Yelemia 50:1-46
50 Yehova wesambile kino kinenwa kupityila kudi mupolofeto Yelemia pa mwanda wa Babiloni,+ pa mwanda wa ntanda ya bene Kaladea amba:
2 “Nenai’kyo mu mizo kadi sapulai’kyo.
Imikai kiyukeno* kadi sapulai’kyo.
Kemwakifyai kintu nansha kimo!
Nenai amba, ‘Babiloni wakwatwa.+
Bele wafwijibwa bumvu.+
Melodake watuyuka.
Bankishi bandi abafwijibwa bumvu.
Bilezaleza byandi bya mukenye* bibatuyuka.’
3 Mwanda muzo utamba kungala ubaiya kulwa nandi.+
Ubaalamuna ntanda yandi ke kintu kya nzuba;I kutupu muntu ushikete’mo.
Ne muntu ne nyema abanyema;Abaenda.”
4 “Mu oa mafuku ne mu kine kitatyi’kya,” i Yehova unena, “bantu ba Isalela ne bantu ba Yuda bakāya pamo.+ Bakenda badila,+ kadi bakakimba Yehova Leza wabo pamo.+
5 Bakepangula dishinda dyenda ku Ziona, koku mapala abo atadidile’ko,+ kebanena’mba, ‘Iyai twilunge kudi Yehova mu kipwano kya nyeke kekikavulaminibwapo.’+
6 Bantu bami abaikala ke luombe lwa mikōko mijimine.+ Bakumbi babo bebalubije.+ Bebendeje mu ngulu, bebajokoloja ku ngulu ne ku mikuna. Abailwa kifuko kyabo kya kukōkolokwa.
7 Boba bonso bebatana bebasasamuna,+ kadi balwana nabo banena’mba, ‘Ketudipo na mambo, mwanda i balubile Yehova, kīkalo kya boloke ne lukulupilo lwa bakulutuba babo, ke Yehova kadi.’”
8 “Nyemai mu bukata mwa Babiloni,Tambai mu ntanda ya bene Kaladea,+Kadi ikalai pamo bwa banyama batangidile kumeso kwa luombe.
9 Mwanda nsa kwimikila Babiloni ne kumuletelaKitango kya mizo mikatampe kitamba ku ntanda ya kungala.+
Bakamutamba mu milongo ya bulwi;Bakamukwatyila kwine’kwa.
Miketo yabo idi pamo bwa ya muntu wa bulwiIpaya bana;+Keijokangapo pampikwa kulonga kintu.
10 Kaladea ukekala ke kikwatwa.+
Boba bonso basela’mo bikwatwa bakekuta bininge,”+ i Yehova unena.
11 “Mwanda banwe mwasangele,+ mwasepelelePomwatūtyile bupyani bwami.+
Mwanda mwatūtwile maulu pamo bwa ñombe mwana mu biyombo,Kadi mwadidile pamo bwa tubalwe tulume.
12 Inenu wafwijibwa bumvu.+
Aye wemubutwile watyumukwa mutyima.
Talai! I mutyetyetyetye mu mizo,Mu ntanda mutuputupu mwampikwa mema ne mu ntanda mudi zolē.+
13 Kemukekalwapo pa mwanda wa kufītwa mutyima kwa Yehova;+Ukekala ke masala onkaonka.+
Muntu yense upityila ku Babiloni ukatala na moyoNe kwila muluji mwanda wa bipupo byandi byonso.+
14 Tambai Babiloni ku mitamba yonso mu milongo ya bulwi,Banwe bonso bakana* buta bwa miketo.
Mwasei, kemwakijimijai muketo nansha umo,+Mwanda i Yehova waalubila.+
15 Mutūtei kyungwe kya divita ku mitamba yonso.
Wetūla aye mwine.*
Bikomo byandi bibapone, mumbu yandi ibapomoka,+Mwanda i kinongo kya Yehova.+
Mwalwijei kinongo.
