Bene Levi 8:1-36
-
Kutombolwa kwa Alone ne bandi bana bu babitobo (1-36)
8 Yehova wesamba monka na Mosesa amba:
2 “Sela Alone ne bandi bana pamo,+ ne bivwalwa,+ ne māni a kushinga,+ ne ñombe wa kyamulambu kya bubi, ne mikōko milume ibidi, ne kilala kya mikate yampikwa kiyujo,+
3 kupwa bunga kitango kyonso pamo ku kibelo kya pema wa kubungakena’ko.”
4 Penepo Mosesa walonga monka mwamusoñaninye Yehova, kitango kyebunga pamo ku kibelo kya pema wa kubungakena’ko.
5 Ebiya Mosesa wanena kitango amba: “Kino’ki kyo kyetusoñenye Yehova kulonga.”
6 Ponkapo Mosesa wafwenya Alone ne bandi bana kubwipi, weboija mema.+
7 Kupwa wamuvwika munkukumba,+ wamukuta lukuka,+ wamuvwika kotyi wampikwa maboko,+ wamuvwika efoda+ ne kuningisha’ye na kikaya*+ kisuke kya efoda, wamukuta’kyo biyampe.
8 Penepa wamukobeka kivwalwa kya pa kyadi,+ waela ne Udimi ne Tumimi+ mu kivwalwa kya pa kyadi.
9 Ebiya wamuvwika ku mutwe kivwalwa kya ku mutwe,+ watūla kumeso kwa kivwalwa kya ku mutwe kipāpo kya olo* kikelema, kiyukeno kijila kya kwipāna,*+ monka mobasoñaninye Mosesa kudi Yehova.
10 Ebiya Mosesa wayata māni a kushinga washinga’o kipema ne byonso byadi’mo,+ webipandula.
11 Kupwa wakusa’ko amo misunsa isamba-ibidi ku kisōkelo, washinga kisōkelo māni ne bipungwa byakyo byonso ne kyoilo ne kitako kyakyo mwanda wa kwibipandula.
12 Ku mfulo wapungulwila ku mutwe wa Alone māni amo a kushinga, wamushinga māni mwanda wa kumupandula.+
13 Ebiya Mosesa wafwenya bana ba Alone kubwipi, webavwika minkukumba, webakuta nkuka, webavwika* ne tupūto,+ monka mobasoñaninye Mosesa kudi Yehova.
14 Penepo wasela ñombe mulume wa kyamulambu kya bubi, Alone ne bandi bana batenteka makasa abo pa mutwe wa ñombe wa kyamulambu kya bubi.+
15 Mosesa wamutapa, wayata mashi+ na munwe wandi waela’o ku masengo a kisōkelo mitamba yonso, watōkeja kisōkelo ku bubi, ino mashi ashele’ko weapungulwila pa kitako kya kisōkelo, mwanda wa kwikipandula ne kupūtyila’po bubi.
16 Kupwa wayata māni onso a ku milá, ne bilamete ku dityima, ne mfyo ibidi ne māni ayo, Mosesa webisōka pa kisōkelo.+
17 Ebiya byobya byashele ku ñombe, kiseba kyandi, mwita wandi, ne tuvwi twandi, byasōkwa na mudilo panja pa nkambi,+ monka mobasoñaninye Mosesa kudi Yehova.
18 Penepo wafwenya mukōko mulume wa kyamulambu kisōkwe, Alone ne bandi bana batenteka makasa abo pa mutwe wa mukōko’wa.+
19 Ebiya Mosesa weutapa ne kukusa mashi ku mitamba yonso ya kisōkelo.
20 Wasaya mukōko bisesobiseso, Mosesa wasōka mutwe, ne biseso, ne māni.*
21 Wakenda milá ne maulu na mema, Mosesa wasōka mukōko onso mutuntulu pa kisōkelo. Kyadi kyamulambu kisōkwe bu luvumba luyampe.* Kyadi kyamulambu kyelwe na mudilo kudi Yehova, monka mobasoñaninye Mosesa kudi Yehova.
