Sean Gladwell/Moment via Getty Images
KESHAI’NKA KUKESHA!
Madepanse a Kupota Byabulwi bya Basola Ntanda Yonso I Matabuke pa Madolala Midiyala 2000—Le Bible Unena’po Namani?
Madepanse a kupota byabulwi bya basola ntanda yonso avudīle’ko bininge kufika mu madolala midiyala 2 240 mu 2022. Kadi nakampata, i pa mwanda wa divita dya kutambwa kwa ntanda ya Ikrene na Rusi. Mungya lapolo yalupwilwe mu Kweji 4, 2023 na Bulongolodi bwa Matanda bwa Bukimbi pa Myanda Itala Ndoe bwa Stockholm, mu 2022:
Madepanse a kupota byabulwi bya basola mu Bulaya “avudīle’ko misunsa 13 pa katwa mu bula bwa mwaka. Kuno i kuvudila’ko kukatampe pa mwaka kekwamwekele tamba kupwa kwa divita dya munshimunshi.”
“Ntanda ya Rusi i mivudijije’ko madepanse a byabulwi bya basola kintu kya misunsa 9 pa katwa. Yadi ntanda ya butano, pano ke ya busatu mu matanda alonga madepanse mavule mu kupota byabulwi ntanda yonso.”
Ntanda ya États-Unis ishele pa kifuko kibajinji, na “bipindi 39 pa katwa mu madepanse a ntanda yonso a mu myanda ya byabulwi.”
“Madepanse a kupota byabulwi byoenda’nka avudila’ko, i kilomboji kilombola’mba tudi mu ntanda yenda ibudilwa’ko bininge mutyima-ntenke,” ye byanenene Nan Tian, dokitele mu myanda ya misokwe, kadi ubadilwa mu boba baletele lapolo ya Bulongolodi bwa Matanda bwa Bukimbi pa Myanda Itala Ndoe.
Bible wālaile amba mu kino kyetu kitatyi, kubulwa kumvwañana kwa imbikalo mikomo kukavudila’ko. Inoko kadi witulombola kintu kimo kete kikaleta ndoe.
Bible wālaile amba kwīlwa kwa basola kukavudila’ko
Bible utela kino kitatyi kyotudi’mo bu “kitatyi . . . kya mfulo.”—Danyele 8:19.
Mukanda wa Danyele wālaile amba mu kino kitatyi, kukekala kwīlwa kwa imbikalo mikomo. Ino imbikalo mikomo yadi ya ‘kwitakika,’ nansha kwīlwa mwanda wa kukimba kutādila ntanda. Mu kuno kwīlwa, imbikalo yadi ya kujimija “byabulēme” bivule, nansha lupeto.—Danyele 11:40, 42, 43.
Pa kuyukila’ko bivule pa buno bupolofeto bwa mu Bible bukunka mutyima, tala video Bupolofeto Ke Bufikidile—Danyele Shapita 11.
Mukekadila’ko ndoe ya bine
Bible unena’mba Leza ukapingakanya malopwe a bantu. “Ukemika bulopwe kebukonakanibwapo nansha dimo. Kadi buno bulopwe kebukapebwapo bantu bakwabo, mhm. Bukavingakanya ne kufudija ano malopwe onso, kadi abo kete bukemananga nyeke.”—Danyele 2:44.
Yehova a Leza usa kulonga panopano ponka byobya bikomenwe bantu kulonga—ko kunena’mba, kuleta ndoe ya bine kadi ya nyeke. Muswelo’ka? Bulopwe bwandi bwa momwa mūlu busa kutalula’ko byabulwi byonso ne kufudija bya lūma.—Ñimbo ya Mitōto 46:8, 9.
Pa kuyukila’ko bivule pa bikalonga Bulopwe bwa Leza, tanga kishinte “Mu Bulopwe bwa Leza ‘Ndoe Ikavula.’”
a Yehova i dijina dya Leza dya bunka.—Ñimbo ya Mitōto 83:18.