KINTU kya myeji ibidi kupwa kutamba mu Edipito, Bene Isalela abafika ku Lūlu lwa Shinai, lwitwa ne bu Holeba. Kuno ye ako kwēsambile Yehova na Mosesa mu kimuna kitēma mudilo. Bantu abashimika kitūlo ne kushikata bityetye.

Ebiya bantu pa kushala bakunga munshi, Mosesa wākanda ku lūlu. Kwine ku nsongo ya lūlu’ku, Yehova walombola Mosesa’mba usakanga Bene Isalela bamukōkele ne kwikala bantu Bandi ba pa bula. Mosesa pa kutūka ku lūlu, wafumikila Bene Isalela byanena Yehova. Kupwa bantu abanena’mba bakakōkela Yehova, mwanda basakanga kwikala bantu bandi.

Penepo Yehova walonga kingelengele. Waalamuna nsongo ya lūlu yonso keifituka mwishi ne kulupula mikungulo mikomokomo. Kupwa wasapwila bantu’mba: ‘Ami ne Yehova Leza wenu wēmulupwile mu Edipito.’ Kupwa waleta ino mbila’mba: ‘Kemukatōta baleza bangi poso enka ami’wa.’

Leza wape Bene Isalela mbila nansha bijila bikwabo kitema. Bantu abazakala bininge. Kebanena Mosesa’mba: ‘Abe wisambe netu, ino Leza kakesamba netu kutyina’mba twakafwa.’

Kupwa kadi Yehova wanena Mosesa’mba: ‘Kanda ku lūlu wiye kondi. Nkakupa bipapo bibidi bya mabwe byonsonekele’po bijila dikumi byonsaka bantu bebilame.’ Penepo Mosesa wakanda monka ku lūlu. Wekulāla mafuku 40 mwinya ne bufuku.

Kadi Leza wape bantu bandi bijila bivulevule. Mosesa wasoneka bino bijila. Kadi Leza wape Mosesa bipapo bibidi bya mabwe. Pa bino bipapo, Leza i musoneke’po aye mwine bijila 10 byalombwele kala bantu bonso. Bitwanga bu Mbila Dikumi.

Mbila Dikumi i bijila bya mvubu. Nansha ke bijila bikwabo byapa Leza Bene Isalela nabyo i bya mvubu. Kijila kimo kinena’mba: ‘Ukasanswa Yehova Leza obe na mutyima obe onso, na ñeni yobe yonso, na muya obe onso ne na bukomo bobe bonso.’ Kikwabo nakyo amba: ‘Ukasanswa mukwenu pamo bwa abe mwine.’ Yesu Kidishitu, Mwanā Leza, wānene’mba, bino byo bijila bikatampe byāletele Yehova ku Bene Isalela. Kumeso’ku, tukefunda myanda mivule itala Mwanā Leza ne bufundiji bwandi.