Mulongei enka mwaalongele.+
16 Tyiba’ko mukushi wa nkunwa mu BabiloniNe yewa wingidija kikwakwa kitatyi kya mwangulo.+
Pa mwanda wa kipete kibikibi, muntu ense ukajokela ku bantu bandi,Muntu ense ukanyemena ku yandi ntanda.+
17 “Bantu ba Isalela i mikōko mipalakane.+ Bantambo abebapalakanya.+ Mulopwe wa Ashidia webasasamwine bidi;+ kupwa Nebukaneza* mulopwe wa Babiloni nandi walala mikupa yabo.+
18 O mwanda Yehova wa bibumbo, Leza wa Isalela, wanena namino amba: ‘Nsa kulonga mulopwe wa Babiloni ne yandi ntanda monka monalongele mulopwe wa Ashidia.+
19 Nkajokeja Isalela ku madyo andi,+ nandi ukadya pa Kalamela ne pa Bashane,+ kadi ukekuta* pa ngulu ya Efelaimi+ ne ya Ngileade.+
20 “Mu oa mafuku ne mu kine kitatyi’kya,” i Yehova unena,“Mambo a Isalela akakimbwa,Ino keakekala’kopo,Kadi bubi bwa Yuda kebukasokolwapo,Mwanda nkalekela boba bonashiya bōmi.”+
21 “Kandai mukalwe na ntanda ya Melataimi ne bekadi ba Pekoda.+
Mwibatukijei ne kwibonakanya fututu,”* i Yehova unena.
“Longai byonso byonemusoñanya.
22 Mu ntanda mudi lunwa lwa divita,Kimpengele kikatampe.
23 Yō kitotwa kya ntanda yonso kibatētwa ne kutyumunwa!+
Yō Babiloni waalamuka ke kintu kya nzuba mu mizo!+
24 A Babiloni nakute dikinga, nobe ubapi’mo,Kadi kwadipo widiyukile.
Bakutene mupye’mo,+Mwanda i Yehova owalwile nandi.
25 Yehova washitula kibīko kyandi,Kadi watambija byabulwi bya kufītwa mutyima kwandi.+
Mwanda Mfumu Mwinē Lupusa Lonso, Yehova wa bibumbo, udi na mwingiloMu ntanda ya bene Kaladea.
26 Tambai ku bifuko bya kulampe mulwe nandi.+
Shitulai bibīko byandi bya miseke.+
Mubungei pamo bwa milwi ya miseke.
Monakanyei fututu.*+
Kemwakashala muntu nansha umo.
27 Tukijai bañombe bandi bonso bana;+Bende kukatapwa.
Malwa abo, mwanda difuku dyabo dibafika,Kitatyi kyabo kya kupebwa mfuto!
28 Kudi lunwa lwa banyema lubilo,Boba banyema ku ntanda ya Babiloni,Mwanda wa kusapula mu Ziona kinongo kya Yehova Leza wetu,Kinongo kya pa mwanda wa tempelo yandi.+
29 Itai bela miketo balwe na Babiloni,Bonso bakana* buta bwa miketo.+
Mutūdilei nkambi kufulakufula konso; kekwakapanda nansha umo.
Mulubwilei mwendele mingilo yandi.+
Mulongei enka mwaalongele.+
Mwanda walongela Yehova bintu na kibengo,Mwine Ujila wa Isalela.+
30 O mwanda bansongwalume bandi bakapona mu bīkwe byandi,+Kadi basola bandi bonso bakafwa* mu dyadyo difuku,” i Yehova unena.
31 “Tala! Nsa kulwa nobe,+ abe ntomboki,”+ i Mfumu Mwinē Lupusa Lonso, Yehova wa bibumbo unena,“Mwanda difuku dyobe dikafika, kitatyi kyonkakwita wishintulwile.
32 Abe ntomboki, ukakukala ne kupona,Kwa kubulwa muntu wa kukulangula.+
Nkasōka bibundi byobe mudilo,Nao ukaloteja bintu byonso bikujokolokele.”
