KIPINDI KIBAJINJI
“Nkakimba Owa Wajimina”
Mukōko ubatunya dya kwenda. Wadi’tu udya lumenya mu madyo, ponkapo ubasansana na mikōko mikwabo. Pano keukimwenepo luombe nansha mukumbi mwine. Mfindi nayo yoi. Mukōko byowajimina mu musanza, ubabulwe mwa kwikingila ku banyema ba budyani babuluma. Ku mfulo, ubaivwana diwi dyowibidile kwivwana—i diwi dya mukumbi, wiya lubilo koudi, weutekuna, weuvunge mu mbwija ne kwiuselela ku njibo.
YEHOVA udingakanibwanga kyaba kyonso na uno mukumbi. Witukulupija mu Kinenwa kyandi amba: “Ami mwine ke ami kadi, nkakimba mikōko yami ne kukasokola’yo.”—Ezekyele 34:11, 12.
“Mikōko ya mu Madyo Ami”
Lelo mikōko ya Yehova i bāni? Mu kīpi, mikōko ya Yehova i bantu bamusenswe ne kumutōta. Bible unena’mba: “Iyai, tutōte, tubandamine; tufukate mu kifuko kya Yehova Umpangi wetu. Mwanda aye i Leza wetu, kadi bātwe netu twi bantu ba mu madyo andi, ne mikōko ya ku kuboko kwandi.” (Ñimbo 95:6, 7) Batōtyi ba Yehova badi na kipyupyu kya kulonda Mukumbi wabo, pamo bwa mikōko ilonda mukumbi. Le i bantu bakubulwa bilubo? Aa. Kyaba kimo bengidi ba Leza bekalanga pamo bwa ‘mikōko mipalakanibwe,’ “mikōko mijimine,” ne bwa ‘mikōko yenda ilumbakana.’ (Ezekyele 34:12; Mateo 15:24; 1 Petelo 2:25) Nansha namino, shi muntu wasāsuka mu dishinda, Yehova kamwelangapo bwa dikala endelela.
Lelo wiivwananga amba Yehova ukidi’nka Mukumbi obe? Le i muswelo’ka wilombolanga Yehova bu Mukumbi dyalelo? Ivwana bidi miswelo isatu:
Witudishanga ku mushipiditu. Yehova unena’mba: “Nkeidisha ne bidībwa biyampe, . . . e po ikalāla mu kipombo kiyampe, ne pa madyo afufuma ikadyanga.” (Ezekyele 34:14) Yehova katunyangapo kwitupa bidibwa bitobala palapala bya ku mushipiditu pa kitatyi kifwaninwe. Le ubwanya kuvuluka kishinte, dishikulu, nansha video kampanda yalondolwele milombelo yowadi ulomba bukwashi? Mwene kino kyakukulupije amba Yehova ukutele mutyima?
Witulamanga ne kwitukwatakanya. Yehova ulaile amba: ‘Nkajokeja owa mulube, ino nkakuta owa watyumunwa, ne kukakomeja owa ubela.’ (Ezekyele 34:16) Yehova ukomejanga bakōkekōke nansha balēmenenwe na malangalanga. Ukutanga mikōko mityumuke na kwiikwasha ikome—pakwabo i kupityila ku banababo mu lwitabijo. Kadi walujanga yoya ilubile ne yoya minyoñame.
Uyukile amba twi kiselwa kyandi. Yehova unena’mba: “Nkanyongolola’yo konsokonso ko yadi mipalakanibwe . . . Nkakimba owa wajimina.” (Ezekyele 34:12, 16) Kudi Yehova, mukōko mujimine ke dikala endelelapo. Uyukile amba shi mukōko keumwekelepo, ukeukimbanga, kadi shi weusokola wasangala. (Mateo 18:12-14) Kadi witanga batōtyi bandi ba bine bu “mikōko yami, mikōko ya mu madyo ami.” (Ezekyele 34:31) Nobe ubadilwa’mo.
Kudi Yehova, mukōko mujimine ke dikala endelelapo. Usangalanga shi mukōko ubamweka
“Alamuna Mafuku Etu Pamo’nka bwa Kalā”
Mwanda waka Yehova ukukimbanga ne kukwita ujokele kwadi? Mwanda usaka wikale na nsangaji. Ulaile mikōko yandi amba “kukekalanga mvula wa dyese.” (Ezekyele 34:26) Uno ke mulaopo wa bituputupu. Padi kodi kala mwimwene bukamoni abe mwine.
Vuluka mowafikile kuyuka Yehova. Kimfwa, wetenene namani powaivwene musunsa mubajinji bubinebine busangaja butala pa dijina dya Leza ne mpango yandi itala bantu? Lelo ukivulukile mutyima mowakutūkile powelungile na banabenu bene Kidishitu ku bitango? Powasapwile myanda miyampe ku muntu usangela musapu, mwene wajokēle ku njibo musangale ne kuloelelwa bya binebine?
Ubwanya kwimwena monka ino nsangaji. Bengidi ba Leza ba pa kala bālombele amba: “Betwalwije kodi, a Yehova, nabya tukālujibwa; alamuna mafuku etu pamo’nka bwa kalā.” (Madilo 5:21) Yehova wālondolwele ino milombelo, kadi bantu bandi bājokele kumwingidila monka na nsangaji. (Nehemia 8:17) Nobe Yehova ukakulondolola.
Inoko kunena’mba nsa kujokela kudi Yehova bipēla kunena. Teja makambakano amoamo ekalanga’ko pa kujoka ne muswelo wa kwianekenya.
Tala'po Bidi ne Bino:
MAVIDEO A MYANDA MIMWEKE
Batumoni ba Yehova—Lwitabijo Lwingila, Kipindi 1: Kutamba mu Fukutu
MAVIDEO A MYANDA MIMWEKE
