Yehova * Leza ye washilwile busongi bubajinji. Bible witusapwila amba walongele mwana-mukaji umbajinji, ebiya “wamuleta kudi mwana-mulume’wa.” Adama wasangala mpata, kanena’mba: “Uno’u, i kikupa kya ku bikupa byami, kadi i mwita wa ku mwita wami.” (Ngalwilo 2:22, 23) Yehova ukisakilanga boba besongele bekale na nsangaji.

Pomukisonga, mubwanya kulanga’mba byonso bikekala’nka senene. Ino na bubine, nansha ke ba mulume ne mukaji beswele binebine bakokeja kwilubila. (1 Kodinda 7:28) Mu uno boloshile usa kutana’mo misoñanya ya Bible, shi mwiilonde, ikekadija busongi bwenu ne kisaka kyenu na nsangaji.—Ñimbo 19:8-11.

BINENA BIBLE: Mulume ye mutwe wa kisaka.—Efisesa 5:23.

Shi wi mulume, Yehova ukusakila kukwatakanya obe mukaji na kanye. (1 Petelo 3:7) Wamulongele bu mukwashi nobe, o mwanda ukusakila kumukwata na bulēmantu ne na buswe. (Ngalwilo 2:18) Ufwaninwe kuswa obe mukaji bininge ne kusangela kutūla bisakibwa byandi kumeso kwa byobe.—Efisesa 5:25-29.

Shi wi mukaji, Yehova ukusakila kulēmeka obe mulume mpata ne kumukwasha afikije kiselwa kyandi. (1 Kodinda 11:3; Efisesa 5:33) Londa milangwe yakwata ne kwingila umbumo nandi na mutyima umo. (Kolose 3:18) Nabya, ukekala muyampe ku meso andi ne ku meso a Yehova.—1 Petelo 3:1-6.

BYOMUKOKEJA KULONGA:

• Ipangula mwine pobe muswelo okokeja kulonga wikale mulume nansha mukaji muyampe mpata. Ivwana na katentekeji, kadi wielela’ko kulonga byokokeja kulumbulula

• Tūkija mutyima. Pa kwiyuka mwa kwisangeja banwe bonso pakeja kitatyi

BINENA BIBLE: I biyampe kupyasakena tumweno twa mwinē pobe. (Fidipai 2:3, 4) Mona mwine pobe na bulēme, ne kuvuluka amba Yehova usakanga bengidi bandi bekale ‘batūkanye ku bonso.’ (2 Temote 2:24) “Kudi wa kampeja-bukidi ka kunenena pamo’nka bwa kusaba bwa kipete: Ino ludimi lwa bañeni luleta bukomo.” Nanshi, sañuna biyampe binenwa. (Nkindi 12:18) Mushipiditu wa Yehova ukakukwasha uyuke kunena na kanye ne buswe.—Ngalatea 5:22, 23; Kolose 4:6.

BYOMUKOKEJA KULONGA:

• Lomba bukwashi wikale talala, shitula mutyima kumeso kwa kwisamba myanda mikatampe na mwinē pobe

• Languluka bininge pa byosa kukanena ne mwa kukanenena’byo

BINENA BIBLE: Shi mubesonge, kemudi “ngitu imo” na mwinē pobe. (Mateo 19:5) Ino mukidi bantu babidi, mukokeja kwishīla mu milangwe. O mwanda mufwaninwe kwifunda kwikutyila umbumo mu milangwe ne mu miimvwanino. (Fidipai 2:2) Bumo i bwa kamweno pa kukuta nkuku. Bible unena’mba: “Byalwilo bikomejibwa pa kukala-ñeni.” (Nkindi 20:18) Nanshi misoñanya ya Bible imōlole pomunena kya mfulo pa myanda mikatampe.—Nkindi 8:32, 33.

BYOMUKOKEJA KULONGA:

• Sokwela mwine pobe patōka mowiimvwanina, ke’nkapo myanda nansha milangwe

• Mwisambilei pamo na mwinē pobe kumeso kwa kukolomona biselwa kampanda