1, 2. Mwanda waka tubwanya kunena’mba Mulopwe Davida wādi ujingulwile mwikadile kubulwa lulamato?

 MULOPWE DAVIDA wādi ujingulwile mwikadile kubulwa lulamato nansha kwipāna. Kyaba kimo balwana bādi batamba bulopwe bwandi bujinajina mu bunwanwa, enka ne nkuku ya bantu ba mu muzo wandi. Kadi Davida waālamukilwe enka ne na bantu baādi ukulupile bu balunda nandi ba pa mutyima. Tala Mikale, mukaji umbajinji wa Davida. Dibajinji, Mikale “wadi usenswe Davida,” na kumukwatakanya mu mingilo ya bulopwe. Ino mwenda mafuku, “washilula kumufutulula mu mutyima wandi,” wāfula’nka ne ku kumona Davida “bwa muntu wampikwa ñeni.”—1 Samwele 18:20; 2 Samwele 6:16, 20.

² Kadi kwādi ne Ahitofele, mudingidi wa Davida. Madingi andi ādi malēmekwe’nka na atamba kudi Yehova. (2 Samwele 16:23) Ino kitatyi pa kupita’po, uno muntu mukulupilwe waālamuka ke nzazangi ne kwilunga ku nkuku ya butomboki bwa kutombokela Davida. Le kalenga-byanzwe wa buno butomboki i ani? Mwene i Abisalome, mwanā Davida! Uno ndalandala “wadi wiba mityima ya bantu ba Isalela,” ne kwitūla bu mulopwe walwana. Lwana lwa Abisalome lwākolele lwālengeja Mulopwe Davida anyeme kutyina wakafwa.—2 Samwele 15:1-6, 12-17.

3. Le Davida wādi na kikulupiji’ka?

³ Le kudi ne muntu wāshele na lulamato kudi Davida? Mu makambakano onso, Davida wādi uyukile amba udi’ko. Le i ani? Ke ungipo, i Yehova Leza. Davida wānene Yehova amba “kudi wa lulamato nobe wikalanga na lulamato.” (2 Samwele 22:26) Le lulamato i bika, ne Yehova i mulete kimfwa kiyampe mu ino ngikadilo namani?

4, 5. (a) Le “lulamato” i bika? (b) Le i lwishile namani na bubinebine?

⁴ “Lulamato” mungya molwingidijibwe mu Bisonekwa bya Kihebelu i kanye kalamata na buswe ku kintu ne kwikilekelela mpika kufika’nka ne bifikidila kitungo kyako ku kintu’kya. Lushintulula bivule kupita bubinebine. Kadi, muntu ubwanya kwikala wa binebine mu byobamulombele. Ino lulamato alo lutamba ku buswe. a Ne kadi, kishima “bubinebine” kikokeja kwingidijibwa ne ku bintu. Kimfwa, mulembi wa mitōto wāityile kweji bu “kamoni wa binebine mūlu,” mwanda umwekanga nyeke bufuku. (Ñimbo ya Mitōto 89:37) Ino ketukanenapo amba kweji udi na lulamato. Mwanda waka? Mwanda lulamato lulombolwanga na buswe—kintu kekibwanyapo kulongwa na bintu.

⁵ Mungya Bisonekwa, lulamato i ngikadilo ya kyanga. Muswelo oimweka ulombola’mba padi kipwano pa muntu wiilombola ne yewa obalombwela’yo. Lulamato ke lwa dimodimopo. Keludipo bwa mabimbi a pa dijiba ashinta mungya luvula. Inoko, lulamato, nansha buswe bwa  ndamatyidile, kelujinangapo kadi ludi na bukomo bwa kunekenya ne bijika bikatampe mpata.

6. (a) Le lulamato i lusakane namani mu bantu, ne Bible unena’po namani? (b) Le i muswelo’ka muyampe wa kwifunda mwikadile lulamato ne mwanda waka?

