Samwele wa Bubidi 17:1-29
17 Kupwa Ahitofele wanena Abisalome amba: “Nakwisāshila, ndeke bidi ntonge bana-balume 12 000, ntaluke nkalonde Davida buno bufuku.
2 Nsa kufika kwadi kitatyi kyadi mukōke bininge ne kyadi wampikwa bukomo,*+ kadi nsa kumuzakaja; ebiya bantu bonso badi nabo basa kunyema, nami nsa kwipaya’nka mulopwe kete.+
3 Kupwa nsa kukujokejeja bantu bonso. Bantu bonso bakajoka mungya byobya bisa kulongwa muntu okimba. Penepa bantu bonso basa kwikala mu ndoe.”
4 Uno mulangwe wadi’tu muyampe ku meso a Abisalome ne a bakulumpe bonso ba Isalela.
5 Inoko, Abisalome wanena’mba: “Nakwisāshila, ita bidi ne Hushai+ mwine Aleke, twivwane nandi byasa kunena.”
6 Ebiya Hushai watwela kwa Abisalome. Kupwa Abisalome wamunena’mba: “Ano o madingi aleta Ahitofele. Le tulonde madingi andi? Shi ke amopo, abe witulombole.”
7 Penepo Hushai walondolola Abisalome amba: “Pano’ko madingi aleta Ahitofele ke mayampepo!”+
8 Hushai wanena monka’mba: “Abe mwine uyukile biyampe amba shobe ne bandi bana-balume i bakomokomo,+ kadi i bakalabale* pamo bwa nyema witwa bu uluse wajimija twana twandi mu ntanda.+ Ne kadi, shobe i muntu wa bulwi,+ kasapo kulāla bufuku pamo na bantu.
9 Panenwa pano ufyeme mu mutá* kampanda nansha mu kifuko kikwabo;+ shi aye atambañane bulwi dibajinji, boba bakevwana’o bakanena’mba, ‘Bantu balonda Abisalome abanekenibwa!’
10 Nansha ke muntu mukankamane udi na mutyima pamo na wa ntambo+ bine ukasunguluka moyo, mwanda Isalela ense uyukile amba shobe i mwana-mulume mukomokomo+ ne amba bana-balume badi nabo i bakankamane.
11 Naleta ano madingi: Isalela ense akongakanibwe kodi, tamba ku Dani kutūla ne ku Bela-Sheba,+ bavule pamo bwa musenga wa ku dijiba,+ kadi ufwaninwe kwibaludika mu bulwi.
12 Tusa kukamutamba’dyo konso kwadi, kadi tusa kumuponena pamo bwa lumé lupona pa nshi; kekudipo nansha umo ukapanda pobadi, aye nansha mwana-mulume e-ense wadi nandi.
13 Shi wanyemena mu kibundi kampanda, Isalela ense ukaselela myonji ku kine kibundi’kya, kadi tusa kwikibulwila mu musanza enka ne byokepakashalapo nansha dibwe dya munono.”
14 Ebiya Abisalome ne bantu bonso ba Isalela banena’mba: “Madingi a Hushai mwine Aleke i mayampe kutabuka+ madingi a Ahitofele!” Ke-pantu Yehova wasumininwe* kuvutakanya madingi mayampe a Ahitofele,+ mwanda wa Yehova aletele Abisalome kyamalwa.+
15 Kupwa Hushai wanena ba Zadoki ne Abiatala+ babitobo amba: “Ano o madingi a Ahitofele aadingila Abisalome ne bakulumpe ba Isalela, ano nao o madingi onaleta.
16 Pano tumai bukidi musapu kudi Davida mumudyumune amba: ‘Kokashikata pa byabu* bya lwa ntobwa* bya mu ntanda mutuputupu buno bufuku, ino ufwaninwe’nka kutyibuluka, shi bitupu mulopwe ne bantu bonso badi nabo basa kutukijibwa.’”*+
17 Yonafane+ ne Ahimaza+ badi bashikete ku Ene-Longele;+ ebiya mwingidi umo mwana-mukaji waenda kukebasapwila, nabo baenda kukasapwila Mulopwe Davida, mwanda kebasomwenwepo kutwela mu kibundi bebamwene.
