Kupwila kwa kwenda mu busapudi kudi’nka na kupwila konso kwa pa kipwilo, kutudile’ko Yehova mwanda wa kwitukwasha twikankamike ku buswe ne ku mingilo milumbuluke. (Bah 10:24, 25) Kunenwe kulonga minite itano kutula ku isamba-ibidi, kubadila’mo kwabanya basapudi, mwaba ne milombelo. (Shi kupwila kwa kwenda mu busapudi ku balonda kupwila kukwabo kufwaninwe kwipipijibwa.) Mwimaniji ufwaninwe kuteakanya myanda ikakwasha bantu pobenda mu busapudi difuku’dya. Kimfwa shi bavule batenwe ku kupwila kwa kwenda mu busapudi dya mposo, kebatambilepo mu busapudi yenga wapityile, mwimaniji ukesambila pa byobya bibwanya kwisamba musapudi na mwinē njibo. Le i myanda’ka mikwabo ya kamweno ibwanya kwisambilwa’po?

• Musapwilo wa kulondela’po wa pa Kabuku ka ku Kupwila Būmi ne Mwingilo Wetu​—wa Bwine Kidishitu

• Muswelo otubwanya kwisambila pa mapya ne myanda milongeke pa kushilula misambo

• Mwa kunekenenya kijika kyotuvudile kutana

• Mwa kwisambila na muntu utuna kwikala’ko kwa Leza, ukulupile mu kwialamuna, wisamba ludimi lukwabo, nansha muntu wiile mu wetu mwaba ino katene’mopo kipwilo kyandi

• Mwa kwingidijija myanda idi pa site ya jw.org, JW Library^®, nansha Bible

• Mwa kwingidijija kingidilwa kya mu Bingidilwa bya Kufundija Nabyo

• Mwa kwikadila na mumwekelo muyampe potusapula ku telefone, ku mikanda, mu busapudi bwa bantu bavule, potulonga kujokela’mo nansha potwendeja bifundwa bya Bible

• Bivulujo bya mwa kwikadila badyumuke mu busapudi, kukwatañanya musapwilo mungya ngikadilo yotutana’mo muntu, kwisamba bya bulēme, kwikala na mumweno muyampe ne bikwabo

• Tala bifundwa ne mavideo bya mu boloshile Wielele’ko Kutanga ne Kufundija

• Mwa kukwashisha ne kukankamika omusapula nandi

• Mwa kulombwela omusapula nandi kisonekwa kisambila pa busapudi nansha kumukankamika na myanda mimweke ya mu busapudi