LELO kudi muntu kampanda kemukulubile?​—Lelo wakulongele kintu kisansa’ni nansha wakunene bibi?​—Lelo nobe ukamulongela bibi na mwaakulongele aye?​—

Bantu bavule shi abebalubila, nabo bajokejejanga muntu’wa enka kibi’kya. Inoko Yesu wāfundije amba tufwaninwe kulekela boba betulubila. (Mateo 6:12) Le tukalonga namani shi muntu wetulubila misunsa mivule? Le tufwaninwe kumulekela misunsa inga?​—

Kino kyo kyādi kisaka kuyuka Petelo. Ebiya difuku dimo wāipangula Yesu amba: ‘Lelo nkamulekela kufika ne ku misunsa isamba-ibidi’ni?’ Misunsa isamba-ibidi i mityetye. Yesu wānene amba: ‘Ufwaninwe kumulekela misunsa makumi asamba-abidi ne isamba-ibidi’ shi muntu wakulubila misunsa mivule namino.

Bine, i misunsa mivule! Mwanda ketukokejangapo kubala bungi bwa bilubo nansha bintu bibi bitulubīle muntu, mwene i amo? Kino kyo kyētusapwidile Yesu amba: Ketwakasomonwai kubala bungi bwa bilubo bitulubila bakwetu. Shi abetulombe lusa, nabya tufwaninwe kwibalekela.

Yesu wādi usaka kulombola bandi bana ba bwanga kamweno kakatampe kadi mu kwikala na lulekelo. Ebiya pa kupwa kulondolola kipangujo kya Petelo,  wāsekunwinine bandi bana ba bwanga lusango lumo. Lelo nobe usaka kwivwana’lo?​—

Kwādi mulopwe umo muyampe. Wādi na kanye mpata. Wādi wapuja’nka ne lupeto ku bapika bandi shi abafudilwa. Ino difuku dyādi disaka mulopwe amba bapika bandi bamufute lupeto lobāmwapwile dyābwana. Ebiya, bāmuletela yewa wāapwile mulopwe bityele midiyo 60 bya lupeto. Bine, lwādi lupeto lungi mpata!

Ino mupika’ye wādi ke mudye lupeto lwa mulopwe lonso ne mwa kujokejeja’lo mulopwe  mwine mwakoma. Ebiya mulopwe wāsoñanya amba bamupoteje. Kadi mulopwe wānena amba bapoteje ne mukaja mupika mwine, ne bandi bana bene ne byonso byaādi nabyo. Ebiya lupeto lobebapota nalo’lwa lukafutwa mulopwe. Le momwena yao mupika wēivwene mu bidyoma namani?​—

Wāfukata mu manwi ku mpala kwa mulopwe kāmwisāshila’mba: ‘Bantūkijije’ko bidi mutyima, nkakulubwila byonso byonkwapwile.’ Shi wādi amba abe ye mulopwe, le longa wālongele mupika’wa bika?​—Mulopwe wākwatyilwe mupika wandi lusa. Ebiya mulopwe wāmulekela mambo. Wāsapwila mupika amba kakifuta monka nansha lupeto lutye, nansha kakityele kamo kene ka ku byobya bityele midiyo 60 mine. Bine, ye kino kyāsangeje mupika’wa mpata!

Ino kupwa papo, le i kika kyālongele mupika? Wāfundukile wāsambakana umpika mukwabo, wāmwapwile enka’tu bityele katwa kete. Wāfina mupika mukwabo’wa lukono, amba: ‘Mfute katwa ka lupeto lowangapwile!’ Lelo ubwanya kulanga amba muntu ukitamba mu kulekelwa bivule na mulopwe ukokeja kulonga kala kintu kya uno muswelo?​—

