Balopwe wa Bubidi 24:1-20
24 Mu mafuku a Yehoyakimi, Nebukaneza+ mulopwe wa Babiloni waiya kumutamba bulwi, penepo Yehoyakimi waikala mwingidi wandi myaka isatu. Inoko, wamwalamukīle watomboka.
2 Kupwa Yehova washilula kumutumina bibumbo bya bañonaona bya bene Kaladea,+ bene Shidea, bene Moabu, ne bene Amone. Wadi wibatuma’nka kwibatuma ku Yuda mwanda wa kumonakanya, mungya kinenwa kya Yehova+ kyaanenene kupityila kudi bengidi bandi bapolofeto.
3 Na bubine Yuda walongelwe kino mungya musoñanya wa Yehova, mwanda wa kwibatalula ku meso andi+ pangala pa bubi bonso bwalongele Manase,+
4 ne mashi ampikwa mambo awamwangile,+ mwanda wadingile Yelusalema na mashi ampikwa mambo, Yehova nandi kaitabijepo kumulekela.+
5 Myanda mikwabo ya mānga ya Yehoyakimi, byonso byaalongele, mwene i milembwe mu mukanda wa mānga ya bitatyi bya balopwe ba Yuda?+
6 Kupwa Yehoyakimi walādikwa mwanda wa kukōkolokwa na bakulutuba bandi;+ ebiya wandi mwana Yehoyakini wabikala pa kyandi kyaba.
7 Mulopwe wa Edipito katompelepo monka kutamba mu ntanda yandi, mwanda mulopwe wa Babiloni waselele bintu byonso bya mulopwe wa Edipito,+ tamba ku Kinekaneka* kya Edipito+ kutūla ne ku Munonga wa Ufalete.+
8 Yehoyakini+ wadi na myaka 18 paabikele, wabikele myeji isatu mu Yelusalema.+ Dijina dya inandi i Nehushata mwanā Elenatana wa ku Yelusalema.
9 Wadi ulonga nyeke bibi ku meso a Yehova, mungya byonso byalongele shandi.
10 Mu kine kitatyi’kya bengidi ba Nebukaneza mulopwe wa Babiloni bakanda kulwa na Yelusalema, penepo kibundi kyatēkelwa kasāla.+
11 Nebukaneza mulopwe wa Babiloni waiya ku kibundi papo bengidi bandi bekitēkele kasāla.
12 Yehoyakini mulopwe wa Yuda watamba waenda kudi mulopwe wa Babiloni,+ pamo ne inandi, ne bengidi bandi, ne bamfumu bandi, ne bengidi ba bulēme ba mu kipango kyandi;+ ebiya mulopwe wa Babiloni wamusela bu musungi mu mwaka wa mwānda wa bulopwe bwandi.+
13 Kupwa watambija’mo byabulēme byonso bya mu njibo ya Yehova ne byabulēme bya mu njibo* ya mulopwe.+ Waketa bipindibipindi bipungwa byonso bya olo byalongele Solomone mulopwe wa Isalela mu tempelo ya Yehova.+ Kino kyalongekele’nka mwalaile’kyo Yehova.
14 Wasela Yelusalema ense bu misungi, ne bamfumu bonso,+ ba bulwi bonso bakomokomo, ne sendwe ense ne mwingidi ense ufula byuma*+—wasela bantu 10 000 bu misungi. Kekwashelepo muntu nansha umo poso balanda bininge ba mu ntanda’ya.+
15 Enka nenki waselela Yehoyakini+ ku Babiloni bu musungi;+ wasela ne inandya mulopwe, bakaji ba mulopwe, ne bengidi ba bulēme ba mu kipango kyandi, ne bantu batabuke bulēme ba mu ntanda’ya, webasela bu misungi ku Yelusalema waenda nabo ku Babiloni.
16 Kadi mulopwe wa Babiloni waselela ba bulwi bonso ku Babiloni bu misungi, bantu 7 000, pamo ne basendwe ne bengidi bafula byuma* 1 000, bonso badi bana-balume bakomokomo kadi bafundijibwe divita.
17 Mulopwe wa Babiloni wabikika Matania, mwanabo na shandya+ Yehoyakini pa kyandi kyaba, washinta ne dijina dyandi ke Zedekia.+
18 Zedekia wadi na myaka 21 paabikele, wabikele myaka 11 mu Yelusalema. Dijina dya inandi i Hamutale+ mwanā Yelemia wa ku Dibena.
19 Wadi ulonga nyeke bibi ku meso a Yehova, mungya byonso byalongele Yehoyakimi.+
20 Bino bintu byafikīle Yelusalema ne Yuda pa mwanda wa bulobo bwa Yehova, enka ne byaebafundwile ku meso andi.+ Kadi Zedekia watombokēle mulopwe wa Babiloni.+
Kunshi kwa Dyani
^ Tala Nshintulwilo ya Bishima.
^ Nansha’mba “njibo mikatakata.”
^ Bibwanika padi i, “mūbaki wa mansakwa.”
^ Bibwanika padi i, “bōbaki ba mansakwa.”