⁶ Eyo, luno lulamato i lusakane dyalelo. Divule dine, kudi “balunda kebejepo kwisanshija.” Twimvwananga kyaba kyonso besongele benyema. (Nkindi 18:24; Malaki 2:14-16) Buzazangi i buvule enka ne batwe bene twafula ku kunena bwa mupolofeto Mika amba: “Muntu wa lulamato waoneka pa ntanda.” (Mika 7:2) Nansha bantu byobakomenwanga divule kulombola lulamato, ino ayo i ngikadilo ya kutendelwa idi na Yehova. Muswelo muyampe wa kwifunda mwikadile lulamato, i kubandaula muswelo umwekeja Yehova kino kipindi kikatampe kya buswe bwandi.

7, 8. Mwanda waka tunena amba Yehova ye wa lulamato bunka?

⁷ Bible unena padi Yehova amba: “Abewa bunka bobe ye wa lulamato.” (Kusokwelwa 15:4) Le bikokejika namani? Le bantu ne bamwikeulu, i kutupu ke mulombole lulamato lutendelwa? (Yoba 1:1; Kusokwelwa 4:8) Le Yesu Kidishitu nandi? Le ke muntupo wa “lulamato” wa Leza? (Ñimbo ya Mitōto 16:10) Penepo mwanda waka banene amba Yehova bunka bwandi ye wa lulamato?

⁸ Vuluka’mba lulamato i kipindi kya buswe. Leza byadi “i buswe”—mwanda bumuntu bwandi bwinebwine i buswe—i ani ubwanya kulombola potō lulamato kupita Yehova? (1 Yoano 4:8) Na bubine, bamwikeulu ne bantu babwanya kumwekeja ngikadilo ya Leza, ino enka Yehova kete ye wa lulamato mu muswelo keudingakanibwapo. Byadi “Mukulu wa Mafuku,” i mulombole lulamato mu kitatyi kilampe kupita kipangwa kyo-kyonso kya mūlu ne kya pano panshi. (Danyele 7:9) Nanshi, Yehova ye nsulo mine ya lulamato. Umwekejanga ino ngikadilo mu muswelo keubwanyapo kumwekeja’yo kipangwa nansha kimo. Tala bimfwa bimo.

9. Le Yehova i “wa lulamato mu byonso byalonga” namani?

 ⁹ Yehova i “wa lulamato mu byonso byalonga.” (Ñimbo ya Mitōto 145:17) Mu muswelo’ka? Ñimbo ya Mitōto 136 ulondolola’po. I mutelwe bilongwa bivule bya Yehova bya kupandija, kubadila’mo ne bya mwaānyongolwedile bene Isalela mu kingelengele pa Dijiba Dityila. Kadi vese ne vese wa uno mutōto ukomeneja na kunena’mba: “Buswe bwandi bwa ndamatyidile bulādilanga nyeke.” Uno mutōto udi ne mu  Bipangujo bya Kulangulukila’po bidi pa paje 289. Potanga ano mavese, kukabulwepo kutengwa na buvule bwa miswelo ilombwela’mo Yehova buswe bwa ndamatyidile ku bantu bandi. Bine Yehova ulombolanga lulamato ku bantu bandi ba kikōkeji na kuteja kwabija kwabo ne kulonga’po kintu pa kitatyi kitungwe. (Ñimbo ya Mitōto 34:6) Buswe bwa ndamatyidile bwa Yehova ku bengidi bandi kebujiminangapo kitatyi kyonso kyobamukōkele.

10. Le Yehova ulombolanga namani lulamato ku misoñanya yandi?

¹⁰ Kadi, Yehova ulombolanga lulamato ku bengidi bandi na kwikala wa bine ku misoñanya yandi. Kadipo pamo bwa bantu bajinajina, baludikwa na kitumbuzaji ne mīdimuko, Yehova kashintangapo mu muswelo wamona byoloke ne bibi. Mu bula bwa tununu twa myaka, umwene majende, kutōta bankishi, ne kwipayañana enka mwaādi wibimwenine pa kala. Wānene kupityila kudi mupolofeto wandi Isaya amba, “enka ne byomununupa, nkekala muswelo umo.” (Isaya 46:4) Nanshi, tubwanya kukulupila amba tukamwena mu kulonda bwendeji bwimvwanike bwa mu mwikadilo budi mu Kinenwa kya Leza.—Isaya 48:17-19.

