Yelemia 26:1-24
26 Ku ngalwilo kwa bulopwe bwa Yehoyakimi+ mwanā Yoshia, mulopwe wa Yuda, kino kinenwa kyatamba kudi Yehova amba:
2 “Yehova wanena namino amba, ‘Imana mu kipango kya njibo ya Yehova wisambe myanda ya* bantu bonso ba bibundi bya Yuda bāyanga kutōta* ku njibo ya Yehova. Wibasapwile bintu byonso byonkusoñanya; kokatalula’mo kinenwa nansha kimo.
3 Padi bakevwana kadi muntu ne muntu ukavundamina dishinda dyandi dibi, nami nkashinta milangwe yami pa* kyamalwa kyonadi nanga kwibaletela pa mwanda wa bilongwa byabo bibi.+
4 Wibalombole amba: “Yehova wanena namino amba, ‘Shi kemukangivwenepo, muleke kulonda kijila* kyonatūla ku meso enu,
5 ne kwivwana binenwa bya bengidi bami bapolofeto, bonemutumina kyaba ne kyaba,* ino banwe kwibevwana mpika,+
6 nabya nkalonga ino njibo pamo bwa Shilo,+ kadi nkalonga kino kibundi ke kintu kya mafingo ku mizo yonso ya pa ntanda.’”’”+
7 Ebiya babitobo ne bapolofeto ne bantu bonso baivwana Yelemia wisamba bino binenwa mu njibo ya Yehova.+
8 Yelemia pa kupwa’tu kwisamba byonso byamusoñenye Yehova kwisamba ku bantu bonso, penepo babitobo ne bapolofeto ne bantu bonso bamukwata kebamunena’mba: “Bine usa kufwa.
9 Mwanda waka unena bupolofeto mu dijina dya Yehova amba, ‘Ino njibo ikekala pamo bwa Shilo, kadi kino kibundi kikasalwa, mushale mwampikwa mwikadi’?” Ebiya bantu bonso bajokoloka Yelemia mu njibo ya Yehova.
10 Bamfumu ba Yuda pa kwivwana bino binenwa, bataluka ku njibo* ya mulopwe bakandila ku njibo ya Yehova, bashikata pa ntwelelo ya kibelo kipya kya Yehova.+
11 Babitobo ne bapolofeto balombola bamfumu ne bantu bonso amba: “Uno muntu ufwaninwe kupebwa mfuto ya lufu,+ mwanda wanena bupolofeto bubi pa kino kibundi monka momwaivwanina na matwi enu.”+
12 Penepo Yelemia walombola bamfumu bonso ne bantu bonso amba: “I Yehova wantumine kunena bupolofeto bwa bino binenwa byomwaivwana bitala ino njibo ne kino kibundi.+
13 Shi ke pano, lumbululai mashinda enu ne bilongwa byenu, kadi kōkelai diwi dya Yehova Leza wenu, Yehova nandi ukashinta milangwe yandi pa* kyamalwa kyaanena pomudi.+
14 Ino amiwa, ami uno mu makasa enu. Nongei kyonso kyomumona bu kiyampe ne kyoloke mu meso enu.
15 Inoko yukai na bubine amba shi mubangipaya, mukasela mashi ampikwa mambo banwe ne kino kibundi ne bekadi bakyo, mwanda na bubine Yehova wantumine komudi mwanda wa kwisamba bino binenwa byonso mu matwi enu.”
16 Penepo bamfumu ne bantu bonso banena babitobo ne bapolofeto amba: “Uno muntu kafwaninwepo mfuto ya lufu, mwanda wesambe netu mu dijina dya Yehova Leza wetu.”
17 Kadi bakulumpe bamo ba ntanda’ya baimana kebesambe na kipwilo kyonso kya bantu amba:
18 “Mika+ wa ku Moleshete wadi unena bupolofeto mu mafuku a Hezekia+ mulopwe wa Yuda, kadi walombwele bantu bonso ba Yuda amba, ‘Yehova wa bibumbo wanena namino amba:
“Ziona ukadimwa pamo bwa budimi,Yelusalema nandi ukekala ke milwi ya masala,+Kadi lūlu lwa Njibo* lukekala pamo bwa mitenta mu ditó.”’*+
19 “Le Hezekia mulopwe wa Yuda ne Yuda ense bamwipaile? Mwene watyinine Yehova ne kuzenza Yehova amutōkelwe mutyima,* penepo Yehova nandi washinta milangwe yandi pa* kyamalwa kyaanenene pobadi?+ Pano ketusake kwiletela kyamalwa batwe bene.*
20 “Kadi kudi muntu mukwabo wadi unena bupolofeto mu dijina dya Yehova, Udiya mwanā Shemaia wa ku Kidiata-Yeadimi,+ wanenene bupolofeto bubi pa kino kibundi ne pa ino ntanda na binenwa pamo na bya Yelemia.
21 Mulopwe Yehoyakimi+ ne bana-balume bandi bonso bakomokomo ne bamfumu bonso baivwene binenwa byandi, kadi mulopwe wasakile kumwipaya.+ Ino Udiya pa kwivwana’o, ponkapo wakwatwa moyo wanyemena ku Edipito.
22 Penepo Mulopwe Yehoyakimi watuma Elenatana+ mwanā Akabola ne bana-balume bakwabo pamo nandi ku Edipito.
23 Basela Udiya ku Edipito baiya nandi kudi Mulopwe Yehoyakimi, nandi wamwipaya na kipete,+ waela umbidi wandi mufwe mu kabudi kajīkwanga’mo bantu bonso.”
24 Ino Ahikama+ mwanā Shafana+ wakwasha Yelemia, kutyina bakamupāna ku bantu amba bamwipaye.+
Kunshi kwa Dyani
^ Nansha’mba “ku.”
^ Nansha’mba “kwivukwila.”
^ Nansha’mba “nkealakanya pa.”
^ Nansha’mba “bulombodi.”
^ Kishima pa kishima i, “nanguka lubanga futwi nebatuma.”
^ Nansha’mba “njibo mikatakata.”
^ Nansha’mba “ukealakanya pa.”
^ Nansha’mba “lūlu lwa tempelo.”
^ Nansha’mba “mukuna wa mityi.”
^ Nansha’mba “wealakanya pa.”
^ Nansha’mba “pa myuya yetu.”
^ Nansha’mba “kutompa kunekenya mpala ya Yehova.”
