Mika 1:1-16
1 Kinenwa kya Yehova kyaile kudi Mika*+ wa ku Moleshete mu mafuku a Yotama,+ Ahaza,+ ne Hezekia,+ balopwe ba Yuda,+ kyaatambwile mu kimonwa pa mwanda wa Samadia ne Yelusalema amba:
2 “Banwe bantu bonso, ivwanai!
A ntanda ne byonso biyudile’mo, tai mutyima,Kadi Mfumu Mwinē Lupusa Lonso Yehova ekale kamoni pomudi,+—Yehova ku tempelo yandi ijila.
3 Mwanda tala! Yehova utambanga ku kifuko kyandi;Ukatūka ne kutyampa pa mitenta ya ntanda.
4 Ngulu ikasunguluka munshi mwandi,+Kadi misanza* ikaladikaPamo bwa bupula ku mudilo,Pamo bwa mema mapungululwe pa matēlo makomo.
5 Bino byonso i pa mwanda wa butomboki bwa Yakoba,Mwanda wa bubi bwa njibo ya Isalela.+
Le butomboki bwa Yakoba i bika?
Lelo ke Samadiapo?+
Le mitenta ya Yuda i bika?+
Lelo ke Yelusalemapo?
6 Nkalamuna Samadia ke mulwi wa masala a budimi,Kifuko pa kudima madimi a mañanza;Nkela* mabwe andi mu musanza,Kadi nkasokwela patōka byalwilo byandi.
7 Bankishi bandi bonso basōnge bakalalwa bibesebibese,+Kadi byabuntu byonso byawepoteje* nabyo bikasōkwa mudilo.+
Nkasala bilezaleza byandi byonso.
Mwanda wabungakenye’byo ku mfutwa ya busekese,Kadi bikekala monka ke mfutwa ya bandumba.”
8 Pa mwanda wa kino’ki, nkayoyokota miyoa ne kudila;+Nkenda ku maulu pululu kadi mutaka.+
Miyoa yami ikekala pamo bwa ya mizeu,Madilo ami nao pamo bwa a makolongo.
9 Mwanda kilonda kyandi kekibwanyapo kubeluka;+Kibaiya kufika ne ku Yuda.+
Kipupo kibasambakana kufika ne ku kibelo kya bantu bami, ku Yelusalema.+
10 “Kemwakasapulai’kyo mu Ngata;Kemufwaninwepo kudila nansha dimo.
Alañana mu luvumbi mu Bete-Afela.*
11 A bekadi* ba Shafilu, abukai mutaka kadi na bumvu.
Bekadi* ba Zanana kebatambilepo.
Mu Bete-Ezele mukekala miyoa, kadi keikemukwashapo.
12 Mwanda bekadi* ba Malote badi batengele kiyampe,Ino kibi kibatambe kudi Yehova kibatūkila ku kibelo kya Yelusalema.
13 A bekadi* ba Lakishi,+ kutyilai dikalo ku tubalwe.
Wadi ngalwilo ya bubi kudi mwanā Ziona mwana-mukaji,Mwanda butomboki bwa Isalela bwatenwe modi.+
14 Penepo ukapa Moleshete-Ngata byabuntu bya kwishadika* nabyo.
Mobo a Akiziba+ adi bu kintu kya bongojani ku balopwe ba Isalela.
15 A bekadi* ba Malesha,+ nkemuletela monka wa kwimunekenya.*+
Ntumbo ya Isalela ikafika’nka ne ku Adulama.+
16 Mwitendei lupole ne kwitenda nywene pa mwanda wa benu bana bomusenswe.
Mwitendei lupole pamo bwa mukebo,Mwanda abaselelwa mu bu misungi kulampe nenu.”+
Kunshi kwa Dyani
^ I dijina Mikele nansha Mikaya mu kīpi, dishintulula’mba “I Ani Udi Pamo bwa Yehova?”
^ Nansha’mba “malungu a misanza.”
^ Kishima pa kishima i, “Nkapungulwila.”
^ Nansha’mba “mfutwa yonso ya busekese bwandi.”
^ Nansha’mba “mu njibo ya Afela.”
^ Kishima pa kishima i, “mwikadi mwana-mukaji.”
^ Kishima pa kishima i, “Mwikadi mwana-mukaji.”
^ Kishima pa kishima i, “mwikadi mwana-mukaji.”
^ Kishima pa kishima i, “mwikadi mwana-mukaji.”
^ Nansha’mba “kwilādika.”
^ Kishima pa kishima i, “mwikadi mwana-mukaji.”
^ Nansha’mba “wa kwimuyata bintu.”
