DIFUKU dimo Mufundiji Mukatampe wāipangwile kipangujo kimo kitulumukwa. Amba: “Lelo lolo ne bāna betu i bāni le?” (Mateo 12:48) Le shi nobe wādi’po, longa wālondolwele kino kipangujo?—Padi uyukile kala amba inandya Yesu dyandi i Madia. Ino lelo uyukile majina a banababo bana-balume?—Le wādi kadi ne na banababo bana-bakaji?—

Bible unena amba banababo na Yesu bana-balume i ba ‘Yakoba, ne Yosefa, ne Shimona, ne Yudasa.’ Kadi Yesu wādi na banababo bana-bakaji bākidi bōmi paādi wenda usapula’pa. Yesu byaādi mwana umbedi, banababo bonso bādi bankasa.—Mateo 13:55, 56; Luka 1:34, 35.

Le banababo na Yesu nabo bādi bandi bana ba bwanga?—Bible unena amba dibajinji ‘kebadipo bamwitabija.’ (Yoano 7:5) Mafuku pa kupita’po, ba Yakoba ne Yudasa (wa dikwabo dya bu Yude) bāikala ke bandi bana ba bwanga, bālemba enka ne mikanda ya mu Bible. Lelo uyukile mikanda mine yobālembele?—I mukanda wa Yakoba ne wa Yude.

Nansha byokebatelelepo majina a banababo na Yesu bana-bakaji mu Bible, tuyukile amba wādi nansha na babidi. Inoko, bādi bakokeja ne kwikala bavule. Lelo bano bankasandi bana-bakaji nabo bāikele ke bandi bana ba bwanga?—Bible kanenepo kintu, o mwanda ketuyukilepo. Ino le uyukile kyāipangwidile Yesu amba, “Lelo lolo ne bāna betu i bāni le?”—Leka bidi twivwane.

Yesu wādi ufundija bandi bana ba bwanga, ebiya muntu umo wāmukalakanya’mba: ‘Inobe ne banabenu badi panja, basaka kwisamba nobe.’ Penepo Yesu wātwelela pa mwine mukenga’wa  kāfundija bufundiji bwa mvubu na kwipangula kino kipangujo kitulumukwa’mba: “Lelo lolo ne bāna betu i bāni le?” Wāolola kuboko kwandi kāfunka bandi bana ba bwanga ne kulondodidila aye mwine amba: ‘Tala, lolo ne banabetu aba shabo!’

Kupwa Yesu wāshintulula kyaādi usaka kunena, amba: “Ke-muntu yewa wakulonga kiswa-mutyima wa Tata wa mūlu, nabya ye tūtu ne kāka wami ne lolo.” (Mateo 12:47-50) Kino kilombola amba Yesu wādi upwene mpata na bandi bana ba bwanga. Wādi witufundija amba bandi bana ba bwanga bādi pamo’nka bwa banababo ba munda, ne bainandi.

Mu kine kitatyi’kya, banababo ba munda—Yakoba, Yosefa, Shimona, ne Yudasa—kebādipo betabije amba Yesu i Mwanā Leza. Kebādipo betabije byobālombwele inabo kudi mwikeulu Ngabudyele. (Luka 1:30-33) Nanshi bādi bakokeja kushikwa Yesu. Muntu yense ulonga namino kādipo ukokeja kwikala  mwanabo wa binebine. Le uyukile’ko muntu shi ani, shi ani ushikilwe mwanabo?—

Bible unena myanda ya ba Esau ne Yakoba ne muswelo Esau waākalabele byamwiko kānena’mba: “Nkatapanga mwanetu Yakoba.” Inabo Lebeka wākwatwa moyo mpata, penepo wātuma Yakoba kungi kulampe kutyina amba Esau wakamwipaya. (Ngalwilo 27:41-46) Inoko, myaka mingi pa kupita’po, Esau wāshinta, wāpamba Yakoba bīpa ne kumufifya.—Ngalwilo 33:4.

