“Ponakidi mwanuke, difuku ne difuku tutu wadi unkupila bya binebine ne kunshola mutonko. Ami pa kusongwa, lolo muko nandi wadi’nka unsusula. Aye pamo ne tata muko badi bamona’nka bwa umpika. Nadi kenanga enka ne kwitundika.”—Madhu, a wa mu India.

 Kitango kya Ntanda Kitala Bukomo bwa Ngitu (OMS) kinena’mba: “Kususula bana-bakaji i kuzambalale kujokoloka ntanda yonso.” Kino kitango kimona’mba mu kitatyi kampanda kya mu būmi, mwana-mukaji umo mu basatu, ususulwanga na bikupilwa nansha konwa na bulādi.

 Shi kino ke kikufikile, padi ubwanya kwivwana moyo amba konso koenda babwanya kukususula’ko na bikupilwa, kukutuka, nansha kulāla nobe ku bukomo. Kuno kususulwa kwa bana-bakaji kubwanya kukulengeja ulange amba bantu bavule kebamwenepo bana-bakaji na mvubu. Ino le bine Leza umwene bana-bakaji na mvubu?

 Kisonekwa: “[Leza] wēbapanga ba mwana-mulume ne mwana-mukaji.”—Ngalwilo 1:27.

 Mokishintulwila: Leza wāpangile bana-balume ne bana-bakaji. Ku meso a Leza abo bonso bafwaninwe kupebwa bulēme. Ne kadi, usakanga mulume “[asanswe] mukajandi mwaesanshilwe aye mwine,” pa kyaba kya kumutādila na binenwa bisansa nansha kumususula. (Bene Efisesa 5:33; Bene Kolose 3:19) Na bubine, Leza utele mutyima bininge ku kukinga bana-bakaji.

 “Ponadi mwanuke, babutule bami balēle nami ku bukomo. Ponabwenye myaka 17, mukulu wami wa kaji wanenene amba usa kuntalula pa kaji shi napele kulāla nandi. Kadi ponadi kendi mutame, mulumyami, bambutwile, ne bantu bakwabo kebadipo banongela bintu na bulēme. Inoko mwenda mafuku, nefundile myanda ya Umpangi, Yehova. b Aye ulēmekele bana-bakaji. Kino kyankulupije amba bine unsenswe kadi ngidi na bulēme ku meso andi.”—Maria, wa mu Arjantine.

 Kisonekwa: “Kudi mulunda ulamata bininge kupita mwanabo.”—Nkindi 18:24.

 Mokishintulwila: Mulunda wa bine ukakukwatakanya. Shi umona’mba i byendele’mo, sapwila muntu okulupile mowiivwanina.

 “Mu bula bwa myaka 20 nkyasapwidilepo muntu nansha umo amba balēle nami ku bukomo. Kino kyaumbudije nsangaji, naikala na moyo ne kutyumukwa mutyima. Inoko mfulo mfulō, ponasapwidile muntu untele mutyima ino myanda yauntene, neivwene biyampe mu muswelo okulangilapo.”—Elif, wa mu Tirki.

 Kisonekwa: “[Elai] kuzumbazumba kwenu konso [kudi Leza], mwanda aye wimutele mutyima.”—1 Petelo 5:7.

 Mokishintulwila: Kitatyi kyolombela, Leza wivwananga. (Ñimbo ya Mitōto 55:22; 65:2) Byakutele mutyima, ubwanya kukukwasha wivwanije amba udi na mvubu mikatampe.

 “Kwifunda myanda ya Yehova, kwaunkomeje bilonda byadi bintapile ku mutyima. Pano mbwanya kulombola Leza myanda yami mu milombelo. Udi pamo bwa mulunda wivwanija senene moneivwanina.”—Ana, wa mu Belize.

 Kisonekwa: “Yehova . . . ukatyiba mambo a mwana wampikwa shandi ne a boba basonsakanibwe, amba muntu wa kufwa wa pa ntanda kakibakwatyija monka moyo.”—Ñimbo ya Mitōto 10:​17, 18.

 Mokishintulwila: Panopano ponka, Leza usa kutalula’ko bukondame, mwine mubadilwa ne kususula bana-bakaji nansha kwibona.

 “Ponaivwene amba panopano ponka Yehova usa kutalula’ko masusu asusulwa bana-bakaji batame ne banuke bene, byadi enka bwa ami watoma bwanga butalaja misanshi. Naikele na ndoe ya mutyima.”—Roberta, wa mu Meksike.

 Shi ukimba kuyukila’ko bivule pa lukulupilo luleta Bible, pa bubinga bwine bofwaninwe kukulupidila mu milao ya mu Bible, ne pa muswelo ukwashanga Batumoni ba Yehova bantu bakwabo kupityila ku Bible, lomba kupempulwa ku bitupu kudi.

 Tentula kino kishinte mu bupunga bobwanya kwikitampa.