Divilu 13:1-22
13 Yehova wanena Mosesa monka’mba:
2 “Mpandwilei* umbedi ense mwana-mulume* mu bene Isalela. Mwana-mulume umbajinji kubutulwa, ne ku bantu ne ku banyema kwine, i wami.”+
3 Penepo Mosesa wanena bantu amba: “Vulukai dino difuku dyomwatambile mu Edipito,+ mu njibo ya bupika, mwanda i na kuboko kwa bukomo kwemulupwile’mo Yehova.+ Nanshi i kutupu kintu kyele kiyujo kikadibwa.
4 Mubatambe dino difuku, mu kweji wa Abibu.*+
5 Pakakutweja Yehova mu ntanda ya bene Kenani, bene Hiti, ne bene Amole, ne bene Hivi, ne bene Yebushi,+ ntanda yaatyipile kudi bakulutuba bobe kukupa’yo,+ ntanda ikuka mabele ne būki,+ ufwaninwe kulama kino kitatyi mu uno kweji.
6 Ukadya mikate yampikwa kiyujo+ mu mafuku asamba-abidi, kadi mu difuku dya busamba-bubidi, kukekala masobo a Yehova.
7 Mikate yampikwa kiyujo ikadibwa mu mafuku asamba-abidi;+ kekufwaninwepo kutanwa modi+ kintu nansha kimo kyele kiyujo, kadi kekufwaninwepo kutanwa modi mukama usosoma nansha umo mu yobe ntanda* yonsololo.
8 Ufwaninwe kubangila obe mwana mu dyodya difuku amba, ‘I mwanda wa byanongele Yehova ponatambile mu Edipito.’+
9 Kadi kino kikekala bu kiyukeno pa kuboko kobe ne bu kivulukilo* pa mpala*+ yobe, pa kusaka’mba kijila kya Yehova kikale mu kyakanwa kyobe, ke-pantu Yehova wakulupwile mu Edipito na kuboko kwa bukomo.
10 Ufwaninwe kulama kino kijila pa kitatyi kyakyo kitungwe mwaka ne mwaka.+
11 “Shi Yehova wakutweja mu ntanda ya bene Kenani, mine yaakutyipile abe ne bakulutuba bobe kukupa’yo,+
12 ufwaninwe kulambula kudi Yehova kilume kyonso kibedi,* pamo ne kilala-ndá kyonso kilume kya mu bimunanwa byodi nabyo. Bilume i bya Yehova.+
13 Kilala-ndá kyonso kya bampunda ukekikūla na mukōko, shi kwikikūdilepo, nabya ukekityumuna nshingo. Kadi ufwaninwe kukūla+ obe mwana mwana-mulume ense umbedi.
14 “Shi obe mwana kakwipangula mwenda mafuku amba, ‘Le kino kishintulula bika?’ nankyo ukamulombola’mba, ‘Yehova wetulupwile na kuboko kwa bukomo mu Edipito, mu njibo ya bupika.+
15 Felo pa kupela na kibengo kwituleka twende,+ Yehova waipaile umbedi ense mu ntanda ya Edipito, kushilwila ku umbedi wa muntu kutūla ne ku umbedi wa nyema.+ O mwanda ngelanga kudi Yehova kitapwa kya banyema bonso balume babedi,* ne kukūla umbedi ense wa mu bami bana bana-balume.’
16 Kino kikakukwasha bu kiyukeno pa kuboko kobe ne bu kabāla pa mpala*+ yobe, ke-pantu Yehova wetulupwile mu Edipito na kuboko kwa bukomo.”
17 Ino Felo pa kuleka bantu bende, Leza kebendejepo dishinda dya ntanda ya bene Fidishitia, nansha byodyadi dīpi. Mwanda Leza wanenene amba: “Bantu bakokeja kushinta milangwe yabo shi abatambwe divita kebajokela mu Edipito.”
18 O mwanda Leza waendeje bantu bakekonka ku dishinda dya mu ntanda mutuputupu ku Dijiba Dityila.+ Ino bene Isalela pobatambile mu ntanda ya Edipito badi bepange mu mulongo wa bulwi.
19 Mosesa wasela ne mikupa ya Yosefa, mwanda Yosefa wātyipije bana ba Isalela mutyipo musumininwe amba: “Leza kakabulwepo kwimuta mutyima. Mukasela mikupa yami kuno’ku.”+
20 Batamba ku Sukote bakatūla nkambi mu Etāme, kufula kwa mu ntanda mutuputupu.
21 Penepo Yehova wādi wibatangidile kumeso dyuba mu dilenga dya dikumbi dya kwibendeja mu dishinda,+ bufuku nabo mu dilenga dya mudilo dya kwibamunikila, amba bekale benda dyuba ne bufuku.+
22 Dilenga dya dikumbi kedyadipo dijimina ku meso a bantu dyuba, nansha ke dilenga dya mudilo dine bufuku.+
Kunshi kwa Dyani
^ Kishima pa kishima i, “umbedi yense ulala ndá yo-yonso.”
^ Nansha’mba “Ntūdilei pafula.”
^ Tala Mbwejo B15.
^ Kishima pa kishima i, “mikalo.”
^ Kishima pa kishima i, “pa bukata bwa meso obe.”
^ Nansha’mba “kivulujo.”
^ Kishima pa kishima i, “ense ulala ndá.”
^ Kishima pa kishima i, “kintu kyonso kilala ndá.”
^ Kishima pa kishima i, “pa bukata bwa meso obe.”