Na bubine, mupika’wa waāpwile enka bityele katwa bya lupeto wādi mulanda mulume nobe. Kādipo ubwanya kufuta lupeto’lwa ponka na ponka. O mwanda mwine waāponene ku maulu a umpika mukwabo, kāmwisāshila’mba: ‘Bantūkijije’ko bidi mutyima, nkakulubwila byonso byonkwapwile.’ Lelo uno muntu wātūkijije mupika mukwabo mutyima?​—Shi wādi abe longa wālongele’po namani?​—

Uno muntu kādipo biyampe, na mwādi mwikadile mulopwe. Wādi usaka lwandi lupeto lumweke’nka ponka’pa. Mupika mukwabo byakādipo na muswelo wa kufuta’lo, wākamweleja mu kifungo. Ino bapika bakwabo pa kumona mobyāpityile’mwa, kebyēbatōkejepo ku mutyima. Bāfitwa ku mutyima fututu pa mwanda wa mupika wādi mu kifungo’wa. Penepo bāenda kukalombola’byo mulopwe.

Mulopwe nandi kātōkelwepo mutyima nansha dimo pa byālongele mupika’wa. Wākalabela bininge yewa mupika wampikwa lulekelo.  Ebiya wāmwita, kamunena’mba: ‘Abe mupika mubi, le nkinakulekelangapo byobya byonso byowāngapwile? Mwene nobe wadi ufwaninwe kulekela mukwenu momumuninwe?’

Uno mupika wampikwa lulekelo wādi wa kuboila ñeni kudi mulopwe muyampe’wa. Ino yō, kāikelepo kuboila’ko ñeni. O mwanda mwine mulopwe wāeleje mupika’wa mu kifungo enka ne byapwa kufuta bityele byonso midiyo 60 bya lupeto. Byaādi kadi mu buloko, kādipo kadi na mwakumwena nansha dimo lupeto lwa kujokejeja mulopwe. Nanshi wāshele’mo lonso enka ne byaāfwile.

Yesu paāpwile kusekununa luno lusango, wāsapwila bandi bana ba bwanga’mba: “I enka namino ne Tata wa mūlu, aye ukemulongela monka, shi kadi bānwe bonso ku muntu, ku muntu, kemukalekele ne mutyima wa binebine mambo a bamwanenu.”​—Mateo 18:21-35.

Yuka amba, batwe bonso tudi na mapu makatampe kudi Leza. Na bubine, būmi bwetu bonso butamba kudi Leza! O mwanda mwine shi tudingakanye mapu otudi nao kudi Leza ne etwapwile bakwetu,  etwapwile bakwetu i matyetye. Mapu obetwapwile adingakene na bityele katwa bya lupeto byaāpwile mupika’wa kudi mukwabo. Inoko mapu otwapwile Leza pa mwanda wa bintu bibi byotuloñanga adingakene na byobya bityele midiyo 60 byaāpwile yewa mupika kudi mulopwe.

Leza udi na kanye kakatampe. Nansha shi tubalonga bintu bibi, aye witulekela mambo etu. Aye ketufutyijangapo mapu na kwitusuminwa būmi nyeke ne nyekeke. Inoko ñeni yotwaboila’ko yotufwaninwe kuvuluka i ino: Leza witulekelanga mambo etu enka shi netu tulekela bantu betulubila mambo abo. Kino i kintu kya kulangulukila’po bininge, mwene i amo?​—

Penepa shi muntu kampanda wakulonga kintu kisansa ino kupwa wealakanya amba yō, mfwile’ko lusa, le ukalonga’po namani? Lelo usa kumulekela?​—Le ukalonga namani shi wakulubila misunsa mivule? Lelo ukamulekela’nka kumulekela?​—

Shi i batwe balomba kufwilwa lusa, mwene tukasaka bakwetu betulekele mambo etu, mwene i amo?​—Nanshi netu tufwaninwe kulongela mukwetu’nka nabya. Ketufwaninwepo kunena ku kanwa konka amba tubamulekela, ino tufwaninwe kumulekela bya binebine mu mutyima wetu. Shi tulekela bakwetu namino, nabya tubelombola binebine amba tusakanga kwikala balondi ba Mufundiji Mukatampe.