PONSO penda Yesu mu ntanda yonso, wendanga undapa babela. Ino myanda ya bingelengele ibasambakana mu bibundi byonso bikata ne bityetye. Penepo bantu abamuletela ba bulema, bampofu, babitwi ne babela bavule. Yesu webakomeja bonso.

Kepadi myaka isatu ne kupita tamba Yoano ubatyija Yesu. Yesu wasapwila batumibwa bandi amba usa kwenda’nka panō mu Yelusalema mwakepaibwa, kupwa ukasangulwa. Umbula bwa kino kitatyi, ukyendelela na kundapa babela.

Difuku dimo Yesu wadi ufundija mu Dya Sabado. Ku Bayuda, Dya Sabado i difuku dya kukōkolokwa. Mwana-mukaji omwene’u wadi ubela bininge. Wadi’nka mukonkamane, kubanduka mpika umbula bwa myaka 18. Kupwa Yesu wamutenteka makasa waoloka. Bine, wakoma!

Pa kino, bakulumpe ba bipwilo abakalabala. Umo waela kibumbo lubila’mba: ‘Kudi mafuku asamba anenwe kwingila’mo. Ye mafuku afwaninwe kundapwa bantu, ke mu Dya Sabadopo!’

Ino Yesu walondolola’mba: ‘Banwe bantu babi. Muntu yense momudi’mo usontolanga mpunda wandi ne kumutambija akatome mema mu Dya Sabado. Uno mwana-mukaji mulanda wabela ke myaka 18, le abulwe’po kubelulwa mu Dya Sabado?’ Malondololo a Yesu abafwija bantu babi’ba bumvu.

Kupwa Yesu ne batumibwa bandi abaenda ku Yelusalema. Abo bakidi panja pa kibundi kya Yediko, bampofu babidi ba lulombo abaivwana’mba Yesu au upita. Penepo abaela lubila’mba: ‘Yesu, witukwashe’ko!’

Yesu waite bampofu’ba kaebepangula’mba: ‘Musaka nemulongele kika?’ Abanena’mba: ‘Mfumwetu, witupūtule meso.’ Yesu watenga meso abo, ponka’po abaanza kumona! Uyukile mwanda waka Yesu uloñanga bino bingelengele byonso bya kutendelwa? Mwanda usenswe bantu, kadi usakanga bamwitabije. Nanshi tuyukei’mba, pakaludika bu Mulopwe, i kutupu ukabela monka pano pa ntanda.