Davida wānekenye Ngodiata mwanda wādi ukulupile’nka mudi Yehova. (1Sa 17:45) Yehova wingidijanga bukomo bwandi mwanda wa kukinga bengidi bandi. (2Bi 16:9) Le i bika byotubwanya kulonga bilombola’mba tukulupile mu bukwashi bwa Yehova pa kyaba kya kwikulupila mwanda ketudi bemwene bivule nansha kukulupila bukomo bwetu? Tala ino miswelo isatu:

• Kulombela kitatyi ne kitatyi. Kokekala na kibidiji kya kulombela enka shi ubalonga kilubo kosake Yehova akulekele, ino lombela Yehova akupe bukomo bwa kūminina matompo. (Mat 6:12, 13) Ke biyampepo kulomba’nka Yehova esele butyibi bokwete kala, ino ikala ne na kibidiji kya kumulomba akuludike ne kukupa tunangu kumeso kwa kukwata butyibi.​—Yak 1:5

• Kwikala na kibidiji kya kutanga Bible ne kwifunda’ye. Anza kutanga Bible difuku ne difuku. (Ñi 1:2) Witudile’ko kyaba kya kulangulukila pa bimfwa bya bantu ba mu Bible, kadi ingidija myanda yowifunda. (Yak 1:23-25) Ikala na kibidiji kya kwiteakanya kumeso kwa kwenda mu busapudi pa kya kwikulupila mwanda kodi mwibidile busapudi ne kuyuka myanda mivule. Ikala na kibidiji kya kuteakanya kupwila kumeso kwa kitatyi, mwanda kulonga namino kukakukwasha umwene’mo.

• Ingidila pamo na bulongolodi bwa Yehova. Ikala nyeke na kibidiji kya kuyuka bulombodi bwa panopano butamba ku bulongolodi ne kwibulonda ponka na ponka. (Umb 9:17) Londa madingi a bakulumpe ne bulombodi bobaleta.​—Bah 13:17

TALAI VIDEO I KUTUPU KYA KUTYININA KUPANGWAPANGWA, KUPWA LONDOLOLAI BINO BIPANGUJO:

• Le batutu ne bakaka badi na moyo wa bika?

• Le i bika byebakweshe bakomene moyo obadi nao?