UBAMONE meso a muntu ofundija Bible aputuka kitatyi kyaaimvwanija nshintulwilo ya kisonekwa kyomwatanga nandi! Wanena bityebitye amba, “Ukimba kunena bu Bible ufundija amba tubwanya kwikala nyeke ne nyeke mu Paladisa—enka pa ino ntanda’i?” Omwendele nandi mu busapudi wamungamunga kanena’mba, “I amo, ubamone Bible wanena’po namani?” Pa kutulumuka, mwifundi wapuka mutwe, kanena utulumuka’mba, “I bikomo kwitabija, nadi nkyafundile uno mwanda!” Ubavuluka’mba watulumukile muswelo umo mayenga matyetye kunyuma paayukile musunsa umbajinji amba dijina dya Leza i Yehova.

Lelo uno mwanda kewakutene? Bantu ba Leza bavule ke batane uno mwanda. Kudi myanda mityetye ibwanya kwituvuluja namino kyabuntu kilēme kyotupelwe—kya buyuki bwa bubine! Languluka’po bidi: Le wapatyile namani kino kyabuntu? Tusa kubandaula kino kipangujo mu kino kipindi. Muswelo watambwile bantu ba Leza mwinya wa ku mushipiditu i bukamoni kebuneneka bulombola’mba Bulopwe bwa Leza i bwa bine. Pano ke myaka katwa, Mulopwe wa buno Bulopwe, Yesu Kidishitu, utele mutyima ku kutala shi bantu ba Leza bafundijibwanga bubine.