Yehova kakalekapo bantu babi bonakanya Paladisa. Balunda nandi bo bonka kete bakekala’mo. Lelo bantu babi nabo bikebapityila namani? Shi usaka kuyuka kilondololwa, tanga nsekununi ya bintu bimweke byāfikīle Noa. Noa wāikele’ko myaka tununu kunyuma. Wādi muntu muyampe, wielela’ko nyeke kulonga kiswa-mutyima kya Yehova, ino bantu bakwabo koku balonga bibi. Penepo Yehova wāsapwila Noa amba usa kuleta dilobe dya konakanya bantu babi bonso. Wāsapwila Noa kūbaka safini, kutyina amba Noa ne kisaka kyandi bakafwa pa kwiya kwa dilobe.—Ngalwilo 6:9-18.

Noa ne kisaka kyandi bāubaka safini. Noa wādyumuna bantu amba Dilobe disa kwiya, ino abo kumwivwana mpika. Bāendelela na kulonga bintu bibi. Safini pa kupwa, Noa wātweja banyema mu safini, kupwa aye ne kisaka kyandi nabo bātwela’mo. Penepo Yehova wānokeja mvula wa munyenga. Mvula wānoka mafuku 40, mwinya ne bufuku. Mema ālobeja ntanda yonso.—Ngalwilo 7:7-12.

 Bantu babi bāfwa, ino Noa ne kisaka kyandi bāpanda. Yehova wēbalama bakomo nkē ku Dilobe, wēbalupwila pa ntanda mitōkejibwe ku bubi bonso. (Ngalwilo 7:22, 23) Bible unena amba kukekala kitatyi kikonakanya monka Yehova boba bapela kulonga byoloke. Bantu bayampe kebakonakanibwapo. Bakekala nyeke ne nyekeke mu Paladisa pano pantanda.—2 Petelo 2:5, 6, 9.

Dyalelo bantu bavule baloñanga bibi. Ntanda i miyule kavutakanya. Yehova utuma’nka kutuma Batumoni bandi benda badyumuna bantu, ino bavule kusaka kwivwana binenwa bya Yehova mpika. Kebasakepo kushinta būmi bwabo. Kebasakepo kwitabija binena Leza pa bintu byoloke ne byampikwa koloka. Lelo bano bantu bikebapityila namani? Lelo kudi difuku kampanda dyobakashinta? Bavule kebakashintapo nansha dimo. Ino kitatyi kya konakanya babi kibafwena, kebakekalapo na būmi dikwabo.—Mitōto 92:7.

Ntanda keikonakanibwapo; ikalongololwa ke paladisa. Boba bonso bekala balunda na Leza bakekala nyeke ne nyekeke mu Paladisa pano pantanda.—Mitōto 37:29.