ENKA moyukile kala, dyalelo bantu bekalanga banunupa, babela, ne kufwa bafwa. Enka ne bana batyetye bene nabo bafwanga. Lelo ufwaninwe kutyina lufu nansha muntu kampanda ufwile?—Lelo uyukile motwikadilanga shi tubafu?—

Na bubine, ku bantu bonso bakidi bōmi dyalelo dino, i kutupu nansha umo kadi mufwe ne kusanguka wa kwitulombola mwikadilanga boba bafwa. Inoko Yesu, Mufundiji Mukatampe, paādi pano pa ntanda, kwādi mwana-mulume umo wāfwile wāsanguka. Pa kutanga mwanda wa uno muntu, tusa kuyuka mwikadilanga boba bafwa. Uno mukelenge wādi mulunda na Yesu ne wādi wikalanga mu Betani, kibundi kityetye kya pabwipi na Yelusalema. Dijina dyandi i Lazalasa, ne kadi wādi na bana babo bana-bakaji babidi, ba Mata ne Madia. Shi ke pano tutale binena Bible pa mobyāpityile.

Difuku dimo Lazalasa wabela byamwiko. Papo Yesu nandi kulampe. Ebiya ba Mata ne Madia abatume mukendi wa kukalombola Yesu amba mwanabo Lazalasa wabela. Abatume mukendi mwanda bayukile amba Yesu ubwanya kwiya kundapa mwanabo. Eyo, Yesu ke muñangapo, inoko udi na bukomo bwa kwa Leza bwabwanya kundapa nabo mbá ya miswelo yonso.—Mateo 15:30, 31.

Ino kumeso kwa Yesu kwiya kutala Lazalasa, misongo ya Lazalasa ibakoma wafwididila. Inoko Yesu wasapwila bandi bana ba bwanga amba Lazalasa walāla mu tulo ne amba usa kwenda konka akamulangule. Bana ba bwanga kebevwanijepo i bika bisaka kunena Yesu. Penepo Yesu webasapwididila’tu biyampe amba: “Lazalasa wafu.” Lelo kino kilombola amba lufu ludi namani?—Bine, ko kunena amba  lufu ludi pamo’nka bwa tulo tukatampe. I tulo twa bukū twakubulwa nansha kilotwa kine.

Pano Yesu waiya kupempula ba Mata ne Madia. Balunda bavule ba kisaka ke bapwe kala kufika. I bāye kufwija bano bana-bakaji mwanda wa lufu lwa mwanabo. Mata pa kwivwana amba Yesu waiya, waenda kukamutundaila. Kepejije Madia nandi waenda kukalubula Yesu. Madia udi na bulanda mpata, udila ne kudila, o mwanda waponena ku maulu a Yesu. Balunda bakwabo badi balonda Madia nabo badila.

Mufundiji Mukatampe waipangula i kwepi kobatūdile Lazalasa. Ebiya bantu abakatwala Yesu ku muta kujikilwe Lazalasa. Yesu pa kumona bantu bonso badila, nandi washilula kudila. Mwanda uyukile amba kufwilwa muswedibwe kusansanga ku mutyima.

Ku muta i kujikwe dibwe, ebiya Yesu amba: ‘Fundulai dibwe’di.’ Lelo basa kufundula’dyo’ko?—Mata walanga amba uno ke mulangwepo muyampe. Penepo wanena’mba: “Abe Mfumwami, pano kanunka, le muntu mufwe mafuku ke aná nenki.”

Inoko Yesu wamulondolola’mba: “Le nkyakunenepo’mba: Shi witabije nankyo ukamonanga ntumbo ya Leza, a?” Yesu usaka kunena amba Mata usa kumona kintu kya kutumbija Leza ntumbo. Lelo Yesu usa kulonga kika? Pa kupwa kufundula’ko dibwe, Yesu walombela kudi Yehova na diwi dikatampe. Penepo Yesu wanena na diwi ditunduke amba: “Abe Lazalasa, lupukamo!” Lelo bine ukalupuka’mo? Bine?—

Tala bidi, lelo abe ukokeja kulangula muntu ulēle mu tulo?—Bine, shi wamwita na diwi dikatampe, usa kulanguka. Ino le ubwanya ne kulangula muntu ulēle mu tulo twa lufu?—Ehe. Nansha umwite na diwi dikatampe namani, muntu mufwe kakevwanapo. Kekudipo nansha umo, ekale i abe nansha ami nansha shi muntu’ka mukwabo udi pano pa ntanda dyalelo ubwanya kulangula muntu mufwe.

