A Mutangi Muswe:

Lelo wimwene pabwipi na Leza? Bavule banenanga’mba, kebibwanikapo. Bamo batyina’mba Leza udi kulampe bininge; bangi nabo bemona bule pa kumufwena. Inoko Bible witwita na buswe amba: “Fwenai kudi Leza, nandi ukemufwena.” (Yakoba 4:8) Leza ukulupija’nka ne kukulupija batōtyi bandi amba: “Ami, Yehova Leza obe, nkwete kuboko kobe kwa lundyo, Mwine ukunena’mba, ‘Kokakwatwa moyo. Nkakukwasha”—Isaya 41:13.

Le tubwanya namani kupwana na Leza uno muswelo? Bulunda bo-bonso bushilulanga na kuyuka muntu, na kusangela ne kutendela ngikadila yandi imushiyañanya na bakwabo. Nanshi kwifunda ngikadila ya Leza, ne bilongwa byandi, mungya moilombwedilwe mu Bible kudi na mvubu. Kulangulukila pa muswelo umwekeja Yehova ngikadila yandi yonso, kutala muswelo mubwaninine wāiwile’yo Yesu, ne kumona muswelo otukokeja netu kutamija’yo, kuketulengeja tufwene Leza bininge. Tukajingulula’mba Yehova ye Mwinē Lupusa Lonso mufwaninwe kadi muyampe mūlu ne panshi. Ne kadi Aye, ye Tata otusakilwa. Mukomo, moloke, wa tunangu, kadi wa buswe, wampikwa kushiya nansha dimo bana bandi bamukōkele.

Tusaka dino dibuku dikukwashe ufwene pabwipi mpata na Yehova Leza, upwane nandi kipwano kekipu, amba umone būmi ne kumutendela nyeke ne nyeke.