Bilongwa bya Mafuku Umbajinji 4:1-43
4 Bana ba Yuda i Peleze,+ Hezelone,+ Kalami, Hula,+ ne Shobalo.+
2 Leaya mwanā Shobalo wabutwile Yahate; Yahate nandi wabutula Ahumai ne Lahada. Bino byo bisaka bya bene Zolate.+
3 Bano’ba bo bana ba shandya Etame:+ Yezelele, Ishema, ne Idebasha (ne dijina dya mwanabo mwana-mukaji i Hazeleleponi),
4 Penuele nandi ye shandya Ngedole, Ezelu nandi ye shandya Husha. Bano’ba bo bana ba Hula+ mwana umbedi wa Efalata, kadi shandya Betelema.+
5 Ashula+ shandya Tekoa+ wadi na bakaji babidi, ba Hela ne Naala.
6 Naala wamubutwila Ahuzama, Hefele, Temeni, ne Hahashitadi. Bano’ba bo bana ba Naala.
7 Ino bana ba Hela i Zelete, Izala, ne Etanane.
8 Koze wabutula Anube, Zobeba, ne bisaka bya Ahalele mwanā Haluma.
9 Yabeze wadi mulēmekibwe kupita banababo; kadi inandi wamwinikile bu Yabeze,* kanena’mba: “Namubutula na bisanso.”
10 Yabeze waabija Leza wa Isalela amba: “Ngesele’po ne kubaija ntanda yami kadi kuboko kobe kwikale nami ne kundama ku byamalwa, kutyina’mba byakanonga bibi!” Ebiya Leza wamupa byaalombele.
11 Keluba mwanabo na Shuhā wabutwile Mehile, shandya Eshetone.
12 Eshetone nandi wabutula Bete-Lafa, Pasea, ne Tehina shandya Ile-Nahashi. Bano’ba bo bana-balume ba Lēka.
13 Bana ba Kenaza i Oteniele+ ne Selaya, mwanā* Oteniele nandi i Hatata.
14 Meonotai wabutula Ofela. Selaya nandi wabutula Yoabe shandya Nge-Halashimi,* baityilwe namino mwanda badi basendwe.
15 Bana ba Kalebu+ mwanā Yefune i Ilu, Elā, ne Nama; mwanā* Elā nandi i Kenaza.
16 Bana ba Yehalele i Zife, Zifa, Tidia, ne Asalele.
17 Bana ba Ezēla i Yetele, Melede, Efela, ne Yalone; aye* waimite wabutula Midiamu, Shamai, ne Ishiba shandya Eshetemoa.
18 (Wandi mukaji Muyuda wabutwile Yelede shandya Ngedole, Hebela shandya Soko, ne Yekutyele shandya Zanoa.) Bano’ba bo bana ba Bitia mwanā Felo mwana-mukaji, wasongelwe na Melede.
19 Bana ba mukaja Hodia, mwanabo na Nahama mwana-mukaji i bashandya Keila mwine Ngalami ne Eshetemoa mwine Makati.
20 Bana ba Shimone i Amenone, Dyina, Bene-Hanana, ne Tilone. Bana ba Ishi nabo i Zohete ne Bene-Zohete.
21 Bana ba Shela+ mwanā Yuda i Ela shandya Leka, Lada shandya Malesha, ne bisaka bya bengidi ba mbwija milumbuluke ba njibo ya Ashibea,
22 ne Yokima, bana-balume ba Kozeba, Yoashe, ne Salafa, boba baikele ke balume ba bana-bakaji bene Moabu, ne Yashubi-Leheme. Bino i bilembwa bya pa kala.*
23 Badi babumbi bashikete mu Netaimi ne mu Ngedela. Bashikete kwine’kwa bengidila mulopwe.
24 Bana ba Shimioni+ i Nemuele, Yamine, Yadibe, Zela, ne Shaulu.+
25 Shalumu i wandi mwana, Mibisamu wandi mwana, ne Mishema wandi mwana.
26 Ino bana ba Mishema i Hamwele wandi mwana, Zakula wandi mwana, Shimei wandi mwana.
27 Shimei wadi na bana bana-balume 16 ne bana-bakaji 6; ino banababo kebadipo na bana bavule, kadi mu byabo bisaka kemwadipo muntu wadi na bana bavule mwadi mwikadile nabo bantu ba Yuda.+
28 Badi bashikete mu Bela-Sheba,+ Molada,+ Hazala-Shuale,+
29 Bidiha, Ezeme,+ Tolada,
30 Betuele,+ Holama,+ Zikelake,+
31 Bete-Malakabote, Hazala-Shushimi,+ Bete-Bidi, ne mu Shalaimi. Bino byo byadi bibundi byabo kufika ne byabikele Davida.
32 Bīkalo byabo i Etame, Aine, Dimōne, Tokena, ne Ashana,+ bibundi bitano,
33 pamo ne bīkalo byabo byadi bijokolokele bino bibundi kufika ne ku Bāla. Ino yo yabo misuku yobadi babadilwa’mo ne bifuko byobadi bashikete’mo.
34 Kadi Meshobabe, Yameleke, Yosha mwanā Amazia,
35 Yoela, Yehu mwanā Yoshibia mwanā Selaya mwanā Ashiele,
36 ne Edioenai, Yaakoba, Yeshohaia, Asaya, Adyele, Yeshimiele, Benaya,
37 ne Ziza mwanā Shifi mwanā Alona mwanā Yedaia mwanā Shimidi mwanā Shemaia;
38 bano batelelwe majina bo badi bamfumu mu bisaka byabo, kadi ba mu njibo ya bakulutuba babo bavudile’ko bininge.
39 Baendele ku kibelo kya Ngedole, ku mutamba wa kutunduka kwa musanza, kukakimba madyo a luombe lwabo.
40 Mfulo mfulō batana madyo madimbile kadi mayampe, ne ntanda’ya yadi mikatampe, mudi nyā, yampikwa kukambakanibwa. Bantu bashikete’mo dibajinji i bene Hama.+
41 Bano batelelwe majina baile mu mafuku a Hezekia+ mulopwe wa Yuda kadi bapomwene mapema a bene Hama ne Meunime badi kwine’kwa. Bebonakenye fututu kufika ne dyalelo; ebiya bashikata mu kifuko kyabo mwanda ko kwadi madyo a luombe lwabo.
42 Bene Shimioni bamo, bana-balume 500, baendele ku Lūlu lwa Seila+ na Pelatia, Neadia, Lefaia, ne Uziele, bana ba Ishi badi bebatangidile.
43 Baonakenye bene Amaleke+ bashele’ko bapandile, nabo bashikete kwine’kwa kufika ne dyalelo.
Kunshi kwa Dyani
^ Dijina Yabeze padi diifwene na kishima kya Kihebelu kishintulula amba “masusu.”
^ Kishima pa kishima i, “bana ba.”
^ Ko kushintulula’mba “Musanza wa Basendwe.”
^ Kishima pa kishima i, “bana ba.”
^ Pakwabo kifunkila pa Bitia wa mu vese 18.
^ Nansha’mba “Binenwa bya kishi kya kala.”
