MOSESA wabilanga kutwela na Bene Isalela mu Kenani. Penepo walombe amba: ‘A Yehova, leka’po bidi ngabuke bukila bwa Munonga wa Yodano, ne kumona ntanda milumbuluke’ya.’ Ino Yehova wanena’mba: ‘Kubapu! Kokanena kino monka!’ Lelo uyukile mwanda’ka Yehova wanena namino?

I mwanda wa byālongekele pākupile Mosesa ku dibwe’pa. Vuluka, aye ne Alone kebātumbijepo Yehova. Kebāsapwidilepo bantu’mba Yehova ye wādi wa kwibalupwila mema mu dibwe. Pa kino, Yehova wēbanene’mba kebakatwelapo mu Kenani.

Penepo myeji mityetye kupwa kwa lufu lwa Alone, Yehova walombola Mosesa’mba: ‘Yata Yoshua, umwimike ku meso a kitobo Eleaza ne ku meso a bantu. Ponka’po, ku meso a abo bonso, wikale kwibalombola’mba Yoshua ke mwendeji mupya.’ Mosesa walongela monka mwamunenena Yehova, enka na momwena pa kifwatulo’ki.

Kupwa Yehova walombola Yoshua’mba: ‘Kankamana, kadi kokikwatwa moyo. Usa kutweja Bene Isalela mu ntanda ya Kenani yonebālaile, kadi nkekala nobe.’

Kupwa Yehova walombola Mosesa akande ku nsongo ya lūlu lwa Nebo mu ntanda ya Moabu. Ku nsongo’kwa, Mosesa wamone bukila bwa Munonga wa Yodano ne ntanda milumbuluke ya Kenani. Ebiya Yehova wamunena’mba: ‘Mine ino’i yo ntanda yonālaile kupa bana ba Abalahama, ba Isake, ne ba Yakoba. Tala’po nakulombola’yo, ino abe kukatwela’mopo, mhm.’

Kupwa Mosesa wafwila konka ku nsongo ya lūlu lwa Nebo. Wādi na myaka 120. Wādi ukidi na bukomo ne meso andi ādi akimona’nka biyampe. Bantu abakwatwa bulanda kashā, ne kudila kebadila Mosesa wafwa. Inoko abasangala pa kwikala na Yoshua, mwendeji wabo mupya.