Bene Levi 4:1-35
-
Kyamulambu kya bubi (1-35)
4 Yehova wanena Mosesa monka’mba:
2 “Lombola bene Isalela amba, ‘Shi muntu* walonga bubi kwampikwa kusaka,+ walonga kintu kampanda kisoñenye Yehova amba kekifwaninwepo kulongwa:
3 “‘Shi kitobo mushingwe māni+ walonga bubi,+ wapija ne bantu mambo, nabya ufwaninwe kuleta ñombe mulume mwana wampikwa bulema kudi Yehova bu kyamulambu kya bubi mwanda wa bubi bwalongele.+
4 Ukaselela ñombe’wa pa kibelo kya pema wa kubungakena’ko+ ku meso a Yehova ne kutenteka dikasa dyandi pa mutwe wa ñombe’wa, kupwa ukatapa ñombe ku meso a Yehova.+
5 Penepo kitobo mushingwe māni+ ukayata’ko mashi a ñombe’wa ne kwiatweja mu pema wa kubungakena’ko;
6 kadi kitobo ukatubika munwe wandi mu mashi+ ne kukusa mashi amo misunsa isamba-ibidi+ ku meso a Yehova kampalampala na mpashila ya kifuko kijila.
7 Kitobo ukela ne mashi amo ku masengo a kisōkelo kya ensense ya mananshi,+ kidi ku meso a Yehova mu pema wa kubungakena’ko, kupwa ukapungulwila mashi a ñombe onso ashele’ko pa kitako kya kisōkelo kya kyamulambu kisōkwe,+ kidi pa kibelo kya pema wa kubungakena’ko.
8 “‘Penepa ukatalula māni onso a ñombe wa kyamulambu kya bubi, kubadila’mo ne māni abumbile ku milá ne māni alamete ku milá,
9 ne mfyo ibidi ne māni adi’ko adi kubwipi na kifuka. Kadi ukatalula bilamete ku dityima pamo ne mfyo.+
10 Bikekala pamo bwa byobya byatalwilwe ku ñombe wa kitapwa kya kipwano.+ Kadi kitobo ukebisōka pa kisōkelo kya kyamulambu kisōkwe.
11 “‘Ino kiseba kya ñombe ne mwita wandi onso pamo ne mutwe, ne maulu, ne milá, ne tuvwi twandi+—
12 byonso bishala ku ñombe’wa—ukebiselela kufula kwa nkambi ku kifuko kitōka kwelwanga buto,* kadi ukebisōka pa nkuni mu mudilo.+ Bikasōkelwa kokwa kwelwanga buto.
13 “‘Ebiya shi kitango kyonso kya Isalela kibapi mambo na kulonga bubi kwampikwa kusaka,+ ino kipwilo kuyuka mpika’mba abalonga kintu kisoñenye Yehova amba kekifwaninwepo kulongwa,+
14 ino kupwa bubi bubayukana, nabya kipwilo kifwaninwe kuleta ñombe mulume mwana wa kyamulambu kya bubi ne kumuselela ku meso a pema wa kubungakena’ko.
15 Bakulumpe ba kitango bakatenteka makasa abo pa mutwe wa ñombe’wa ku meso a Yehova, kadi ñombe’wa ukatapwa ku meso a Yehova.
16 “‘Penepo kitobo mushingwe māni ukatweja mashi amo a ñombe’wa mu pema wa kubungakena’ko.
17 Kitobo ukatubika munwe wandi mu mashi ne kukusa mashi amo misunsa isamba-ibidi ku meso a Yehova kampalampala na mpashila.+
18 Ukela mashi amo ku masengo a kisōkelo+ kidi ku meso a Yehova, kidi mu pema wa kubungakena’ko; kadi ukapungulwila mashi onso ashele’ko pa kitako kya kisōkelo kya kyamulambu kisōkwe, kidi pa kibelo kya pema wa kubungakena’ko.+
19 Ukatalula māni andi onso ne kwiasōka pa kisōkelo.+
20 Ukalonga ñombe’wa monka mwaalongelanga ñombe mukwabo wa kyamulambu kya bubi. Mo mwakamulongela, kadi kitobo ukebapūtyila bubi,+ nabo bakalekelwa.
