Nkindi 31:1-31
31 Binenwa bya Mulopwe Lemwele, mwanda musumininwe wamulombwele inandi mwanda wa kumufundija:+
2 Le nkulombole bika le, a wami mwana,Bika, a mwana wa ndá yami,Ne bika le, a mwana wa mpiko yami?+
3 Kokapāna bukomo bobe ku bana-bakaji,+Nansha kulonda mashinda onakanyanga balopwe.+
4 Kebifwaninwepo balopwe, abe Lemwele,Kebifwaninwepo balopwe kutoma vinyuNansha bendeji kunena’mba: “Le bitomibwa byami bidi kwepi?”+
5 Kutyina’mba bakatoma kebelwa mbila iletelweNe kunyengakanya byepelo bya boba bapēlulwe.
6 Pāna bitomibwa bikolwañana ku boba boneka+Ne vinyu ku boba badi mu tusua twa malwa.*+
7 Wibaleke batome belwe bulanda bwabo;Wibaleke bavulaminwe makambakano abo.
8 Nenena kamāma;Lwila byepelo bya boba bonso boneka.+
9 Nena ne kutyiba mambo moolokele;Lwila byepelo bya* mupēlulwe ne mulanda.+
א [Aleph]
10 Lelo i ani ubwanya kutana mukaji nkanka?*+
Bulēme bwandi i butabuke kulampe bwa mabwe a kolaye.*
ב [Beth]
11 Wandi mulume umukulupile mu mutyima wandi,Kadi kabulwangapo kintu kya bulēme.
ג [Gimel]
12 Upalanga mulume mpalo miyampe, ke mibipo,Mafuku onso a būmi bwandi.
ד [Daleth]
13 Usokolanga myoya ne bukonge;Usangelanga kwingila na maboko andi.+
ה [He]
14 Udi pamo bwa byombo bya bansunga,+Uselanga byakudya byandi kulampe.
ו [Waw]
15 Kadi ubūkanga abo bukidi bufuku,Usokolanga byakudya bya ba mu njibo yandiNe bipindi bya bengidi bandi bana-bakaji.+
ז [Zayin]
16 Ulañanga budimi kadi wapota’bo;Udimanga budimi bwa mañanza na kususuka na mingilo.*
ח [Heth]
17 Wilongololanga mwanda wa mingilo mikomo,*+Kadi ukomejanga maboko andi.
ט [Teth]
18 Umonanga’mba bya busunga byandi i bimwenwa’mo;Kinanu kyandi kekibulangapo bufuku.
י [Yod]
19 Maboko andi akwatanga kibunda kya nyushi,Kadi maboko andi akwatyijanga kinoa kya nyushi.*+
כ [Kaph]
20 Ubādilanga yewa mupēlulwe kikasala kyandi,Kadi uvungulwilanga mulanda maboko andi.+
ל [Lamed]
21 Kaselelangapo ba mu njibo yandi mutyima kūlu mwanda wa mashika mekwateKe-pantu bonso ba mu njibo yandi bavwele bivwalwa bileta kyanga.*
מ [Mem]
22 Upuñanga bya kupūta pa butanda bwandi.
Bisandi byandi i bya bukonge ne myoya ityilakana.
נ [Nun]
23 Wandi mulume i muyukane biyampe mu bibelo bya kibundi,+Mwine mwashikatanga mu bukata mwa bakulumpe ba ntanda.
ס [Samekh]
24 Upuñanga bivwalwa bya bukonge* upotoloja’byoKadi upotejanga mikaba ku bansunga.
ע [Ayin]
25 Uvwele bukomo ne buya bwa dyangi,Kadi utalanga mafuku a kumeso na kikulupiji.*
פ [Pe]
26 Wasamanga kyakanwa kyandi na tunangu;+Kijila kya kanye* kidi pa ludimi lwandi.
צ [Tsade]
27 Utalanga mingilo ya ba mu njibo yandi,Kadi kadyangapo mukate wa bukope.+
ק [Qoph]
28 Bandi bana bemananga kebamutela bu wa nsangaji;Wandi mulume wimananga kamutendela.
ר [Resh]
29 Kudi bana-bakaji bavule bankanka,*Ino abe—wibapityile bonso.
ש [Shin]
30 Bupopoke bubwanya kwikala bwa bubela, kadi buya nabo bubwanya kwikala bwa mu kitatyi kityetye,*+Ino mwana-mukaji utyina Yehova ukatendelwa.+
ת [Taw]
31 Mupale mpalo yandi pa byobya byalonga,*+Kadi mingilo yandi imutendele mu bibelo bya kibundi.+
Kunshi kwa Dyani
^ Nansha’mba “boba ba muya ulula.”
^ Nansha’mba “Nena mambo a.”
^ Nansha’mba “mulumbuluke.”
^ Tala Nshintulwilo ya Bishima.
^ Nansha’mba “na bintu byamona.” Kishima pa kishima i, “na bipa bya makasa andi.”
^ Kishima pa kishima i, “Ukutanga kifuka kyandi na bukomo.”
^ Kibunda kya nyushi ne kinoa kya nyushi i tumityi twadi twingidijibwa mwanda wa kujinga nansha kusuka nyushi.
^ Kishima pa kishima i, “bibidi.”
^ Nansha’mba “bya munshi”
^ Nansha’mba “usepanga difuku dya kumeso.”
^ Nansha’mba “Bulombodi bwa buswe; Kijila kya buswe bwa ndamatyidile.”
^ Nansha’mba “balumbuluke.”
^ Nansha’mba “bwa bitupu.”
^ Kishima pa kishima i, “mupe kipa kya andi maboko.”
