Yoshua 20:1-9
-
Bibundi bya kunyemena’mo (1-9)
20 Kupwa Yehova wanena Yoshua amba:
2 “Sapwila bene Isalela amba, ‘Mwitongelei bibundi bya kunyemena’mo+ byonemulombwele kupityila kudi Mosesa,
3 amba yewa wipaya muntu* kwampikwa kusaka nansha mu kitulumukila* anyemene’mo. Kadi bikekala byenu bya kunyemena’mo pa kutyina muntu ulubula kinongo kya mashi.+
4 Ntapañani ufwaninwe kunyemena mu kibundi kimo pa bino+ ne kwimana pa ntwelelo ya kibelo kya kibundi+ kalombola wandi mwanda mu matwi a bakulumpe ba kine kibundi’kya. Nabo bafwaninwe kumutweja mu kibundi ne kumupa kifuko kadi ukashikata nabo.
5 Ino shi muntu ulubula kinongo kya mashi wamulonda, kebafwaninwepo kupāna yewa wipaile muntu mu makasa andi, mwanda waipaile mukwabo mu kitulumukila* kadi kadipo umushikilwe kala.+
6 Ufwaninwe kushikata mu kibundi’kya enka ne byaimana mu kidye ku meso a kitango+ ne kadi ukekala monka enka ne bikafwa kitobo mukatampe+ wingila mu kine kitatyi’kya. Penepa yewa wipaile muntu’wa ukokeja kujokela mu kibundi mwaanyemene, kadi ubwanya kutwela mu kibundi kyabo ne mu njibo yandi.’”+
7 Ebiya bapandula* Kadesha+ mu Ngadilea mu ntanda ya ngulu ya Nafatale, ne Shekema+ mu ntanda ya ngulu ya Efelaimi, ne Kidiata-Alāba,+ ko kunena’mba Hebelona mu ntanda ya ngulu ya Yuda.
8 Mu ntanda ya Yodano, kutunduka kwa Yediko, batonga Bezele+ mu kisaka kya Lubeni mu ntanda mutuputupu pa mutenta,* batonga Lamote+ mu Ngileade mu kisaka kya Ngade,+ ne Ngolane mu Bashane mu kisaka kya Manase.+
9 Bino byo bibundi byatongēlwe bene Isalela bonso ne beni ba kibundi bashikatanga mu bukata mwabo, amba yense wipaya muntu* kwampikwa kusaka anyemene’mo+ kutyina’mba wakafwa ku makasa a muntu ulubula kinongo kya mashi aye kaimene mu kidye ku meso a kitango.+
Kunshi kwa Dyani
^ Nansha’mba “kutapa muya.”
^ Nansha’mba “pampikwa kuyuka.”
^ Nansha’mba “pampikwa kuyuka.”
^ Nansha’mba “batūla pafula.”
^ Nansha’mba “nzaba ya peulu.”
^ Nansha’mba “muya.”