21 Ukaseleja ñombe’wa panja pa nkambi ne kumusōka, monka mwaasōkelanga ñombe mubajinji.+ I kyamulambu kya bubi kya kipwilo.+
22 “‘Shi mfumu+ walonga bubi kwampikwa kusaka, walonga kintu kimo mu byobya byonso bisoñenye Yehova Leza wandi amba kebifwaninwepo kulongwa, ebiya wapi mambo,
23 nansha shi wayuka bubi bwaalongele pa kutyumuna mbila, nabya ukaleta mbuji mulume mwana wampikwa bulema bu kyamulambu kyandi.
24 Ukatenteka dikasa dyandi pa mutwe wa mbuji mwana ne kumutapa pa kifuko patapilwanga kyamulambu kisōkwe ku meso a Yehova.+ I kyamulambu kya bubi.
25 Kitobo ukayata’ko mashi a kyamulambu kya bubi na munwe wandi ne kwiela ku masengo+ a kisōkelo kya kyamulambu kisōkwe, kadi ukapungulwila mashi ashele’ko pa kitako kya kisōkelo kya kyamulambu kisōkwe.+
26 Ukasōka māni andi onso pa kisōkelo pamo bwa māni a kitapwa kya kipwano,+ kadi kitobo ukamupūtyila bubi bwandi, nabo bukamulekelwa.
27 “‘Shi muntu* kampanda mu bantu ba ntanda’ya walonga bubi kwampikwa kusaka ne kupya mambo, walonga kintu kimo mu byobya bisoñenye Yehova amba kebifwaninwepo kulongwa,+
28 nansha shi wayuka bubi bwalongele, nabya ukaleta mbuji mukaji mwana wampikwa bulema bu kyamulambu kyandi kya bubi bwalongele.
29 Ukatenteka dikasa dyandi pa mutwe wa kyamulambu kya bubi ne kutapa kyamulambu kya bubi pa kifuko kimo kyonka na kyamulambu kisōkwe.+
30 Kitobo ukayata’ko mashi akyo na munwe wandi ne kwiela ku masengo a kisōkelo kya kyamulambu kisōkwe, kadi ukapungulwila mashi ashele’ko pa kitako kya kisōkelo.+
31 Ukatalula māni akyo onso,+ na mutalwilwanga māni a kitapwa kya kipwano,+ kadi kitobo ukasōka’kyo pa kisōkelo bu luvumba luyampe* kudi Yehova, penepo kitobo ukamupūtyila bubi, nabo bukamulekelwa.
32 “‘Ino shi kalambula kana ka mukōko bu kyamulambu kyandi kya bubi, ukaleta kana ka mukōko kakaji kampikwa bulema.
33 Ukatenteka dikasa dyandi pa mutwe wa kyamulambu kya bubi ne kutapa’kyo bu kyamulambu kya bubi pa kifuko patapilwanga kyamulambu kisōkwe.+
34 Kitobo ukayata’ko mashi a kyamulambu kya bubi na munwe wandi ne kwiela ku masengo a kisōkelo kya kyamulambu kisōkwe,+ kadi ukapungulwila mashi ashele’ko pa kitako kya kisōkelo.
35 Ukatalula māni akyo onso, pamo na mutalwilwanga māni a mukōko mulume mwana wa kitapwa kya kipwano, kadi kitobo ukasōka’byo pa kisōkelo pangala pa byamulambu bya Yehova byelwe na mudilo;+ penepo kitobo ukamupūtyila bubi bwalongele, nabo bukamulekelwa.+
Kunshi kwa Dyani
^ Nansha’mba “muya.”
^ Nansha’mba “buto bwa māni,” ko kunena’mba, buto busūmine’ko māni a bitapwa.
^ Nansha’mba “muya kampanda.”
^ Nansha’mba “lutūkija mutyima; lusenga.” Kishima pa kishima i, “lutūkija.”
