Nehemia 4:1-23
4 Penepo Sanabalata+ pa kwivwana’tu amba tūbakululanga lubumbu, waloba ne kujingwa mutyima bininge,* kazawila’nka kuzawila Bayuda.
2 Ebiya wanena ku meso a banababo ne kibumbo kya divita kya Samadia’mba: “Le Bayuda bazoze baloñanga bika? Le basa kwingila’byo abo bene? Le basa kulambula bitapwa? Le basa kupwa mu difuku dimo? Le basa kujokeja ku būmi mabwe matēme a milwi ya bityakuku bya luvumbi?”+
3 Penepo Tobia+ mwine Amone,+ wadi wimene kubwipi nandi, wanena’mba: “Nansha shi mukenge ukande’tu pa byobobaka, ukaponeja lubumbu lwabo lwa mabwe.”
4 A Leza wetu ivwana, mwanda tubafutululwa,+ mutonko wabo ujokele pa mitwe yabo,+ kadi wibapāne bu kitūtwa mu ntanda ya bu misungi.
5 Kokipūta mambo abo nansha kubula bubi bwabo ku meso obe,+ mwanda abatuke bōbaki.
6 Penepo twaendelela kūbaka lubumbu, kadi lubumbu lonso lwesambakana, lwaubakululwa kufika ne pa bukata bwalo mu bwimwa, kadi bantu badi batele nyeke mutyima wabo ku mwingilo.
7 Penepo Sanabalata, ne Tobia,+ ne bene Alabia,+ ne bene Amone, ne bene Ashedoda+ pa kwivwana’tu amba kulongololwa kwa mumbu ya Yelusalema kwendelelanga kumeso ne amba bipunzu bijikwanga, baloba bininge.
8 Bakuta kitumba kya kwiya kulwa na Yelusalema ne kuleta’mo kavutakanya.
9 Ino twalombela kudi Leza wetu ne kutūla balami pa mwanda wabo dyuba ne bufuku.
10 Ino bantu ba Yuda kebanena’mba: “Bukomo bwa bengidi* bubatyepa, kadi kukidi bityakuku bingi bininge, ketusapo kubwanya kūbaka lubumbu.”
11 Kadi balwana netu badi banena’mba: “Kumeso kwa abo kuyuka’kyo nansha kwitumona, tusa kwiya mu bukata mwabo, twibepaye, twimike ne mwingilo mwine.”
12 Ponso padi pāya Bayuda badi nabo kubwipi, badi betusapwila kyaba ne kyaba’mba:* “Basa kwiya kwitutamba ku mitamba yonso.”
13 Ebiya natūla bana-balume mu bipindi bya munshi bya kifuko kya kunyuma kwa lubumbu pa byaba bidi pululu, nebatūla mungya bisaka na bipete byabo, ne mikobe yabo, ne mata abo a miketo.
14 Ami pa kumona moyo wabo, ponkapo naimana, nanena ba bulēme+ ne baledi bampingakani ne bantu bakwabo amba: “Kemwakibatyinai.+ Vulukai Yehova, aye i mukatampe kadi ulenga nzuba;+ lwilai banabenu, benu bana bana-balume ne bana-bakaji, benu bakaji ne mobo enu.”
15 Penepo balwana netu pa kwivwana’mba tubayuka byobadi balonga ne amba Leza wa bine wavutakanya mpango yabo, batwe bonso twajoka kukengila lubumbu.
16 Tamba dine difuku’dya, kipindi kimo kya bana-balume bami kyadi kingila,+ kipindi kikwabo mu bukata mwabo kikwete mikobe, mangabo, mata a miketo, ne makotyi a byuma. Kadi bamfumu+ badi bemene kunyuma kwa njibo yonso ya Yuda
17 badi bōbaka lubumbu. Boba badi basela biselwa badi bengila mwingilo na kuboko kumo koku bakwete kyabulwi na kuboko kukwabo.
18 Mūbaki yense wadi usomekele kipete mu kifuka kyandi koku ūbaka, kadi yewa wa kuvumija lusengo+ wadi wimene kubwipi nami.
19 Kupwa nanena ba bulēme ne baledi bampingakani ne bantu bakwabo amba: “Mwingilo i mukatampe kadi i muvule, twi bazambalale pa lubumbu twishidile kyaba.
20 Shi mubaivwana kuvuma kwa lusengo, mwibungilei kotudi. Leza wetu usa kwitulwila.”+
21 Penepo twaendelela kwingila koku kipindi kikwabo kikwete mikobe, tamba lubanga bwē kutūla ne ku kutamba kwa ñenyenye.
22 Mu kine kitatyi’kya nanena bantu amba: “Bana-balume, muntu ense ne mwingidi wandi, balāle mu Yelusalema, kadi basa kwitulama bufuku ne kwingila dyuba.”
23 Ebiya ami nansha ke banabetu, ne bengidi bami,+ ne balami badi banonda ketwavūdilepo bivwalwa byetu nansha dimo, kadi batwe bonso twadi tukwete kyabulwi mu kuboko kwa lundyo.
Kunshi kwa Dyani
^ Nansha’mba “kufītwa.”
^ Nansha’mba “basela biselwa bilēma.”
^ Kishima pa kishima i, “misunsa dikumi.”