33 Yehova wa bibumbo wanena namino amba:
“Bantu ba Isalela ne Yuda abamone malwa,Kadi boba bonso bebasela bu misungi bebakwete.+
Abapele kwibalekelela bende.+
34 Ino Mukūdi wabo i mukomo.+
Dijina dyandi i Yehova wa bibumbo.+
Bine ukebanenena mu kisambo,+Mwanda wa kupa ntanda kukōkolokwa+Ne kuletela bekadi ba Babiloni kavutakanya.”+
35 “Kipete kidi pa bene Kaladea,” i Yehova unena,“Pa bekadi ba Babiloni ne pa bamfumu bandi ne pa bantu bandi bonso ba tunangu.+
36 Kipete kidi pa boba banenakanya bya bitupu,* kadi bakalonga bya bulembakane.
Kipete kidi pa bantu bandi ba bulwi, bakatuyuka.+
37 Kipete kidi pa tubalwe twabo ne pa makalo abo a divita,Ne pa bantu bonso basobakane badi mu bukata mwandi,Bakekala pamo bwa bana-bakaji.+
Kipete kidi pa byabulēme byandi, kadi bikatūtwa.+
38 Mema andi abaoneka, akōma.+
Mwanda i ntanda ya bankishi basōnge,+Kadi baloñanga bya bulubi mwanda wa bimonwa byabo bilenga moyo.
39 O mwanda bipangwa bya mu ntanda mudi zolē bikekala pamo na banyema badila,Kadi mukekalanga makolongo.+
Kemukekalapo monka bantu,Kadi kekikekalapo bu kifuko kya kushikata’mo ku nkongo yonsololo.”+
40 “Monka mobaponejeje Sodoma ne Ngomola+ ne bibundi bya kubwipi+ kudi Leza,” i Yehova unena, “i kutupu nansha umo ukekala’mo, kadi i kutupu muntu nansha umo ukashikata’mo.+
41 Tala! Bantu bakāya kutamba kungala;Muzo mukatampe ne balopwe bakatampe+ bakemanaKu bipindi bya kulampe bininge bya ntanda.+
42 Bengidijanga buta bwa miketo ne mukobe.+
I babibabi kadi kebadipo na lusa.+
Lunwa lwabo ludi pamo bwa kutūta kwa dijiba,+Pobakandile pa tubalwe twabo.
Abepange mu milongo ya bulwi kulwa nobe pamo bwa muntu umo, abe mwanā Babiloni mwana-mukaji.+
43 Mulopwe wa Babiloni waivwana myanda yabo,+Maboko andi abapone.+
Moyo ubamukwata,Misanshi pamo bwa ya mwana-mukaji ubutula.
44 “Tala! Muntu umo ukakanda kutamba madyo a mutyima-ntenke pamo bwa ntambo utamba mu bivunda* bijike bya kufula kwa Yodano, ino mu kitatyi kityetye nkebanyemeja kwadi. Kadi nkamutūdila mutongwe wa kumuludika.+ Mwanda, le i ani udi pamo bwa ami, ne i ani ukankolomona? I mukumbi’ka ubwanya kwimana ku meso ami?+
45 O mwanda, a bana-balume ivwanai butyibi* bwakwata Yehova pa Babiloni+ ne byalanga pa ntanda ya bene Kaladea.
Bine twana twa mu luombe tukabululwa.
Ukasala kīkalo kyato pa mwanda wabo.+
46 Lunwa lwa kukwatwa kwa Babiloni, lukatenkanya ntanda,Kudila kukevwanwa mu mizo.”+
Kunshi kwa Dyani
^ Nansha’mba “mutyi wa kiyukeno.”
^ Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
^ Kishima pa kishima i, “batonta.”
^ Kishima pa kishima i, “Wapāna kuboko kwandi.”
^ Kishima pa kishima i, “Nebukadeleza,” mulembelo mukwabo wa dino dijina.
^ Nansha’mba “muya wandi ukekuta.”
^ Nansha’mba “kwibonakanya.”
^ Nansha’mba “Monakanyei.”
^ Kishima pa kishima i, “batonta.”
^ Kishima pa kishima i, “bakatalajibwa.”
^ Nansha’mba “bapolofeto ba bubela.”
^ Nansha’mba “bifinga.”
^ Nansha’mba “madingi.”