 Ino Yesu i mwishile na bonso. Udi na bukomo bwa kwa Leza bwishile na bwa bonso. O mwanda Yesu pa kwita Lazalasa, kubalongeka kintu kimo kya kwanwa. Bine, uno muntu wadi mufwe ke mafuku aná matuntulu watambe mu muta! Abamujokeja monka ku būmi! Bine, pano ukokeja kadi kwesa, kwenda ne kunena! I kya bine, Yesu wasangula Lazalasa mu bafwe.—Yoano 11:1-44.

Pano langa’po bidi: Lelo Lazalasa wādi namani paāfwile? Lelo kyandi kipindi kimo—shi muya, shi mushipiditu—kyātambile mu umbidi wandi kyākekala pantu pakwabo? Lelo muya wa Lazalasa wāendele mūlu? Lelo mu mafuku aná’mwa wādi mūmi ushikete pamo na Leza ne bamwikeulu bandi bajila?—

Ehe, kādipo mūmi. Vuluka, aye Yesu wānene amba Lazalasa wādi ulēle mu tulo. Le bikalanga namani shi nobe ulēle mu tulo? Shi uponene mu tulo tukatampe bukū, kukiyukapo bipita kufula kobe, mwene i amo?—Kadi ne pa kulanguka pene, kuyukapo ne bula bwa kitatyi kine kyowadi ulēle, poso enka utale ku nsaa.

 Ye mwikadile ne bantu bafwe bene. Kebayukilepo nansha kamo kene. Kebemvwanapo nansha kintu kimo. Kadi kekudipo kyobakokeja kulonga nansha kimo kine. Mo mwādi mwikadile ne Lazalasa kitatyi kyaādi mufwe. Lufu ludi pamo’nka bwa tulo tukatampe tulēle muntu twakakokejapo kuvuluka nansha kantu kamo kene. Bible unena’mba: “Bafwe kebayukilepo nansha kimo kine.”—Musapudi 9:5, 10.

Kadi langa’po kino nakyo: Shi bine Lazalasa wādi momwa mūlu mu ano mafuku aná, lelo longa wabudilwe kwisamba uno mwanda?—Shi kadi wādi mūlu, lelo longa Yesu wāmulupwile mu kyokya kīkalo kilumbuluke ne kumujokeja pano pa ntanda?—Na bubine, ke amopo!

Inoko, bantu bavule banenanga amba tudi na muya, ne kadi amba shi ngitu ibafu, muya keufwangapo. Banena amba muya wa Lazalasa wādi mūmi pantu kampanda. Ino Bible aye kanenepo nankyo. Unena amba muntu mubajinji Adama, Leza wāmulongele “muya mūmi.” Adama wādi muya. Kadi Bible unena amba Adama pa kulonga bubi, wāfwile. Wāikala ke “muya mufwe,” wājokela monka ku luvumbi kwaālupwilwe. Bible unena kadi amba lutundu lwa Adama nalo lwāpyene bubi ne lufu.—Ngalwilo 2:7; 3:17-19; Umbadilo 6:6; Loma 5:12.

 Nanshi i kimweke patōka amba ketudipo na muya musansane na umbidi wetu, ehe. Umo ne umo potudi’pa ye muya mwine. Ne kadi bantu byobapyene bubi kudi muntu mubajinji, Adama, Bible unena’amba: “Mūya uloñanga bubi, kufwa ukafwanga.”—Ezekyele 18:4.

Bantu bakwabo batyinanga bafwe. Kebasakangapo kwenda pabwipi na bibundu mwanda balañanga amba bafwe badi na myuya misansane na maitu abo ne amba ikokeja kulonga bōmi bibi. Lelo muntu mufwe ubwanya kusanshija muntu mūmi?—Ehe, kabwanyapo.

Bantu bakwabo bakulupile amba bafwe bakokeja kujoka mu luvula kwiya kupempula bōmi. O mwanda mwine batūdilanga bafwe bidibwa. Inoko bantu balonga namino kebetabijepo kine kinena Leza pa mwikadile bafwe. Shi twitabije binena Leza, nabya ketukatyinapo bafwe. Ne shi bine tudi na mutyima wa kufwija’ko Leza pa mwanda wa būmi, nabya tukalonga bintu bitabijibwe na Leza.

Inoko ukokeja padi kwiipangula’mba: ‘Lelo Leza ukajokejanga bana bafwa ku būmi? Lelo bine usakanga kwibajokejeja’ko?’ Tukesambila’po mu shapita ulonda’ko’u.