Samwele Umbajinji 7:1-17
7 Ebiya bantu ba Kidiata-Yeadimi baiya, baselela Sanduku wa Yehova mu njibo ya Abinadaba+ pa mukuna, kadi bapandula wandi mwana Eleaza mwanda wa kulama Sanduku wa Yehova.
2 Papityile kitatyi kilampe, myaka 20 mituntulu, tamba difuku dyafikile Sanduku mu Kidiata-Yeadimi, penepa njibo yonso ya Isalela yashilula kukimba* Yehova.+
3 Kupwa Samwele wanena njibo yonso ya Isalela amba: “Shi mujokelanga kudi Yehova na mutyima wenu onso,+ nankyo talulai mu bukata mwenu baleza ba kungi+ ne bankishi ba Ashetolete,+ kadi pai Yehova mityima yenu pampikwa kutatana, mwingidilei’nka aye kete,+ nandi ukemukūla ku kuboko kwa bene Fidishitia.”+
4 Penepo bene Isalela bafundula Babāla ne bankishi ba Ashetolete kebengidila’nka Yehova kete.+
5 Kupwa Samwele wanena’mba: “Kongakanyai Isalela ense pamo ku Mizipa,+ penepo nsa kwimulombelela kudi Yehova.”+
6 Ebiya bakongakena pamo ku Mizipa, bateka mema kebeapungulwila ku meso a Yehova kadi bashikilwa na nzala mu dine difuku’dya.+ Banena kwine’kwa amba: “Tubapi Yehova mambo.”+ Penepo Samwele washilula kwingila bu mutyibi+ wa bene Isalela ku Mizipa.
7 Bene Fidishitia pa kwivwana amba bene Isalela abekongela pamo ku Mizipa, bamfumu ba bene Fidishitia bakanda kukalwa na Isalela.+ Bene Isalela nabo pa kwivwana namino, bakwatwa moyo pa mwanda wa bene Fidishitia.
8 Ebiya bene Isalela banena Samwele amba: “Kokaleka kwabija Yehova Leza wetu etukwashe+ ne kwitupandija ku makasa a bene Fidishitia.”
9 Kupwa Samwele wayata kana ka mukōko kakyamwa wekalambula kudi Yehova bu kyamulambu kisōkwe+ kituntulu; kadi Samwele waabija Yehova akwashe Isalela, Yehova nandi wamulondolola.+
10 Samwele paadi ulambula kyamulambu kisōkwe, bene Fidishitia bafwena kulwa na Isalela. Penepo Yehova waleta mikungulo mikatampe+ pa bene Fidishitia mu dine difuku’dya, Webela mu kavutakanya,+ nabo banekenibwa ku meso a Isalela.+
11 Ebiya bantu ba Isalela batamba mu Mizipa balonda bene Fidishitia, bebepaya kufika ne kunshi kwa Bete-Kale.
12 Kupwa Samwele wayata dibwe+ weditūla pa bukata bwa Mizipa ne Yeshana, ebiya wedinika bu Ebenezele,* mwanda wanenene amba: “Kufika ne pano Yehova wetukwasha.”+
13 Ponkapo bene Fidishitia banekenibwa, kebailepo monka mu ntanda ya Isalela;+ kadi kuboko kwa Yehova kwalwa nyeke bene Fidishitia mu mafuku onso a Samwele.+
14 Kadi bibundi byobayete Isalela kudi bene Fidishitia byajokela kudi Isalela, tamba ku Ekalone kutūla ku Ngata, ebiya Isalela wanyongolola ntanda yabo ku makasa a bene Fidishitia.
Kadi kwadi ndoe pa bukata bwa Isalela ne bene Amole.+
15 Samwele watyibīle nyeke Isalela mambo mu būmi bwandi bonso.+
16 Mwaka ne mwaka wadi wenda upita mu Betele,+ mu Ngilengale,+ ne mu Mizipa,+ kadi watyibīle Isalela mambo mu bino bifuko byonso.
17 Ino wadi ujokela mu Lama,+ mwanda mo mwadi yandi njibo, kadi muno namo wadi utyibila’mo Isalela mambo. Waubakīle Yehova kisōkelo mwine’mwa.+
