KIFUNDWA 43
Lelo Bible Unena Bika pa Mwanda Utala Kutoma Mālwa?
Kujokoloka ntanda yonso, bantu badi na milangwe mishileshile pa mwanda utala mālwa. Bamo basangelanga kwiatoma dimodimo pamo na balunda. Bakwabo i bapele kutoma’mo nansha tutyetye. Ino bāngi nabo, ke kutoma i kwituta kufika’nka ne byobakolwa. Lelo Bible unena bika pa mwanda utala kutoma mālwa?
1. Lelo i bibi kutoma mālwa?
Bible kapelejepo kutoma mālwa. Ino, pabala byabuntu bitupēle Leza i mutele’po “ne vinyu isangaja mutyima wa muntu.” (Ñimbo ya Mitōto 104:14, 15) Bana-balume ne bana-bakaji bamo ba kikōkeji batelelwe mu Bible bādi batoma ne mālwa.—1 Temote 5:23.
2. Le i madingi’ka aleta Bible ku boba batonga kutoma mālwa?
Yehova i mupeleje mutomeno-mpata ne bunkolwankolwa. (Bene Ngalatea 5:21) Kinenwa kyandi kinena’mba: “Kokekala mu bukata mwa boba batoma vinyu mingi mpata.” (Nkindi 23:20) Nanshi shi tubatonge kutoma mālwa—nansha ke kwetu kwa bunka—ketufwaninwepo kutoma mangi alengeja tukomenwe kulanga biyampe, kuyuka byotunena, byotulonga, ne kulama bukomo bwetu bwa ngitu. Shi ketubwanyapo kuyuka pa kukadikila na mālwa, nankyo i biyampe kulekelela’o.
3. I muswelo’ka otukalēmeka butongi bwa bakwabo mu mwanda utala mālwa?
Muntu ne muntu ufwaninwe kwitongela shi ukatoma mālwa nansha shi kakatome’opo. Ketufwaninwepo kutopeka muntu watonga kutoma mālwa pa ntomeno, kadi ketufwaninwepo kutonona muntu wapela’o amba’nka atome, mhm. (Bene Loma 14:10) Tutoñanga ne kuleka kutoma mālwa shi akukaja bakwabo. (Tangai Bene Loma 14:21.) ‘Ketukimbangapo kamweno ka batwe bene, ino tukimbanga kamweno ka bakwabo.’—Tangai 1 Bene Kodinda 10:23, 24.
LANGULUKA BININGE
Tala misoñanya ya mu Bible ibwanya kukukwasha mwa kutongela shi ukatoma mālwa ne pa kukadikila shi ubatonge kwiatoma. Kadi tala ne byobya byobwanya kulonga shi udi na makambakano a mutomeno-mpata.
4. Witongele abe mwine
Lelo Yesu wādi umwene namani kilongwa kya kutoma mālwa? Pa kuyuka kilondololwa, talai kingelengele kibajinji kyawālongele. Tangai Yoano 2:1-11, ne kwisambila pa bino bipangujo:
-
Lelo kino kingelengele kibetufundija bika pa muswelo umona Yesu mālwa ne boba batoma’o?
-
Yesu byākapelejepo kutoma mālwa, le tufwaninwe kumona namani mwine Kidishitu utonga kutoma’o?
Shako mwine Kidishitu, nansha byadi na bwanapabo bwa kutonga kutoma mālwa, kekishintululapo amba ufwaninwe’nka kwiatoma. Tangai Nkindi 22:3, ne kubandaula ino myanda yobwanya kulangulukila’po shi i biyampe utome’o nansha kuleka:
-
Kokendeja motoka nansha kulongolola mashini.
-
Udi na dīmi.
-
Dokitele wakupeleja mālwa.
-
Ukolelwanga kuyuka pa kwimanina.
-
Leta wakupeleja kutoma mālwa.
-
Udi na muntu upelele kutoma mālwa mwanda wadi ukolelwa kuyuka pa kukadikila nao mafuku kunyuma.
Shi udi na butundaile nansha fetyi kampanda, le ufwaninwe’nka kuleta’ko mālwa? Pa kuyuka kya kulonga, talai VIDEO.