11. Leta bimfwa bilombola’mba Yehova i wabinebine ku milao yandi.

¹¹ Kadi Yehova ulombolanga lulamato na kufikidija milao yandi. Shi walaya kintu, poso’nka kifikidile. Yehova wānene amba: “Kinenwa kitamba mu kyakanwa kyami kekikajokelapo kondi kulonga kintu mpika, ino kikafikidija binebine kyonso kyondoelelwe, kadi kikalonga binebine  kyokya kyonekitumine kulonga.” (Isaya 55:11) Yehova wilombolanga bu wa lulamato ku bantu bandi na kufikidija binenwa byandi. Kebalekangapo basele mutyima kūlu na kwilaija kintu kya kasakilepo kufikidija. Ntumbo ya Yehova mu uno mwanda i miyukane yāfikije Yoshua mwingidi wandi ku kunena’mba: “Kekudipo mulao nansha umo wakankelwe kufikidila mu milao yonso miyampe yalaile Yehova njibo ya Isalela; yonso yafikidile.” (Yoshua 21:45) Nanshi tubwanya kukulupila amba Yehova kaketufwijapo bumvu nansha dimo, na kukomenwa kufikidija milao yandi.—Isaya 49:23; Bene Loma 5:5.

12, 13. Le buswe bwa ndamatyidile bwa Yehova “bulādilanga nyeke” mu buluji’ka?

¹² Enka motwekimwenanga kūlu, Bible utela buswe bwa ndamatyidile bwa Yehova amba “bulādilanga nyeke.” (Ñimbo ya Mitōto 136:1) Muswelo’ka? Kimo bidi, Yehova ulekelanga bubi lonso. Enka motwesambile’kyo mu Shapita 26, Yehova kapengapo muntu mfuto mwanda wa bilubo byandi byaāmulekele kala. Bonso byobapile “mambo kadi kebafikilangapo pa ntumbo ya Leza,” nanshi tufwaninwe kufwija’ko Yehova pa kumona’mba buswe bwandi bwa ndamatyidile bulādilanga nyeke.—Bene Loma 3:23.

¹³ Inoko buswe bwa ndamatyidile bwa Yehova bulādilanga nyeke mu buluji bukwabo. Kinenwa kyandi kinena’mba moloke “ukekalanga bwa mutyi mukunwe ku tuminonga twa mema, mutyi upa bipa pa kitatyi kyao, ne mani ao nao kufumba mpika. Kadi bintu byonso byalonga bikendeka.” (Ñimbo ya Mitōto 1:3) Langa’po mutyi uvwambila kufumba mpika! Netu shi tusangele binebine Kinenwa kya Leza, būmi bwetu bukekala bulampe, bwa ndoe kadi botuloelelwa. Madyese apāna Yehova ku bengidi bandi ba lulamato i a nyeke. Ne kutatana mpika, bantu ba kikōkeji bakemwena buswe bwa ndamatyidile bwa Yehova nyeke ne nyeke mu ntanda mipya myoloke.—Kusokwelwa 21:3, 4.

14. Le Yehova ulombola namani amba usangelanga lulamato lwa bengidi bandi?

¹⁴ Yehova i mulombole lulamato lwandi misunsa mivule. Yehova byalombola’lo nyeke, nanshi lulamato lwandi ku bengidi bandi ba kikōkeji kelukashinikapo nansha dimo. Mulembi wa mitōto wālembele amba: “Nadi mwanuke pano natama, ino nkyamwene moloke mwelwe, nansha bandi bana bakimba byakudya. Mwanda Yehova usenswe boloke, kadi kakelapo bantu bandi ba lulamato.” (Ñimbo ya Mitōto 37:25, 28) Bine, Yehova byadi Umpangi, nanshi ye otufwaninwe kutōta. (Kusokwelwa 4:11) Kadi Yehova byadi wa lulamato, ukwete na mutyika bilongwa byetu bya kikōkeji.—Malaki 3:16, 17.

