Nkindi 22:1-29
22 Dijina diyampe* difwaninwe kutongwa kupita’ko bupeta bukatampe;+Kulēmekwa* i kupite buya ndalama ne olo.
2 Mpeta ne mulanda beifwene* pa kino kintu:
Yehova webalongele bonso babidi.+
3 Mukosoke umonanga kibi wefya,Ino bampikwa bwino bendelelanga’tu ne kwangula bipa bibi.*
4 Bipa bya kwityepeja ne kutyina YehovaI bupeta ne ntumbo ne būmi.+
5 Miba ne bidiba bidi mu kashinda ka muntu mukondame,Ino yewa ense ulēmekele būmi bwandi* wibisonsolokelanga kulampe.+
6 Fundija mwana mwana-mulume* dishinda dyafwaninwe kwenda’mo;+Nansha shi wanunupa kakasāsuka’mopo.+
7 Mpeta ubikalanga mulanda,Kadi yewa wapula i umpika wa yewa wapuja.+
8 Yewa ense ukuna bukondame ukangula kyamalwa,+Kadi mukombo wa bukalabale bwandi ukafula.+
9 Muntu wa buntu* ukeselwa dyese,Mwanda wiabilanga byakudya byandi na mulanda.+
10 Panga muntu wa kibengo,Nabya bulwi bukapwa;Lupata* ne mutonko bikafula.
11 Yewa usenswe mutyima utōka ne wa binenwa biyampe,Mulopwe ukekala mulunda nandi.+
12 Meso a Yehova alamanga buyuki,Ino Aye ufulamunanga binenwa bya ndalandala.+
13 Muzoze unenanga’mba: “Panja padi ntambo!
Basa kungipaya mu bukata mwa kīkwe!”+
14 Kyakanwa kya bana-bakaji boneke* i kīna kilampe.+
Yewa muponejibwe na Yehova ukaponena’mo.
15 Bulembakane i bukutyile mu mutyima wa mwana mwana-mulume,*+Ino lusonde lwa bulemununi lukebufundwila kulampe nandi.+
16 Yewa udimba mulanda mwanda wa kuvudija bupeta bwandi+Ne yewa upa mpeta byabuntuBakafula ku bulanda.
17 Tebeka kutwi kobe wivwane binenwa bya wa tunangu,+Amba witabije buyuki bwami na mutyima onso,+
18 Mwanda bisangajanga kwibilama munda mobe,+Amba abyo byonso bikale nyeke ku milomo yobe.+
19 Mwanda wa lukulupilo lobe lwikale mudi Yehova,Nakupe buyuki dyalelo dino’di.
20 Mwene nakulembēle kala,Nakupa madingi ne buyuki,
21 Mwanda wa kukufundija binenwa bya bine ne bikulupilwa,Amba ujoke na musapu wa bine kudi mwine wakutumine?
22 Kokanyoñomona mulanda mwanda’tu i mulanda,+Kadi kokavingakanya mupēlulwe mu kibelo kya kibundi,+
23 Mwanda Yehova mwine ukebanenena+Kadi ukayata būmi bwa* boba bebadimba.
24 Kokapwana na muntu wa kaloboloboNansha kwenda na yewa keje kukalabala,
25 Kutyina nobe wakefunda mashinda andiNe kupya mu dikinga abe mwine.+
26 Kokekala mu bukata mwa boba bekunka maboko mwanda wa kyeya,Batūla kyeya mwanda wa mapu.+
27 Shi kudipo na kintu kya kufuta,Bakakuyata butanda bobe!
28 Kokatundulula kiyukeno kya mukalo kya kalaKyatūdile bakulutuba bobe.+
29 Le kodi mumone muntu wa bwino mu mwingilo wandi?
Ukemananga ku meso a balopwe;+Kakemanapo ku meso a bantu bitupu.
Kunshi kwa Dyani
^ Kishima pa kishima i, “Kwitabijibwa.”
^ Nansha’mba “Kutumbila biyampe.” Kishima pa kishima i, “Dijina.”
^ Kishima pa kishima i, “betananga.”
^ Nansha’mba “mambo.”
^ Nansha’mba “muya wandi.”
^ Nansha’mba “mwana; mwanuke.”
^ Kishima pa kishima i, “Yewa wa diso diyampe.”
^ Nansha’mba “Kwisambila.”
^ Nansha’mba “mwana; mwanuke.”
^ Nansha’mba “ukanyoñomona muya wa.”
