Yesu ye Mutwe wa kipwilo kya bwine Kidishitu. (Bene Efisesa 5:23) Dyalelo, Yesu uludikanga balondi bandi pano pa ntanda aye momwa mūlu kupityila kudi “umpika mukōkele ne mudyumuke.” (Tangai Mateo 24:45.) Uno “umpika” byatongelwe na Yesu mwine, nanshi i mupebwe lupusa kampanda. Nansha nankyo, ukendelela kwikala bu umpika wa Kidishitu mwine ne kwingidila banababo na Kidishitu. Le uno umpika i ani? Ne witutalanga namani batwe?

1. “Le umpika mukōkele ne mudyumuke i ani”?

Tamba kala, Yehova wingidijanga muntu umo nansha kisumpi kityetye kya bana-balume mwanda wa kuleta bwendeji ku bantu bandi. (Malaki 2:7; Bahebelu 1:1) Yesu pa kupwa kufwa, batumibwa ne bakulumpe mu Yelusalema bātangidile kumeso. (Bilongwa 15:2) Dyalelo nadyo, na kulonda’nka kino kimfwa, kudi kisumpi kityetye kya bakulumpe​—kitwa bu Kitango Kyendeji kya Batumoni ba Yehova​—kyo kiletanga bidibwa bya ku mushipiditu ne kwendeja mwingilo wa busapudi. Kino kisumpi kyo kibundile ‘umpika mukōkele ne mudyumuke utongelwe na Yesu.’ (Mateo 24:45a) Bana-balume bonso badi mu Kitango Kyendeji i bene Kidishitu bashingwe māni, batengēle kukelunga na Kidishitu mu Bulopwe bwa momwa mūlu shi būmi bwabo bwa pano panshi bubafule.

2. Le i bidibwa’ka bya ku mushipiditu biletwa na uno umpika mukōkele?

Yesu wānenene amba umpika mukōkele wadi wa kupa banababo bene Kidishitu “byakudya byabo pa kitatyi kifwaninwe.” (Mateo 24:45b) Monka motwikadilanga bakomo ku ngitu kitatyi kyotudya bidibwa bya ku ngitu, ne bidibwa bya ku mushipiditu nabyo​—ke bufundiji butamba mu Kinenwa kya Leza kadi​—bitupanga bukomo botusakilwa pa kushala bakōkele kudi Yehova ne pa kuvuija mwingilo wētupēle Yesu kwingila. (1 Temote 4:6) Tutambulanga bino bidibwa ku kupwila, ku bitango bityebitye ne bikata, kadi i ne kupityila ku mabuku esambila pa Bible ne ku mavideo etukwasha twivwanije kiswa-mutyima kya Leza ne kukomeja kipwano kyetu nandi.

 LANGULUKA BININGE

3. Bantu ba Yehova bafwaninwe kwikala balongololwe

Kitango kyendeji kiteakanyanga mwingilo wa Batumoni ba Yehova munshi mwa buludiki bwa Yesu. Mpangiko ya uno muswelo yādi’ko ne mu bene Kidishitu babajinji. Talai VIDEO.

Tangai 1 Bene Kodinda 14:33, 40, ne kwisambila pa kino kipangujo:

• Le ano mavese alombola namani amba Yehova usakanga Batumoni bandi bekale balongololwe?

4. Umpika mukōkele uteakanyanga mwingilo

Mwingilo wa kusapula i mwingilo wa mvubu mpata wādi wingilwa na bene Kidishitu babajinji. Tangai Bilongwa 8:14, 25, ne kwisambila pa bino bipangujo:

• Lelo i bāni bādi bendeja mwingilo wa busapudi mu bene Kidishitu babajinji?

• Le ba Petelo ne Yoano bālongele’po namani pēbapelwe bulombodi butamba kudi batumibwa bakwabo?

Mwingilo wa kusapula o mwingilo wa mvubu mpata uteakanibwa na Kitango Kyendeji. Talai VIDEO.

 Yesu wālombwele amba mwingilo wa busapudi i wa mvubu bininge. Tangai Mako 13:10, ne kwisambila pa bino bipangujo:

• Mwanda wa bika Kitango Kyendeji kimwene mwingilo wa busapudi na mvubu mikatampe?

• Mwanda waka tusakilwa “umpika mukōkele ne mudyumuke” pa kuteakanya busapudi ntanda yonso?

5. Umpika mukōkele uletanga bulombodi

Kitango Kyendeji kiletanga bulombodi ku bene Kidishitu ba ntanda yonso. Le kiyukanga namani bulombodi bwa kupāna? Talai mwālongēle kitango kyendeji kya mu bene Kidishitu babajinji. Tangai Bilongwa 15:1, 2, ne kwisambila pa bino bipangujo:

• Le i mwanda’ka wāletele lupotopoto mu bene Kidishitu bamo ba mu myaka katwa kabajinji?

• I kudi bāni kwāendele ba Polo, Banabasa, ne bakwabo mwanda wa kukapwija uno mwanda?

Tangai Bilongwa 15:12-18, 23-29, ne kwisambila pa kino kipangujo:

• Kumeso kwa kukwata butyibi, le i bika byābandawile kitango kyendeji pokyādi kikimba bwendeji bwa Leza mu uno mwanda?​—Tala vese 12, 15, ne 28.

Tangai Bilongwa 15:30, 31 ne 16:4, 5, ne kwisambila pa bino bipangujo:

• Lelo bene Kidishitu babajinji bālongele namani pobātambwile bwendeji butamba ku kitango kyendeji?

• Le Yehova wāesele namani kikōkeji kyabo?

Tangai 2 Temote 3:16 ne Yakoba 1:5, ne kwisambila pa kino kipangujo:

• I kwepi kukimbanga Kitango Kyendeji bwendeji pa kukwata butyibi dyalelo?

 MU KĪPI

Kitango Kyendeji i “umpika mukōkele ne mudyumuke” utongelwe na Kidishitu. Uletanga bulombodi ne bidibwa bya ku mushipiditu ku bene Kidishitu ba ntanda yonso.

Pitulukai’mo

• Lelo i ani wātongele “umpika mukōkele ne mudyumuke”?

• Le Kitango Kyendeji kitutalanga namani?

• Le bine witabije amba Kitango Kyendeji ye “umpika mukōkele ne mudyumuke”?