15. Shintulula mwāmwekele buswe bwa ndamatyidile bwa Yehova mu muswelo waādi wikele na Isalela.

¹⁵ Mu buswe bwandi bwa ndamatyidile, Yehova ukwashanga kyaba kyonso bantu bandi shi abatanwa na bikoleja. Mulembi wa mitōto witusapwila’mba: “Aye ulamanga būmi bwa bantu bandi ba lulamato; wibakūlanga mu kuboko kwa babi.” (Ñimbo ya Mitōto 97:10) Tala muswelo waādi wikele na muzo wa Isalela. Pa kupwa kwibanyongolola mu kingelengele pa Dijiba Dityila, bene Isalela bātumbije Yehova mu lwimbo amba: “Mu buswe bobe bwa ndamatyidile ubaendeja bantu bowakūdile.” (Divilu 15:13) Kunyongololwa pa Dijiba Dityila kyādi bine kilongwa kya buswe bwa ndamatyidile bwa Yehova. Mosesa ko kunena bene Isalela amba: “Yehova pawemusenswe kisanso kikatampe ne kwimutonga, ke pa mwandapo wa buvule bomwadi kupita bantu bonso, ke-pantu mwadi batyetye bininge mu bantu bonso. Ino, i mwanda Yehova wemusenswe kadi walamine mutyipo wandi waatyipīle bakulutuba benu, o mwanda Yehova wemulupwile na kuboko kwa bukomo, wemukūla mu njibo ya bupika, mu lupusa lwa Felo mulopwe wa Edipito.”—Kupituluka mu Bijila 7:7, 8.

16, 17. (a) Le bene Isalela bālombwele namani kubulwa kufwija’ko, ino Yehova wēbalombwele lusa namani? (b) Mwanda waka ku bene Isalela bavule ‘byakomene’nka ne kwibondapa,’ ne mwanda waka i kidyumu kotudi?

 ¹⁶ Ino muzo wa Isalela wākomenwe kufwija’ko pa buswe bwa ndamatyidile bwa Yehova, mwanda abo’tu pa kupwa kunyongololwa, “badi enka bamupya [Yehova] mambo, na kutombokela Mwine wa Peulu Mwine.” (Ñimbo ya Mitōto 78:17) Mu bula bwa myaka tutwa, bādi’nka bamutombokela, kwalamukila ku bileza bya bubela ne ku bilongwa bya Bajentaila bine byādi bibasubija. Ino Yehova kātyumwinepo kipwano kyandi. Yehova wāzenzele bantu bandi kupityila kudi mupolofeto Yelemia amba: “Abe Isalela mushetemuke, joka, . . . Nkikemutalepo munshi na bukalabale, mwanda ami ne wa lulamato.” (Yelemia 3:12) Monka motwekimwenine mu Shapita 25, bene Isalela bavule kebāshintyilepo. Inoko, “abo badi’nka bazawila mikendi ya Leza wa bine, kadi bafutulula binenwa byandi ne kubenga bapolofeto bandi.” Byāfula kwepi? “Kufika ne byaile bukalabale bwa Yehova pa bantu bandi, byakoma’nka ne kwibondapa.”—2 Bilongwa bya Mafuku 36:15, 16.

¹⁷ Le i ñeni’ka yotuboila ku ino myanda? I ya amba lulamato lwa Yehova ke lwa bupūte-mesopo nansha kelukalajibwa. Bine, Yehova i “muyule buswe bwa ndamatyidile,” kadi usangelanga kulombola lusa shi padi bubinga. Ino bikekala namani shi nonga-bibi ekale kūmija nshingo? Shi bidi nankyo, Aye Yehova usa kulamata ku misoñanya yandi myoloke ne kumutyibila mambo. Monka mwēkinenene Mosesa amba, “[Yehova] kakalekapo nansha dimo kupa kipya-mambo mfuto.”—Divilu 34:6, 7.

18, 19. (a) Mfuto ipānanga Leza kudi nonga-bibi i kilongwa kya lulamato namani? (b) Le Yehova ukalombola namani lulamato lwandi ku bengidi bandi bapangilwepangilwe kufika ne ku lufu?