Tangai Bene Loma 13:13 ne 1 Bene Kodinda 10:31, 32. Twisambilei pa kino kipangujo pa kupwa kutanga kisonekwa ne kisonekwa:
-
Lelo kulonda uno musoñanya kukakukwasha namani ukwate butyibi busangaja Yehova?
Mwine Kidishitu ense udi na bwanapabo bwa kutonga kutoma mālwa nansha kupela. Nansha shi utomanga’o, mu bitatyi bikwabo, ubwanya kupela kutoma’o
5. Yuka pa kukadikila na mālwa
Shi ubatonge kutoma mālwa, vuluka kino: Nansha Yehova byakapelejepo kutoma mālwa, upeleje mutomeno-mpata. Mwanda waka? Tangai Hosea 4:11, 18, ne kwisambila pa kino kipangujo:
-
Le bikalanga namani shi muntu watome mālwa mavule?
Le tukepuka namani kutoma mālwa mavule? I biyampe kwikala na butūkanye, ko kunena’mba kuyuka mikalo yetu. Tangai Nkindi 11:2, ne kwisambila pa kino kipangujo:
-
Mwanda waka kwitūdila mikalo pa kukadikila na mālwa i mulangwe muyampe?
6. Nekenya mutomeno-mpata wa mālwa
Tala byobya byakweshe muntu umo aleke kutoma bibi mālwa. Talai VIDEO, ne kwisambila pa bino bipangujo:
-
Mu ino video, mālwa ashintyile namani muswelo wadi ulonga Dmitry bintu?
-
Le wabwenye kuleka mālwa bukidi bonka?
-
Ku mfulo, le wanekenye namani mālwa adi amumunine?
Tangai 1 Bene Kodinda 6:10, 11, ne kwisambila pa bino bipangujo:
-
Lelo bunkolwankolwa i mwanda mukatampe muswelo’ka?
-
I kika kilombola’mba bankolwankolwa babwanya kushinta?
Tangai Mateo 5:30, ne kwisambila pa kino kipangujo:
-
Kuketa kuboko kwelekeja kwielela’ko bininge mwanda wa kusangaja Yehova. Le ukalonga bika shi ulwanga pa kunekenya mutomeno-mpata wa mālwa? a
Tangai 1 Bene Kodinda 15:33, ne kwisambila pa kino kipangujo:
-
Le balunda nobe babwanya kwikala na lupusa’ka pa mutomeno obe wa mālwa?
MUNTU UBWANYA KWIPANGULA’MBA: “Le i bibi kutoma mālwa?”
-
Ukamulondolola namani?
MU KĪPI
Yehova wāpangile mālwa mwanda wa etusangaje, inoko ushikilwe mutomeno-mpata ne bunkolwankolwa.
Pitulukai’mo
-
Le Bible unena bika pa mwanda utala mālwa?
-
I byaka’ka bidi mu kutoma bininge mālwa?
-
Le tukalēmeka namani butongi bwa bakwetu mu mwanda utala kutoma mālwa?
KIMBA
Le nkasampe ubwanya kulonga namani butongi buyampe mu mwanda utala mālwa?
Tala matabula a kutabula pa kunekenya makambakano a mutomeno.
“Mona Malwa Mobifwaninwe” (Kiteba kya Mulami, 1 Kweji 2, 2010)
Le mwine Kidishitu ufwaninwe kutema bilaudi?
“Bipangujo bya Batangi” (Kiteba kya Mulami, 15 Kweji 2, 2007)
Tala muntu umo mwaalekēle kutoma mālwa mu nsekununi inena’mba, “Nadi Tūku wa Mālwa Kayula.”
“Bible Ushintanga Būmi” (Kiteba kya Mulami, 1 Kweji 5, 2012)
a Boba bamuninwe na mālwa bakokeja kusakilwa bukwashi bwa bamuñanga pa kuleka’o. Badokitele bavule banena’mba boba badi na makambakano a kutoma mālwa bibi bafwaninwe’tu kulekelela’o.
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
