LELO kodi mwivwane kashā mpunda wisamba? Ukokeja kunena’mba: ‘Mhm. Nyema kakokejapo kwisamba.’ Inoko Bible ulombola amba mpunda umo wēsambile. Tutalei bidi mobyāikadile.

Bene Isalela kebadi kubwipi na kutwela mu ntanda ya Kenani. Balake mulopwe wa Moabu watuyuka Bene Isalela. Penepo watume mikendi kudi Balame, muntu mukosoke, mwanda wa āye afinge Bene Isalela mafingo. Balake watyipila kupa Balame lupeto luvule, enka penepa Balame watentama pa mpunda wandi kaenda kukatala Balake.

Ino Yehova kasakilepo Balame afinge bantu bandi. Penepo watume mwikeulu na kipete kilampe akemike Balame mu dishinda. Balame kamwenepo mwikeulu, ino mpunda wamumone. O mwanda mpunda kakimbe kusāsuka mwikeulu kufula, ku mfulo wabatama panshi monka mu dishinda’mwa. Penepo Balame wakalabala, kakupila mpunda wandi na mukombo.

Kupwa Yehova waneneja mpunda mwanda wa Balame evwane. Mpunda waipangula’mba: ‘Le nalonga kika kyokounkupidila?’ Balame watentulula’mba: ‘Mwanda ubaumone pamo bwa kisenga. Shi nadi na kipete, longa kendi mukwipaye kala!’

Mpunda wamwipangula’mba: ‘Lelo kashā, nkendi mukulonge uno muswelo?’

Balame walondolola’mba: ‘Mhm.’

Kupwa Yehova wamwekeja Balame mwikeulu wimene na kipete mwishinda. Mwikeulu wanena’mba: ‘Mwanda waka ubakupila mpunda obe? Nadi naiya kujika dishinda dyobe, mwanda kufwaninwepo kwenda kukafinga Isalela. Shi mpunda obe wadi kasāsukilepo, longa nkendi mukwipaye, inoko nkyadipo wa kwipaya mpunda obe.’

Ebiya Balame kanena’mba: ‘Napi mambo. Nkyadipo ndyukile’mba wimene mwishinda.’ Penepo mwikeulu waleka Balame ende, ne Balame nandi waenda kukatala Balake. Balame kasomwenwepo kufinga Isalela, ino Yehova wamutununa esele Isalela misunsa isatu.