18 Inoko nsongwalume umo webamona wakasapwila Abisalome. Penepo bana-balume babidi’ba baenda lubilo bafika ku njibo ya mwana-mulume umo wa mu Bahudime+ wadi na mushimwa mu kipango kyandi. Nabo batūkila’mo,
19 ebiya mukaja mwana-mulume’wa waala mpūto peulu pa mushimwa waanika’po miseke mitwe; kekudipo nansha umo wayukile’o.
20 Bengidi ba Abisalome baiya kudi mwana-mukaji, ku yandi njibo, kebepangula’mba: “Ba Ahimaza ne Yonafane badi kwepi?” Mwana-mukaji walondolola’mba: “Badi abapite benda dya ku lui.”+ Ebiya bana-balume’ba bebakimba ino kwibatana mpika, penepa bajokela ku Yelusalema.
21 Bana-balume’ba pa kupwa kwenda, nabo batamba mu mushimwa baenda kukasapwila Mulopwe Davida. Bamulombola’mba: “Taluka utyibuluke lui bukidi, mwanda Ahitofele waleta madingi mabi podi.”+
22 Ponka na ponka Davida ne bantu bonso baadi nabo bataluka batyibuluka Yodano. Kufika ku lubanga, kekwadipo muntu nansha umo washele pampikwa kutyibuluka Yodano.
23 Ahitofele pa kumona’mba madingi andi kealondelwepo, wavwika mpunda kishikato waenda ku yandi njibo mu kyabo kibundi.+ Walombola ba mu njibo+ yandi bya kulonga, kupwa wetundika.*+ Penepo wafwa, wajīkwa mu ntanda ya kujīka’mo ya bakulutuba bandi.
24 Mu kine kitatyi’kya, Davida waenda ku Mahanaimi,+ Abisalome nandi watyibuluka Yodano na bana-balume bonso ba Isalela.
25 Abisalome watūla Amasa+ bu mukata wa kibumbo kya divita pa kyaba kya Yoabe;+ Amasa wadi mwanā muntu umo witwa bu Itala mwine Isalela, walēle na Abikele+ mwanā Nahashi mwana-mukaji, mwanabo na Zeluya, inandya Yoabe.
26 Isalela ne Abisalome batūla nkambi mu ntanda ya Ngileade.+
27 Davida pa kufika’tu ku Mahanaimi, Shobi mwanā Nahashi wa ku Laba+ wa bene Amone, ne Makile+ mwanā Amiele wa ku Lo-Debale, ne Balezilai+ mwine Ngileade wa ku Lokedimi
28 baiya na bitanda, masāni makatampe, ne bisuku bya dīma, ñano, mebele a buluba, bukula, miseke mikange, nkunde mikata, nkunde mityemitye, miseke myūmu,
29 būki, buleba, mikōko, ne mikama ya mabele.* Baletela Davida ne bantu baadi nabo bino byonso amba badye,+ mwanda banenene amba: “Bantu badi na nzala, i bakōke, kadi badi na kyumwa mu ntanda mutuputupu.”+
Kunshi kwa Dyani
^ Nansha’mba “muzoze mu makasa onso abidi.”
^ Nansha’mba “muya wa bululu.”
^ Nansha’mba “kina; kinkolankola.”
^ Nansha’mba “wasoñenye.”
^ Kishima pa kishima i, “kuminwa.”
^ Bibwanika padi i, “mu malungu mudi zolē.”
^ Byabukwa lwa nshi.
^ Nansha’mba “weyoa.”
^ Kishima pa kishima i, “mabele mekwate a bañombe.”