22 Penepa wasela mukōko mulume wa bubidi, mukōko wa pa kutombolwa,+ Alone ne bandi bana batenteka makasa abo pa mutwe wa mukōko’wa.+
23 Mosesa weutapa wayata’ko mashi amo washinga’o ku kanzele ka kutwi kwa Alone kwa lundyo ne ku kyala kya kuboko kwa lundyo ne pa dīna dya mukumo dya kulu kwa lundyo.
24 Kupwa Mosesa wafwenya bana ba Alone webashinga mashi amo ku kanzele ka kutwi kwa lundyo ne ku kyala kya kuboko kwa lundyo ne pa dīna dya mukumo dya kulu kwa lundyo; ino Mosesa wakusa mashi ashele’ko ku mitamba yonso ya kisōkelo.+
25 Penepo wayata māni, ne mukila munune, māni onso adi ku milá, ne bilamete ku dityima, mfyo ibidi ne māni ayo, ne kulu kwa lundyo.+
26 Wayata mu kilala kya mikate yampikwa kiyujo kyadi ku meso a Yehova mukate umo wampikwa kiyujo udi bwa lutonto,+ mukate umo udi bwa lutonto mwele’ko māni,+ ne kamukate kapapalale. Ebiya weitenteka pa biseso bya māni ne kulu kwa lundyo.
27 Kupwa watūla byonso mu bikasala bya Alone ne mu bikasala bya bandi bana waanza kwibipēpeja koku ne koku bu kyamulambu kya kupēpeja ku meso a Yehova.
28 Penepo Mosesa webiyata mu abo makasa webisōka pa kisōkelo pangala pa kyamulambu kisōkwe. Byadi bu kitapwa kya pa kutombolwa kya luvumba luyampe.* Kyadi kyamulambu kyelwe na mudilo kudi Yehova.
29 Penepa Mosesa wayata lukudi welupēpeja koku ne koku bu kyamulambu kya kupēpeja ku meso a Yehova.+ Lwaikala ke kipindi kya Mosesa kya ku mukōko wa pa kutombolwa, monka mobasoñaninye Mosesa kudi Yehova.+
30 Mosesa wayata’ko māni a kushinga+ amo ne mashi amo adi pa kisōkelo wakusa’o Alone ne bivwalwa byandi ne bandi bana badi pamo nandi ne bivwalwa byabo. E nankyo mwaapandwidile Alone ne bivwalwa byandi ne bandi bana+ ne bivwalwa byabo.+
31 Penepo Mosesa wanena Alone ne bandi bana’mba: “Tēkai+ mwita ku kibelo kya pema wa kubungakena’ko, kadi mukadīla’o ponka na mikate idi mu kilala kya pa kutombolwa, monka mobaunsoñaninye amba, ‘Alone ne bandi bana bakadya’o.’+
32 Mwita ukashala’ko ne mikate mukebisōka na mudilo.+
33 Kemufwaninwepo kutaluka ku kibelo kya pema wa kubungakena’ko mu mafuku asamba-abidi, kufika ne bipwa mafuku a kwimutūla bu babitobo, mwanda kukapita mafuku asamba-abidi pa kwimutūla bu babitobo.*+
34 Yehova wasoñenye amba tulonge bino byotwalonga dyalelo’bi mwanda wa kwimupūtyila bubi.+
35 Mukekalanga ku kibelo kya pema wa kubungakena’ko dyuba ne bufuku mu mafuku asamba-abidi+ ne kuvuija mingilo yenu kudi Yehova,+ kutyina’mba mwakafwa; mwanda e mobaunsoñaninye.”
36 Kadi Alone ne bandi bana balonga byonso byasoñenye Yehova kupityila kudi Mosesa.
Kunshi kwa Dyani
^ Nansha’mba “mutolo.”
^ Nansha’mba “nkaka ujila.”
^ Nansha’mba “nsahabu.”
^ Nansha’mba “webakuta.”
^ Nansha’mba “māni alamete ku mfyo.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Nansha’mba “lutūkija mutyima; lusenga.” Kishima pa kishima i, “lutūkija.”
^ Kishima pa kishima i, “kuyuja makasa enu.”
