Bene Levi 21:1-24
21 Yehova wanena Mosesa monka’mba: “Wisambe na babitobo, bana ba Alone, wibalombole amba, ‘Kekwakekala nansha umo wa kwisubija mwanda wa muntu* mufwe mu bukata bwa bantu bandi.+
2 Ino ubwanya kwisubija mwanda wa mubutule wa ku mashi wa pabwipi, mwanda wa inandi, shandi, wandi mwana mwana-mulume, wandi mwana mwana-mukaji, mwanabo,
3 kadi ubwanya kwisubija mwanda wa mwanabo mwana-mukaji shi i mujike udi kubwipi nandi ino kasongelwe.
4 Kabwanyapo kwisubija ne kwikobakanya mwanda wa mwana-mukaji wa mulume wa mu bantu bandi.
5 Kebafwaninwepo kwitenda lupole+ ku mitwe yabo nansha kutenda ku mfulo ya myevu yabo nansha kwiketaketa pa ngitu yabo.+
6 Bafwaninwe kwikala bajila kudi Leza wabo,+ kadi kebafwaninwepo kukobakanya dijina dya Leza wabo,+ mwanda baletanga byamulambu bya Yehova byelwe na mudilo, mukate* wa Leza wabo, bafwaninwe kwikala bajila.+
7 Kebafwaninwepo kusonga ndumba,+ mwana-mukaji musubijibwe, nansha mwana-mukaji mulubulwe na wandi mulume,+ mwanda kitobo i ujila kudi Leza wandi.
8 Abe ufwaninwe kumupandula,+ mwanda i aye uleta byakudya bya Leza obe. Nandi ufwaninwe kwikala ujila kodi, mwanda amiwa, Yehova, mwine wimupandula, ne ujila.+
9 “‘Ino shi mwanā kitobo mwana-mukaji wekobakanya na kulonga busekese, wakobakanya shandi. Ufwaninwe kusōkwa mu mudilo.+
10 “‘Kitobo mukatampe wa banababo, watūtyilwe ku mutwe wandi māni a kushinga+ ne kutūlwa* bu kitobo amba avwale bivwalwa bya butobo,+ kafwaninwepo kuleka nywene yandi misalakane ku mutwe nansha kusana bivwalwa byandi.+
11 Kafwaninwepo kufwena muntu mufwe*+ nansha umo; kafwaninwepo kwisubija mwanda wa shandi nansha inandi.
12 Kafwaninwepo kutamba mu kipandulwe kadi kafwaninwepo kukobakanya kipandulwe kya Leza wandi,+ mwanda kiyukeno kya kwipāna, māni a kushinga a Leza wandi,+ kidi padi. Amiwa ne Yehova.
13 “‘Aye ufwaninwe kusonga mwana-mukaji mujike.+
14 Kabwanyapo kusonga wa kishala, mwana-mukaji mulubulwe, wasubijibwe, nansha ndumba; ino ufwaninwe kusonga mukaji mujike wa mu bantu bandi.
15 Kafwaninwepo kukobakanya lutundu* lwandi mu bukata bwa bantu bandi,+ mwanda amiwa ne Yehova, mwine umupandula.’”
16 Yehova wesamba monka na Mosesa amba:
17 “Lombola Alone amba, ‘Kekwakekala muntu nansha umo wa mu lutundu* lobe mu nkongo yabo yonsololo udi na kabulema ukafwena kuleta byakudya bya Leza wandi.
18 Shi kudi muntu udi na kabulema, kakafwenapo: mpofu nansha kilema nansha wa mpala* mifyontakane nansha udi na kidyoma kimo kilampe bininge,
19 muntu mutyumukwe kūlu nansha mutyumukwe kuboko,
20 wa katumba nansha mutune,* nansha muntu wa diso dilemane nansha wa mpele nansha wa kisesela nansha wa miningi myoneke.+
21 Kekwakekala muntu nansha umo udi na kabulema wa ku lutundu* lwa Alone kitobo ukafwena kuleta byamulambu bya Yehova byelwe na mudilo. Mwanda udi na kabulema, kabwanyapo kufwena kuleta byakudya bya Leza wandi.
22 Ukadya byakudya bya Leza wandi bya mu bintu bijila+ nakampata ne bya mu bintu bijila.+
23 Inoko, kabwanyapo kwiya kubwipi na mpashila,+ kadi kabwanyapo kufwena ku kisōkelo,+ mwanda udi na kabulema; kafwaninwepo kukobakanya kipandulwe+ kyami, mwanda amiwa ne Yehova, mwine wibapandula.’”+
24 Penepo Mosesa wesamba na Alone ne bandi bana ne bene Isalela bonso.
Kunshi kwa Dyani
^ Nansha’mba “mwanda wa muya.”
^ Nansha’mba “byakudya,” bifunkilanga pa bitapwa.
^ Kishima pa kishima i, “kuyujibwa makasa.”
^ Nansha’mba “muya mufwe.” Kishima kya Kihebelu nephesh kikwatañene pano na kishima kya Kihebelu kishintulula’mba “mufwe.”
^ Kishima pa kishima i, “lukunwa.”
^ Kishima pa kishima i, “lukunwa.”
^ Kishima pa kishima i, “nansha wa mulu musanike.”
^ Bibwanika padi i, “kifukwe.”
^ Kishima pa kishima i, “lukunwa.”
