Bufundiji bwa Kiteokratike i kiyukeno kiyukanya Batumoni ba Yehova. Masomo a pa bula afundijibwanga boba basapula kitatyi kyonso mwingilo wa Bulopwe mwanda wa ‘bavuije ne pa mfulo mwingilo wabo.’—2 Temote 4:5.

Masomo a Bapania. Pania wa lonso shi wabwanya mwaka mutuntulu wa mwingilo wa kitatyi kyonso, witwanga ku masomo a mafuku asamba abwanya kufundilwa ku Njibo ya Bulopwe ya kubwipi. Kitungo kyao i kukwasha pania apwane bininge na Yehova, alumbulule biyampe mwingilo wandi, kadi endelele na uno mwingilo wa kikōkeji.

Masomo a Basapudi ba Bulopwe. Ano masomo afundwanga mu myeji ibidi mwanda wa kukwasha bapania ba bwino bakokeja kuvilukila kokwa kusakilwa bukwashi bwabo. Banenanga’mba: “Ami uno! Ntume!” mwanda wa kwiula Yesu Kidishitu, Musapudi mukatampe wāingile pano pa ntanda. (Isaya 6:8; Yoano 7:29) Kuvilukila kulampe na kwenu kulomba kulonga bukomo bwa kwibidila būmi bwa muswelo mukwabo. Bibidiji, kushinta kwa bitatyi, ne byakudya bikokeja kwishila bininge na bya kowadi. Pakwabo bilomba kwifunda ludimi lungi. Ano masomo akwashanga batutu bankungulume ne bakaka bankungakaji ne besongele, ba myaka 23 kutūla ku 65 batamije ngikadila ya ku mushipiditu mine ikebakwasha mu mwingilo wabo, pamo ne bwino bwibalengeja bengidijibwe ne pa mfulo na Yehova ne na bulongolodi bwandi.

Masomo a Kwifunda Bible a Ngileade a Watchtower. Mu Kihebelu kishima “Ngileade” kishintulula’mba “Mulwi wa Bukamoni.” Tamba masomo a Ngileade ashimikwa mu 1943, ke malupule bamishonele 8 000 ne kupita basapula bukamoni senene “kufika ne ku mafulo a ntanda.” (Bilongwa 13:47) Pafikile dibajinji bamishonele mu Peru, kemwadipo kipwilo nansha kimo. Pano kemudi bipwilo 1 000 ne kupita. Kitatyi kyashilwile bamishonele kwingila mu Jampani, mwadi’tu Batumoni munshi mwa dikumi. Pano kemudi Batumoni 200 000 ne kupita. Mu myeji itano ya masomo a Ngileade mudi ne kwifunda ne pa mfulo Kinenwa kya Leza. Boba bengila bu bapania ba pa bula nansha bu bamishonele, boba bengila ku mabilo a musambo, nansha mu bipindi bo betwanga ku ano masomo mwanda wa kufundijibwa mwa kukomejeja ne kuningisha mwingilo wingilwa ntanda yonso.

• Le Masomo a Bapania adi na kitungo’ka?

• I bāni batoñwanga kukafunda Masomo a Basapudi ba Bulopwe?