyi kyashala’ko kibatyepa.+ Tamba pano, boba badi na bakaji bekale bwa abo kebadipo nabo,
30 kadi boba badila bekale bwa boba bampikwa kudila, kadi boba basangala bwa boba bampikwa kusangala, kadi boba bapota bwa boba kebadipo na kintu,
31 ne boba bengidija ino ntanda bwa boba kebengidija’yopo ne pa mfulo; mwanda mwikadila wa ino ntanda ushintanga.
32 I bine, nsakanga mwikale pampikwa kuzumbija mutyima. Mwana-mulume wampikwa kusonga uzumbijanga mutyima mwanda wa bintu bya Mfumwetu, mwa kusangeja Mfumwetu.
33 Ino mwana-mulume musonge uzumbijanga mutyima mwanda wa bintu bya ino ntanda,+ mwa kusangeja wandi mukaji,
34 kadi i mwiabanye. Pakwabo kadi, mwana-mukaji wampikwa kusongwa, ne mujike, uzumbijanga mutyima mwanda wa bintu bya Mfumwetu,+ amba ekale ujila mu umbidi wandi ne mu mushipiditu wandi. Inoko, mwana-mukaji musongwe uzumbijanga mutyima mwanda wa bintu bya ino ntanda, mwa kusangeja wandi mulume.
35 Ino nenanga bino’bi pa mwanda wa kamweno kenu, ke mwandapo wa kwimukankaja,* ino i mwanda wa kwimukankamikila ku kyokya kifwaninwe ne ku kwipāna kyaba kyonso kudi Mfumwetu pampikwa kupuakanibwa.
36 Ino shi kudi ulanga’mba wiendejanga byampikwa kwendela’mo na kwikala wampikwa kusonga nansha kusongwa,* kadi shi ke mupite pa kusongola, nabya bikale uno muswelo: Alonge mwasakila; kalongelepo bubi. Basonge nansha kusongwa.+
37 Ino shi muntu wasumininwa mu mutyima wandi ne kekudipo kyakimba, ino udi na lupusa pa kiswa-mutyima kyandi aye mwine ne watyibe butyibi mu mutyima wandi bwa kuleka kusonga,* nabya ukalonga biyampe.+
38 Kadi yewa ense usonga* walonga biyampe, ino yewa ense kasongele ukalonga biyampe kutabuka.+
39 Mukaji i mukutwe pakidi wandi mulume mūmi.+ Ino shi wandi mulume walāla mu tulo twa lufu, udi na bwanapabo bwa kusongwa na ense wasaka, enka mudi Mfumwetu kete.+
40 Ino mungya milangwe yami, ukekala na nsangaji kutabuka shi washala mwaikadile’mwa; kadi nanga na bubine amba nami ngidi na mushipiditu wa Leza.
Kunshi kwa Dyani
^ Ko kunena’mba, kusambakena pamo.
^ Kishima kya Kingidiki porneia mu buvule. Tala Nshintulwilo ya Bishima.
^ Nansha’mba “kusansana.”
^ Nansha’mba “boba kebasongele nansha kusongwa.”
^ Kishima pa kishima i, “kwimuta dikinga.”
^ Nansha’mba “na bujike bwandi.”
^ Nansha’mba “kulama bujike bwandi.”
^ Nansha’mba “upāna bujike bwandi mu busongi.”