¹⁸ Mfuto ipānanga Leza kudi nonga-bibi i kilongwa kya lulamato. Namani? Mwanda umo utanwa mu misoñanya ya  Yehova ku bamwikeulu basamba-babidi batelelwe mu Kusokwelwa amba: “Endai, kapungululei ngeso isamba-ibidi ya bulobo bwa Leza pa ntanda.” Pāpungulwile mwikeulu wa busatu lweso lwandi, “minonga ne masulo a mema,” nao alamuka ke mashi. Kupwa mwikeulu wasapwila Yehova amba: “Abe, Mwine udi’ko ne wādi’ko, Wa lulamato, wi moloke, ke-pantu ubatyibe buno butyibi, mwanda abo bamwangile mashi a bajila ne a bapolofeto, abe nobe ubebape mashi a kutoma; i bafwaninwe kino’ki”—Kusokwelwa 16:1-6.

¹⁹ Ubamone amba pa kufika pa bukata bwa uno musapu wa butyibi, mwikeulu watela Yehova bu “Wa lulamato.” Mwanda waka? Mwanda ponakanya Yehova babi, ulombolanga lulamato ku bengidi bandi, ne bavule mobadi bāikele kupangwapangwa kufika ne ku lufu. Yehova ulamanga bano bantu mu luté lwandi ponka pa lulamato lwandi. Uloelelwe kumona monka bano bantu ba kikōkeji, kadi Bible ulombola’mba kyasaka i kwibapala mpalo na kwibasangula. (Yoba 14:14, 15) Yehova kelwangapo bengidi bandi ba kikōkeji amba mwanda’po’tu ke bafwe. Ino, “kwadi bonso i bōmi.” (Luka 20:37, 38) Mpango ya Yehova ya kujokeja ku  būmi boba bonso badi mu luté lwandi i bukamoni bukatampe bwa lulamato lwandi.

20. Le “bintu bya lusa” i bāni, ne Yehova ulombolanga namani lulamato kobadi?

²⁰ Mu mānga yonso, Yehova i mulombole lulamato ku bantu ba kikōkeji. Eyo, ke myaka tununu na tununu Yehova yatūkijija “mutyima pakatampe bintu bya bukalabale bifwaninwe konakanibwa.” Mwanda waka? “Mwanda wa kuyukanya bupeta bwa ntumbo yandi pa bintu bya lusa, byawateakenye kala mwanda wa ntumbo.” (Bene Loma 9:22, 23) Bino “bintu bya lusa” i boba ba mityima myoloke bashingilwe māni a mushipiditu ujila mwanda wa kwikala bampyana pamo na Kidishitu mu Bulopwe bwandi. (Mateo 19:28) Pa  kushitwila bintu bya lusa kibelo kya kupandila’mo, Yehova i mulame lulamato lwandi kudi Abalahama, mwine waāsambile nandi kipwano na kulaya amba: “Kadi kupityila ku lutundu lobe mizo yonso ya pano panshi ikamonanga dyese dyayo ayo mine mwanda abe ubaivwana diwi dyami.”—Ngalwilo 22:18.

21. (a) Le Yehova ulombolanga namani lulamato ku “kibumbo kikatampe” kikulupile kutamba mu “kyamalwa kikatampe”? (b) Lulamato lwa Yehova lukutonona ulonge bika?

²¹ Kadi Yehova ulombolanga lulamato ne ku “kibumbo kikatampe” kikulupile kutamba mu “kyamalwa kikatampe” ne kwikala na būmi bwa nyeke mu paladisa pano pa ntanda. (Kusokwelwa 7:9, 10, 14) Nansha bano bengidi bandi byobadi ba kubulwa kubwaninina, Yehova mu lulamato lwandi i mwibape mukenga wa kwikala na būmi bwa nyeke mu paladisa pano pa ntanda. Le wibapanga’o namani? I kupityila ku kinkūlwa—kilomboji kikatampe kya lulamato lwa Yehova. (Yoano 3:16; Bene Loma 5:8) Lulamato lwa Yehova lukokanga boba basakasaka boloke mu mityima yabo. (Yelemia 31:3) Lelo mutyima obe keukutonwenepo kufwena Yehova pa lulamato lwandi lwalombwele ne lwakalombola kumeso? Byotusaka kufwena kudi Leza, twitabijei buswe bwandi na kuningija mutyima wetu wa kumwingidila na lulamato.