DAVIDA pa kupwa kwipaya Ngodiata, Abinele mukulumpe wa basola ba Isalela wamutwala kudi Solo. Solo waloelelwa Davida kashā. Wamutūla ke mukulumpe wa basola bandi ne kumushikatyija mu njibo yandi ya bulopwe.

Kupwa, basola pa kujoka ku bulwi bwa na Bene Fidishitia, bana-bakaji abaimbe’mba: ‘Solo watape tununu, ino Davida watape tununu dikumi.’ Solo wakwatwa mukao, mwanda Davida watumbe bininge kumupita. Ino Yonafane mwanā Solo mwana-mulume aye kakwetwepo mukao. Wasanswa Davida bininge, Davida nandi wasanswa Yonafane. Penepo abo bonso bubidi abetyipila mutyipo wa kusamba bulunda bwa nyeke.

Davida i ñomba wa lunsense mukomokomo, Solo nandi usenswe ñimbo yandi. Ino, difuku dimo mukao wa Solo ubamutonona kulonga kintu kibi bininge. Papo Davida omba lunsense, Solo wakwata mukobe, wewela koku unena’mba: ‘Mulamankenye Davida ku lubumbu’kwa!’ Ino Davida waepa, penepa mukobe ubamutupe. Kupwa, Solo watupe Davida mukobe dikwabo. Davida wemone amba ufwaninwe kukosoka.

Ukivulukile mulao walaile Solo? Walaile amba, yense ukepaya Ngodiata ukamupa wandi mwana bu mukaji. Ku mfulo Solo wanena kupa Davida wandi mwana Mikale, ino poso bidi epaye balwana Bene Fidishitia 100 penepa kamupe’ye. Langa’po bidi! Solo wadi ulanga’mba Bene Fidishitia basa kwipaya Davida. Ino abamukomenwa, penepo Solo wape Davida wandi mwana bu mukaji.

Difuku dimo, Solo wasapwila Yonafane ne bengidi bandi amba usakanga kwipaya Davida. Ino Yonafane wanena shandi amba: ‘Kokasanshija Davida. Kakulongelepo kibi nansha kimo. Ino byonso byalonga i bikukwashe bininge. Watūdile būmi bwandi mu kyaka pa kwipaya Ngodiata, kadi nobe pa kuyuka uno mwanda wasangele.’

Solo walonda byanena wandi mwana, ne kutyipa kuleka kwipaya Davida. Penepo abajokeja Davida mu njibo ya Solo, nandi waingidila Solo mingilo enka na mwaadi ulongela kala. Ino difuku dimo, Davida wadi wimba ñimbo, Solo waela monka mukobe kudi Davida. Davida waepa, mukobe wakasa mu lubumbu. Uno ke musunsa wa busatu! Davida wamone amba ufwaninwe kunyema!

Bufuku’bo Davida waenda ku njibo yandi. Ino Solo watume’ko bantu ba kumwipaya. Mikale wayuka kisaka kulonga shandi. Penepo wasapwila wandi mulume amba: ‘Shi uleke kunyema buno bufuku, nankyo kesha bakwipaya.’ Bufuku’bo Mikale walupwila Davida pa dididisha. Davida washilula kwifya koku na koku mu bula bwa myaka isamba-ibidi mwanda wa Solo aleke kumusokola.