KIPINDI 2
Kusapula Bulopwe—Kusalaja Myanda Miyampe Ntanda yonso
WITEAKANYANGA kwenda mu busapudi lubanga mu difuku dyobe dya konje. Ubeshisa bidi, mwanda wi mukōke. Mutyima ukutonona’nka ukōkolokwe mu lubanga! Ino ubatela ino myanda mu milombelo, ubasumininwa’nka kwenda. Mubasapula na kaka umo wa kikōkeji wa kikulumpe, kininga ne nsangaji yandi bibakutenga. Pomusapula musapu wa bubine ku njibo ne njibo, mubavuluka’mba kujokoloka ntanda yonso batutu ne bakaka bakwabo nabo basapulanga uno musapu na kwingidija mabuku amo onka na omwingidija ne kufundijibwa bufundiji bumo bonka. Abe ujoka ku njibo, bukomo pa bukwabo. Ubasangala mwanda wadi kushele ku njibo!
Dyalelo, mwingilo wa bwine Kidishitu o mwingilo mwinemwine wingilwa na Bulopwe bwa Leza. Yesu wālaile’mba mwingilo wa busapudi ukengilwa mu muswelo utulumukwa mu mafuku a mfulo. (Mat. 24:14) Le bupolofeto bwandi bwafikidile namani? Mu kino kipindi tusa kwisambila’mo pa bantu, manwa, ne bingidilwa byadi bya mvubu mpata mu mwingilo wa bwine Kidishitu bine bikwasha midiyo ne midiyo ya bantu ntanda yonso bamone’mba Bulopwe budi’ko bine.
MU KINO KIPINDI
SHAPITA 6
Bantu Basapula—Bengidi Bepāne na Mutyima Umo
Mwanda waka Yesu wādi ukulupile amba ukekala na bantu betabije kukwatakanya mwingilo mu mafuku a mfulo? Le i muswelo’ka okalombola amba ukimbanga dibajinji Bulopwe?
SHAPITA 7
Manwa a Mwa Kusapwila—Kwingidija Miswelo Yonso Mwanda wa Kusapwila Bantu
Wifunde myanda itala manwa a panopano engidije bantu ba Leza mwanda wa kusapwila bantu bavule myanda miyampe ponso po bibwanika kumeso kwa mfulo kufika.
SHAPITA 8
Bingidilwa bya Kusapula Nabyo—Kulupula Mabuku Mwanda wa Kusapula Ntanda Yonso
Le mwingilo wetu wa bwalamuni ulombola namani’mba Yesu udi netu? Le i myanda’ka idi mu mabuku etu ikulengeja witabije amba Bulopwe budi’ko bine?
SHAPITA 9
Bipa Bilupukile mu Busapudi—“Madimi . . . Abatōka tō Mwanda wa Kwangula”
Yesu wāfundije bandi bana ba bwanga myanda ibidi mikatampe itala mwangulo wa ku mushipiditu. Le netu tutalwanga na ino myanda namani dyalelo?