Mwenda myaka, Yakoba wābutula bana 12. Ino bana ba Yakoba bakulu kebādipo baswele nkasabo Yosefa. Bāmukwatyilwa mukao mwanda wādi mwana muswedibwe mpata na shabo. Pa kino, bāmupoteja ku bansunga bādi bepityila benda mu Edipito. Kupwa bākasapwila shabo amba Yosefa i mwipaibwe na banyema ba mu ntanda. (Ngalwilo 37:23-36) Mwene kino kyādi kilenga’nka ne moyo?—

Myaka pa kupita’po, banababo na Yosefa bealakanya pa byobālongele. Penepo Yosefa wēbalekela. Mwene ubamone amba Yosefa wādi pamo’nka bwa Yesu?—Batumibwa ba Yesu bāmunyemene paādi mu masusu,  Petelo wāmutuna enka ne kumutuna amba nkimuyukilepo. Ino, Yesu wēbafwidile abo bonso lusa, pamo’nka bwa Yosefa.

Ebiya kwādi ne bana na bana babidi, ba Kena ne Abele. Tubwanya kadi kuboila ñeni kobadi. Leza wāmwene mu mutyima wa Kena amba kādipo uswele mwanabo. Penepo Leza wānena Kena amba ufwaninwe kushinta mwikadilo obe. Shi Kena wādi uswele Leza binebine, longa wāivwene. Ino aye kādipo uswele Leza. Difuku dimo Kena wānena Abele amba: ‘Twaya mu ntanda.’ Abele wāenda na Kena. Pobādi bakidi mu ntanda mwa bunka bwabo, Kena wākupila mwanabo bibi wāmwipaya.—Ngalwilo 4:2-8.

Bible witusapwila amba tukokeja kuboila’ko ñeni mikatampe mpata. Lelo wiiyukile?—‘Uno o mwanda omwaivwene ne ku ngalwilo kwine’mba; twisanswei batwe bene na bene, e mokyendele’mo; ke pamopo bwa Kena watambile kwa yewa mubi.’ Nanshi bana na bana bafwaninwe kwisanswa abo bene na bene. Kebafwaninwepo kwikala pamo bwa Kena.—1 Yoano 3:11, 12.

I kika kinenenwa amba ke biyampepo kwikala bwa Kena?—Mwanda Bible unena amba ‘wātambile kwa yewa mubi,’ Satana Dyabola. Kena byaālongele pamo’nka bwa Dyabola, nanshi Dyabola wāikele pamo’nka bwa shandi.

Mwene ubamone mwanda waka i biyampe kuswa banabenu?—Shi kwibaswelepo, nabya i bana bāni boiula?—I bana ba Dyabola. Abe kukasakepo kwikala mwanā Dyabola, mwene i amo?—Penepo le ukalombola namani amba usakanga kwikala mwanā Leza?—I na kuswa banabenu bya binebine.

Ino buswe bwine i bika?—Buswe i milangwe ya munda itutonona twikale na mutyima wa kulongela bantu bakwabo bintu biyampe. Tulombolanga amba tuswele bakwetu shi twibalangila biyampe ne kwibalongela biyampe. Penepo banabetu bene  botufwaninwe kuswa i bāni le?—Vuluka, Yesu wāfundije amba i boba badi mu kisaka kikatakata kya bene Kidishitu.

Mwanda waka kuswa bano banabetu bene Kidishitu kudi na mvubu?—Bible unena’mba: “Yewa wakubulwa kuswa mwanabo o bēmwene nandi, kayūkapo kuswa Leza o kebēmwene nandi.” (1 Yoano 4:20) Nanshi ketufwaninwepo kuswa enka’tu bantu batyetye mu kisaka kya bwine Kidishitu. Tufwaninwe kwibaswa bonso. Yesu wānene amba: “Po ponka po bakemuyūkila bu-bana-bami-babwanga ponka pa kwisanswa mo mwikadile bānwe bene.” (Yoano 13:35) Lelo nobe uswele batutu ne bakaka bonso?—Vuluka amba, shi kwibaswelepo, nabya bine kuswelepo ne Leza mwine.

Le tubwanya kulombola namani amba tuswele banabetu binebine?—Eyo, shi twibaswele, ketuketolwelapo kulampe nabo mwanda wa kupela kwisamba nabo. Tukekala biyampe na bonsololo. Tukebalongela biyampe mafuku onso ne kwiabila nabo bintu na mutyima tō. Ne shi abakolelwa, tukebakwasha mwanda na bubine tudi mu kisaka kimo kikatampe.

Shi tuswele binebine banabetu bonso, le kino kilombola namani?—Kilombola amba twi bana ba bwanga ba Yesu, Mufundiji Mukatampe. Mwene ye motusakila kwikadila?—