Bene Levi 3:1-17
3 “‘Shi kyamulambu kyandi i kitapwa kya kipwano*+ ne shi uletanga’kyo mu luombe, ukaleta nyema wampikwa bulema ku meso a Yehova, ekale mulume nansha mukaji.
2 Ukatenteka dikasa dyandi pa mutwe wa kyamulambu kyandi, nakyo kikatapilwa pa kibelo kya pema wa kubungakena’ko; kadi bana ba Alone, babitobo, bakakusa mashi ku mitamba yonso ya kisōkelo.
3 Ukaleta kipindi kya kitapwa kya kipwano bu kyamulambu kyelwe na mudilo kudi Yehova:+ māni+ abumbile ku milá, māni onso alamete ku milá,
4 ne mfyo ibidi ne māni adi’ko adi kubwipi na kifuka. Kadi ukatalula bilamete ku dityima pamo ne mfyo.+
5 Bana ba Alone bakasōka’byo pa kisōkelo pangala pa kyamulambu kisōkwe kitentekwe pa nkuni idi pa mudilo;+ i kyamulambu kyelwe na mudilo bu luvumba luyampe* kudi Yehova.+
6 “‘Shi kyamulambu kyandi kya kitapwa kya kipwano kudi Yehova i kya mu luombe, ukaleta nyema mulume nansha mukaji wampikwa bulema.+
7 Shi kaleta mukōko mulume mwana bu kyamulambu kyandi, nankyo ukaleta’o ku meso a Yehova.
8 Ukatenteka dikasa dyandi pa mutwe wa kyamulambu kyandi, nakyo kikatapilwa kumeso kwa pema wa kubungakena’ko. Bana ba Alone bakakusa mashi akyo ku mitamba yonso ya kisōkelo.
9 Aye ukaleta māni a kitapwa kya kipwano bu kyamulambu kyelwe na mudilo kudi Yehova.+ Ukatalula mukila munune onso mutuntulu wa kubwipi na mushiki, ne māni abumbile ku milá, māni onso alamete ku milá,
10 ne mfyo ibidi ne māni adi’ko adi kubwipi na kifuka. Kadi ukatalula bilamete ku dityima pamo ne mfyo.+
11 Kitobo ukekisōka pa kisōkelo bu kyakudya,* kyamulambu kyelwe na mudilo kudi Yehova.+
12 “‘Shi kyamulambu kyandi i mbuji, nabya ukaleta’ye ku meso a Yehova.
13 Ukamutenteka dikasa pa mutwe, nandi ukatapilwa kumeso kwa pema wa kubungakena’ko, kadi bana ba Alone bakakusa mashi andi ku mitamba yonso ya kisōkelo.
14 Kipindi kyakaleta bu kyamulambu kyandi kyelwe na mudilo kudi Yehova i māni abumbile ku milá, māni onso alamete ku milá,+
15 ne mfyo ibidi ne māni adi’ko adi kubwipi na kifuka. Kadi ukatalula bilamete ku dityima pamo ne mfyo.
16 Kitobo ukebisōka pa kisōkelo bu kyakudya,* kyamulambu kyelwe na mudilo mwanda wa luvumba luyampe.* Māni onso i a Yehova.+
17 “‘I kitungo kya myaka na myaka mu nkongo yenu, mu bīkalo byenu byonso: Kemufwaninwepo nansha dimo kudya māni o-onso nansha mashi+ o-onso.’”
Kunshi kwa Dyani
^ Nansha’mba “kitapwa kya byamulambu bya ndoe.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Kishima pa kishima i, “mukate,” ko kunena’mba, pamo bwa Leza udya ku kitapwa kya kipwano.
^ Kishima pa kishima i, “mukate,” ko kunena’mba, pamo bwa Leza udya ku kitapwa kya kipwano.
^ Nansha’mba “lutūkija mutyima; lusenga.” Kishima pa kishima i, “lutūkija.”
